Ekiihuro kya Mukama Waitu—N’Omukoro Ogurikuhaisa Ruhanga Ekitiinisa
ABAKRISTAAYO nibaragiirwa okwijuka ekiro ky’Okufa kwa Kristo. Omukoro ogu kandi nigwetwa “ekiihuro kya Mukama waitu.” (1 Abakorinso 11:20, NW) Ekikuru aha mukoro ogu niki? Ni ryari obu kishemereire kwijukwa kandi kishemereire kwijukwa kita?
Yesu Kristo akatandikaho omukoro ogu aha kiro ky’Okuhingurwaho eky’Abayudaaya omu mwaka gwa 33 C.E. Obugyenyi bw’Okuhingurwaho bukaba bubaho rimwe omu mwaka aha kiro kya 14 eky’omwezi gw’Abayudaaya ogurikwetwa Nisani. Okubaasa kubara ekiro ekyo, Abayudaaya bakaba barindirira ekiro ky’omu mwaka ekirimu eshaaha 12 nyomushana n’eshaaha 12 nyekiro. Okureebeka kw’okwezi bwanyima y’ekiro eki niyo yaabaire eba entandikiro y’okwezi kwa Nisani. Okuhingurwaho kukaba kubaho ebiro 14 bwanyima y’okureebeka kw’okwezi, omu mwabazyo eizooba ryaheza kurenga.
Yesu akarya obugyenyi bw’Okuhingurwaho n’abeegi be, ku yaaherize yaabinga Yuda Iskaryota, atyo yaatandikaho Ekiihuro kya Mukama Waitu. Ekiihuro eki kikaza omu mwanya gw’obugyenyi bw’Abayudaaya obw’Okuhingurwaho kandi n’ahabw’ekyo ekiro eki kishemereire kwijukwa rimwe omu mwaka.
Engiri ya Matayo neegira eti: ‘Yesu akakwata omugaati, yaagusiimira, yaagubega, yaaguheereza abeegi be naagira ati: Mwakiire, murye; ogu nigwo mubiri gwangye. Yaakwata ekikopo; ku yaaherize kusiima, yaakibaha naagira ati: ‘Munyweho mwena; ahakuba egi n’eshagama yangye ey’endagaano ensya, esheesheka ahabwa baingi, ngu basaasirwe ebibi.’—Matayo 26:26-28.
Abamwe nibaikiriza ngu Yesu akahindura omugaati gwaba omubiri gwe gwenyine ngu na viinyo yaaba eshagama ye yonyine. Kwonka omubiri gwa Yesu gukaba gukiriho gutaine oku gubaire obu yaabaha omugaati ogu. Noogira ngu buzima abeegi ba Yesu bakaba nibarya omubiri n’eshagama ye byenyine? Ngaaha, ahakuba ekyo kikaabaire nikimanyisa okurya enyama y’abantu n’okuhenda ekiragiro kya Ruhanga. (Okutandika 9:3, 4; Abaleevi 17:10) Okurugiirira ahari Luka 22:20, Yesu akagira ati: “Ekikopo eki niyo ndagaano ensya ehamibwa eshagama yangye, esheesheka ahabwanyu.” Ekikopo ekyo kyenyine nikyo kyahindukire “endagano ensya”? Ekyo kikaba kitarikubaasika obu egi yaabaire eri endagaano beitu kitari kintu ki orikubaasa kukwataho n’engaro.
N’ahabw’ekyo, byombi omugaati na viinyo n’obumanyiso kwonka. Omugaati nigukiikirira omubiri gwa Kristo oguhikiriire. Yesu akakoresa omugaati ogwashagire aha kiihuro ky’Okuhingurwaho. Omugaati gukaba gutarimu kitumbisa. (Okuruga 12:8) Baibuli emirundi emingi neekoresa ekitumbisa nk’akamanyiso k’ekibi nari obutahikiirira. N’ahabw’ekyo, omugaati gukaba nigukiikirira omubiri oguhikiriire ogu Yesu yaahaireyo. Gukaba gutaine kibi.—Matayo 16:11, 12; 1 Abakorinso 5:6, 7; 1 Petero 2:22; 1 Yohaana 2:1, 2.
Viinyo erikutukura neekiikirira eshagama ya Yesu. Eshagama egyo niyo erikuhikiiriza endagaano ensya. Yesu akagira ngu eshagama ye ekasheesheka “ahabwa baingi okusaasirwa ebibi.” N’ahabw’ekyo, abantu nibabaasa kuba abataine kabara omu maisho ga Ruhanga batyo bataahe omu ndagaano ensya na Yehova. (Abaheburaayo 9:14; 10:16, 17) Endagaano egi neebaasisa Abakristaayo 144,000 abeesigwa okuza omu iguru. Bari okwo omu iguru, baryaheereza nk’abagabe kandi abanyamurwa okuhitsya aha bantu boona emigisha.—Okutandika 22:18; Yeremia 31:31-33; 1 Petero 2:9; Okushuuruurwa 5:9, 10; 14:1-3.
Ni baahi abashemereire kurya aha mugaati na viinyo? Nikyeyoreka gye ngu abo abari omu ndagaano ensya nari shi abaine amatsiko g’okuza omu iguru—nibo bashemereire kurya aha mugaati n’okunywa ahari viinyo. Omwoyo orikwera wa Ruhanga naahamiza abo ngu batoorainwe kuba abagabe omu iguru. (Abarooma 8:16) Kandi bari n’omu ndagaano y’Obukama na Yesu.—Luka 22:29.
Kandi shi abo bo abaine amatsiko g’okutuura omu Kibanja kya Ruhanga omu nsi ebiro byona? Niboorobera ekiragiro kya Yesu, babaho aha mukoro gw’okwijuka Ekiihuro kya Mukama Waitu, kwonka bo tibarikurya aha bumanyiso. Rimwe omu mwaka, aha kiro 14 eky’okwezi kwa Nisani omu mwabazyo eizooba ryaheza kurenga, Abajurizi ba Yehova nibagira omukoro gw’okwijuka Ekiihuro kya Mukama Waitu. N’obu omu nsi yoona haraabe harimu bakye abarikugira ngu baine amatsiko g’okuza omu iguru, omukoro ogu n’ogw’omuhendo aha Bakristaayo boona. N’eizooba eri boona barikwecumitiriza ahari rukundo etakareebwaga eya Yehova Ruhanga na Yesu Kristo.—Yohaana 3:16.