Baahlodi
10 Ka morago ga Abimeleke, Modimo o ile a kgetha Tola morwa wa Pua, morwa wa Dodo, monna yo a tšwago molokong wa Isakara, gore e be moahlodi kua Isiraele. O be a dula Shamire tikologong ya dithabeng tša Efuraime. 2 O ile a ba moahlodi wa Baisiraele ka mengwaga e 23. Ka morago a hlokofala gomme a bolokwa Shamire.
3 Ka morago ga gagwe Modimo o ile a kgetha Jairi wa Mogileada, gomme yena a ba moahlodi wa Baisiraele ka mengwaga e 22. 4 O be a na le barwa ba 30. Yo mongwe le yo mongwe o be a na le tonki ya gagwe le motse wa gagwe. Le lehono metse yeo e 30 e sa bitšwa Hafothe-jairi, gomme e nageng ya Gileada. 5 Ka morago ga moo Jairi o ile a hlokofala, gomme a bolokelwa Kamoni.
6 Baisiraele ba buša ba dira dilo tše mpe pele ga Jehofa, gomme ba thoma go hlankela Bobaali, medimo ya diswantšho ya Ashiterothe, medimo ya Arama,* medimo ya Sidone, medimo ya Moaba, medimo ya Baamoni le medimo ya Bafilisita. Ba ile ba tlogela Jehofa gomme ba se sa mo hlankela. 7 Ke moka Jehofa a galefela Baisiraele kudu gomme a dumelela Bafilisita le Baamoni gore ba ba fenye. 8 Ba tlaiša Baisiraele le go ba gatelela kudu ngwageng woo. Ba tšwela pele ba ba gatelela kudu ka mengwaga e 18 ka mošola wa Noka ya Jorodane, moo e bego e le naga ya Baamore kua Gileada. 9 Baamoni ba be ba fela ba tshela Noka ya Jorodane gomme ba elwa le moloko wa Juda, wa Benjamini le wa Efuraime. Baisiraele ba be ba tlaišega kudu. 10 Ke moka Baisiraele ba kgopela Jehofa gore a ba thuše. Ba re: “Re go senyeditše, ka gobane re tlogetše wena Modimo wa rena gomme ra hlankela Bobaali.”
11 Eupša Jehofa a re go Baisiraele: “Na ga se ka le phološa ge Baegepeta, Baamore, Baamoni, Bafilisita, 12 Basidone, Baamaleke le Bamidiane ba be ba le gatelela? Ge le be le llela gore ke le thuše, ke ile ka le thuša. 13 Eupša lena le ntlogetše la hlankela medimo e mengwe. Ke ka lebaka leo nka se le phološego gape. 14 Eyang le yo kgopela medimo yeo le e kgethilego gore e le thuše. A e be yona e le phološago nakong ya ge le le tlalelong.” 15 Ke moka Baisiraele ba re go Jehofa: “Re sentše. Re dire seo o bonago se lokile mahlong a gago. Eupša lehono re kgopela gore o re phološe.” 16 Ke moka Baisiraele ba thoma go tloša medimo e šele gare ga bona gomme ba hlankela Jehofa. Ka gona a se sa kgotlelela go bona Baisiraele ba tlaišega.
17 Ka morago Baamoni ba kgoboketša mašole gomme ba hloma ditente Gileada. Ke moka Baisiraele le bona ba kgobokana gomme ba hloma ditente kua Mitsipa. 18 Batho ba Gileada le baetapele ba bona ba botšišana ba re: “Ke mang yo a tlago go re eta pele ge re yo lwa le Baamoni? A e be yena moetapele wa badudi ka moka ba Gileada.”