Ekicweka 1
Ruhanga Buzima Naatufaho?
1, 2. Ni kibuuzo ki ekirikukwata ahari Ruhanga eki abantu barikwebuuza, kandi n’ahabw’enki?
NOOBAASA kuba obundi oreebuurize oti: ‘Ku haraabe hariho Ruhanga orikutufaho buzima, ahabw’enki naareka okubonabona kukabaho?’ Twena turabonaboineho nari haine ou turikumanya oraabonaboineho.
2 Okuruga ira, abantu buzima batwire nibabonabona ahabw’entaro, obwinazi, obubi, obutari buringaaniza, obworo, endwara n’okufeerwa abakundwa. Omu kyasha ekyahweire kyonka, entaro zikiita abantu abarikurenga obukaikuru 100. Abantu abandi nyamwingi bakahutaazibwa, abandi baafeerwa amaka n’ebintu byabo. N’omu kyasha eki, ebintu bibi bingi bibaireho, ebireetaire abantu baingi amaganya maingi, okucura, n’okuhwa amatsiko.
3, 4. Abantu baingi nibagamba ki aha bikwatiraine na Ruhanga okureka okubonabona kubaho?
3 Abamwe bakwatsirwe ekiniga kandi baagira ngu Ruhanga ku araabe ariho, buzima tarikutufaho. Nangwa nibabaasa n’okuteekateeka ngu Ruhanga tariho. Nk’eky’okureeberaho, omushaija owaabonaboine ahabw’okuhiiganisibwa kw’enganda, okwarugiremu okufa kwa banywani be hamwe n’ab’omu ka ye omu Rutaro rw’Ensi Yoona orw’Okubanza, akabuuza ati: “Ruhanga akaba ari nkahi obu twabaire nitumwetenga?” Ondiijo, owaahonokireho obu abantu nyamwingi baitwa Abanazi omu Rutaro rw’Ensi Yoona orwa Kabiri, akaba aine obusaasi bwingi ahabw’okubonabona oku yaareebire, ekyamureetaire kugira ati: “Ku waakurigatsa aha mutima gwangye, noobaasa kwihaho obutwa.”
4 N’ahabw’ekyo, abantu baingi tibarikwetegyereza ahabw’enki Ruhanga omurungi arikureka ebintu bibi bikabaho. Nibebuuza yaaba buzima naatufaho nari yaaba n’okubaho abaho. Kandi baingi aharibo nibateekateeka ngu okubonabona kuryagumaho.
[Ekishushani ekiri aha rupapura 2, 3]
Ensi ensya etarimu kubonabona kwona eri haihi?