Ruthe

2 Go be go na le monna yo a humilego kudu yo a bego a tswalana le monna wa Naomi e lego Elimeleke. Leina la gagwe e be e le Boase.

2 Ge nako e dutše e eya, Ruthe wa Momoaba a re go Naomi: “Ke kgopela go ya mašemong go yo topelela mabele ao a šetšego. Ke tla a topelela* tšhemong ya mang le mang yo a tlago go mpontšha botho.” Naomi a re go yena: “Sepela ngwanaka.” 3 Ge a realo, Ruthe a ya mašemong, a thoma go topelela mabele a šetše batho ba go buna ka morago. Gwa direga gore a tsene tšhemong ya Boase yo e bego e le wa leloko la Elimeleke. 4 Boase a tla a etšwa Betlelehema gomme a re go babuni: “Jehofa a a be le lena.” Ge ba fetola ba re go yena: “Jehofa a a go šegofatše.”

5 Boase a re go lesogana leo le bego le hlokometše babuni: “Mosetsana yo ke wa ga mang?” 6 Lesogana leo la araba la re: “Mosetsana yo ke Momoaba yo a tlilego le Naomi ge a etšwa nageng ya Moaba. 7 O nkgopetše go topelela mabele a šetše babuni ka morago. Ke moka a tsena tšhemong a hlwa a šoma go tloga mesong go fihla gona bjale ge a tlo khutša ganyenyane moriting.”

8 Boase a re go Ruthe: “Ngwanaka, o se ke wa yo topelela mabele tšhemong e nngwe, eupša dula o šoma kgauswi le basetsana bao ba ntšhomelago. 9 Dula o lebeletše gore ba ya go buna tšhemong efe, gomme o sepele le bona. Ke laetše masogana ao a ntšhomelago gore a se ke a go tshwenya.* Ge o nyorilwe, o ye o nwe meetse ao a lego ka dipaketeng ao a gelwego ke masogana ao.”

10 Ruthe a inamiša sefahlego, ke moka a khunama a re go yena: “Ke ka baka la’ng o ntshwara gabotse e bile o mpontšha botho, mola ke etšwa nageng e nngwe?” 11 Boase a re go yena: “Batho ba mpoditše dilo tše dintšhi tšeo o di diretšego mmatswale wa gago ka morago ga gore monna wa gago a hlokofale, le gore o tlogetše tatago, mmago le naga ya geno gomme wa tla bathong ba o sa ba tsebego. 12 Anke Jehofa a go šegofatše ka baka la dilo tše o di dirilego. Le gona eka Jehofa Modimo wa Isiraele, yoo o tšhabetšego go yena gore a go šireletše,* a ka go šegofatša* kudu.” 13 Ge a realo, Ruthe a re: “Hle eka o ka tšwela pele o mpontšha botho mong wa ka, ka gobane o nkhomoditše e bile o nkgothaditše, le ge ke se yo mongwe wa bahlanka ba gago.”

14 Nakong ya dijo Boase a re go yena: “Batamela mo kgauswi o je senkgwa, o se ngwathe o se ine ka binikeng.” Ke moka Ruthe a dula fase kgauswi le babuni gomme Boase a mo nea dithuthupe* a di ja, a khora a ba a šadiša tše dingwe. 15 Ge Ruthe a tloga a yo topelela mabele, Boase a laela masogana ao a mo šomelago a re: “Mo leseng a topelele le dingateng tša mabele, le se ke la mo tshwenya. 16 Le netefatše gore le mo ntšhetša a mangwe dingateng tšeo gomme le a tlogele gore a tle a a topelele, le se ke la mo thibela.”

17 A hlwa a topelela mabele tšhemong go fihla mantšiboa, ke moka a a fola. Mabele ao a a fotšego a nyakile a tlala seroto.* 18 A a rwala a boela le ona gae, gomme a a bontšha mmatswale wa gagwe, a ba a ntšha dijo tšeo a bego a di šadišitše mosegare ge a be a eja le babuni ke moka a mo nea tšona.

19 Mmatswale wa gagwe a re go yena: “O hlwele o topelela mabele tšhemong ya mang? Anke yo a go bontšhitšego botho a šegofatšwe.” Ruthe a botša mmatswale wa gagwe gore o hlwele a šoma tšhemong ya mang, a re: “Leina la monna yo ke bego ke šoma tšhemong ya gagwe ke Boase.” 20 Ge a realo, Naomi a re go ngwetši ya gagwe: “Monna yoo a šegofatšwe ke Jehofa, yena yo a bontšhago botho* go bao ba phelago le bao ba hlokofetšego.” Naomi a tšwela pele a re go yena: “Monna yoo ke wa gabo rena. O na le tshwanelo* ya go re hlokomela.” 21 Ruthe a re go yena: “Boase o ile a ba a re go nna: ‘O topelele mabele kgauswi le babuni ba ka go fihla ge ba fetša go buna.’” 22 Naomi a botša Ruthe ngwetši ya gagwe a re: “Ngwanaka, go kaone gore o dule o sepela le basetsana bao ba mo šomelago, go e na le gore o ye mašemong a mangwe ke moka batho ba tla ba go tshwenya.”

23 Ruthe a dula a sepela le basetsana bao, a topelela mabele go fihlela ge ba fetša go buna.* Ke moka a tšwela pele a dula le mmatswale wa gagwe.