Baahlodi

15 Ka morago ga lebakanyana, nakong ya puno ya korong, Simisone a yo etela mosadi wa gagwe a mo swaretše putšanyana. A re: “Ke duma go ya ka phapošing ya mosadi wa ka.” Eupša ratswale wa gagwe a se mo dumelele. 2 Ratswale wa gagwe a re go yena: “Ke be ke nagana gore, ‘ga o mo rate.’ Ke ka baka leo ke mo filego yo mongwe wa masogana ao a bego a go thuša. Na moratho wa gagwe ga a botsana go mo feta? Ke kgopela o tšee yena gore e be mosadi wa gago.” 3 Simisone a re go yena: “Gona bjale, Bafilisita ba ka se mpone molato ge nka ba gobatša.”

4 Ka gona Simisone a ya a swara diphukubje tše 300 (makgolo a mararo). Ke moka a tlemaganya diphukubje tše pedi tše pedi ka mesela, a tšea dirumula gomme a bea serumula godimo ga lehuto le lengwe le le lengwe. 5 A laeta dirumula tšeo gomme a rakela diphukubje mašemong a mabele a Bafilisita. Ka go dira bjalo a tšhuma dilo ka moka, a tšhuma dingata tša mabele, mabele ao a lego mahlakeng, meterebe le dirapa tša mehlware.

6 Bafilisita ba botšiša ba re: “Ke mang yo a dirilego se?” Ba botšwa gore: “Ke Simisone mokgonyana wa Thimina, ka gobane ratswale wa gagwe o tšere mosadi wa gagwe gomme a mo nea le lengwe la masogana ao a bego a mo thuša.” Ge Bafilisita ba ekwa seo, ba ya ba tšhuma mosadi yoo le tatagwe ka mollo. 7 Ke moka Simisone a re go bona: “Ge e ba le dirile seo, gona nka se khutše go fihla ke itefeletša go lena.” 8 Ke moka a bolaya banna ba bantšhi ga sehlogo, ka morago a ya a dula leweng la leswika la Etama.

9 Ka morago Bafilisita ba yo hloma ditente kua Juda gomme ba dulela go ya godimo le fase kua Lehi. 10 Ke moka banna ba moloko wa Juda ba re: “Ke ka baka la’ng le tlo re hlasela?” Bona ba re: “Re tletše go swara Simisone gore re mo dire tšeo a re dirilego tšona.” 11 Banna ba Juda ba 3 000 (dikete tše tharo) ba ya leweng la leswika leo le bitšwago Etama, ba re go Simisone: “Na ga o tsebe gore Bafilisita ba a re buša? Bjale o re’ng o dirile se?” Yena a re go bona: “Ke ba dirile seo ba ntirilego sona.” 12 Eupša ba re go yena: “Re tlo go swara gore re go iše go Bafilisita.” Ke moka Simisone a re go bona: “Nkeneleng gore le ka se ntlhasele.” 13 Ba re go yena: “Re tlo no go tlema, gomme ra go iša go bona, eupša re ka se go bolaye.”

Ka gona ba mo tlema ka dithapo tše pedi tše diswa, gomme ba mo ntšha ka leweng. 14 Ge a fihla Lehi, Bafilisita ba goeletša ba thabile ge ba mmona. Ka gona moya wa Jehofa wa mo nea matla, gomme dithapo tšeo ba bego ba mo tlemile ka tšona tša ba bjalo ka digarane tšeo di fišitšwego ke mollo, ke moka tša tlemologa. 15 A bona lerapo la mohlagare wa tonki e tona yeo e bego e sa tšo hwa, a le tšea ke moka a bolaya banna ba 1 000 (sekete) ka lona. 16 Ke moka Simisone a re:

“Ke bolaile manaba a mantšhi ka lerapo la mohlagare wa tonki!

Ke bolaile banna ba 1 000 (sekete) ka lerapo la mohlagare wa tonki.”

17 Ge a fetša go bolela, a lahla lerapo leo la mohlagare, ke moka a bitša lefelo leo gore ke Ramathe-lehi. 18 Ke moka a swarwa ke lenyora kudu, gomme a llela Jehofa a re: “Ke wena o thušitšego nna mohlanka wa gago go fenya ntweng ye, bjale na o tla ntlogela ke ehwa ka lenyora gomme ka wela ka diatleng tša banna ba ba sa go hlankelego?”* 19 Ka gona Modimo a bula lešoba leo le bego le le kua Lehi, gomme gwa tšwa meetse. Ge Simisone a enwa meetse ao, a boelwa ke matla. Ke ka baka leo a ilego a bitša lefelo leo gore ke Ene-hakore yeo e lego kua Lehi go fihla le lehono.

20 Simisone o ile a ba moahlodi kua Isiraele mehleng ya Bafilisita ka mengwaga e 20.