Nitubaasa Kureeberera Tuta Ekyombeko Kyaitu ky’Obukama?

Buri Kyombeko ky’Obukama eky’Abajurizi ba Yehova nikyetererwa eiziina rya Ruhanga eririkwera. N’ahabw’ekyo okwejumba omu kureeberera ekyombeko ekyo kikaguma nikireebeka gye, ni kikuru omu kuramya kwaitu. Twena nitubaasa kwejumba omu kukireeberera.

Noobaasa kwejumba omu kuboneza bwanyima y’enteerane. Bwanyima y’oruteerane, ab’eishe-emwe nibaboneza Ekyombeko ky’Obukama kugira ngu kigume nikireebeka gye. Buri saabiiti nibagira obwire bakiboneza gye kyona. Omureeberezi nari omuheereza naayebembera omurimo gw’okukiboneza, obwo arikworeka ebiine kukorwa. Kurugiirira aha biine kukorwa, abamwe nibahwera omu kweyerera, kukiboneza omunda n’aheeru, kutereeza entebe, kuboneza ebihoroonio, amadirisa hamwe n’embuga. Omurundi gumwe omu mwaka nihateebwaho eizooba ry’okubonereza kimwe omwanya ogu kirimu. Twayejumba omu kuboneza okwo hamwe n’abaana baitu, nituba nitubeegyesa kuha ekitiinisa omwanya gwaitu gw’okuramizamu.​—Omubuurizi 5:1.

Noobaasa kuhwera omu kuhunduuza. Buri mwaka nihabaho okushwijuma Ekyombeko ky’Obukama omunda n’aheeru yaakyo. Bwanyima y’okukishwijuma, nituguma nitukihunduuza ahu kirikwetengyesa, reero kituhwera kutashohoza esente nyingi. (2 Obusingye 24:13; 34:10) Ekyombeko ky’Obukama ekirikureebeka gye n’omwanya murungi gw’okuramizamu Ruhanga waitu. Twayejumba omu murimo ogu, nitworeka ngu nitukunda Yehova kandi ngu nitutwara omwanya ogu turikuramizamu nka mukuru. (Zaaburi 122:1) Kandi eki nikituhaisa eiziina rirungi omu kicweka eki kirikuba kirimu.​—2 Abakorinso 6:3.

• Ahabw’enki twine kufayo aha mwanya gwaitu gw’okuramizamu?

• Ni ntebeekanisa ki ezirikukorwa kureeberera Ekyombeko ky’Obukama kikaguma nikireebeka gye?