Numeri

32 Bjale barwa ba Rubeni le barwa ba Gada ba be ba na le diruiwa tše ntšhi kudu, gomme ba bona naga ya Jatsera le naga ya Gileada e le lefelo le lebotse gore diruiwa di ka dula moo. 2 Ka gona barwa ba Gada le barwa ba Rubeni ba ya go Moshe, moperisita Eleasara le dikgošana tša setšhaba, ba re: 3 “Atharothe, Diboni, Jatsera, Nimira, Heshibone, Eleale, Sebama, Nebo le Beone, 4 e lego mafelo ao Jehofa a thušitšego rena Baisiraele gore re a tšee gore e be a rena, ke mafelo a mabotse kudu gore diruiwa di ka dula moo gomme rena bahlanka ba gago re na le diruiwa tše dintšhi.” 5 Ba tšwela pele ba re: “Ge e ba le re amogela, hle neang rena bahlanka ba lena naga ye gore e be bohwa bja rena, le se re tshediše Noka ya Jorodane.”

6 Ke moka Moshe a bolela le barwa ba Gada le barwa ba Rubeni a re: “Na banababo lena ba tla ya ntweng mola lena le dutše mo? 7 Le gona le re’ng le nyamiša Baisiraele gore ba se sa nyaka go ya nageng yeo Jehofa a tlago go ba nea yona? 8 Botatago lena ba dirile sona se ge ke be ke ba roma gore ba yo hlola naga ge re be re le kua Kadeshe-baranea. 9 Eitše ge ba rotogetše Moeding wa Eshikolo gomme ba bone naga, ba nyamiša Baisiraele gore ba se sa nyaka go ya nageng yeo Jehofa a bego a tlo ba nea yona. 10 Jehofa o ile a ba galefela kudu letšatšing leo, moo a ilego a ena a re: 11 ‘Banna bao ba tšwilego Egepeta go tloga ka ba mengwaga e 20 go ya godimo, ba ka se bone naga yeo ke tshepišitšego go e nea Aborahama, Isaka le Jakobo, ka gobane ga se ba nkwa ka dipelo tša bona ka moka. 12 Kalebe morwa wa Jefune wa Mokenitsi le Joshua morwa wa Nuni, ke bona feela ba tlago go bona naga yeo, ka gobane ke bona bao ba kwelego nna Jehofa ka dipelo tša bona ka moka.’ 13 Ka gona Jehofa a galefela Baisiraele kudu gomme a dira gore ba no dikologa lefelong letee lešokeng ka mengwaga e 40, go fihlela moloko ka moka wa batho bao ba bego ba dira dilo tše mpe pele ga Jehofa o fedile. 14 Bjale lena batho ba babe le dira dilo tšona tšeo botatago lena ba di dirilego, bao ba ilego ba dira gore Jehofa a galefele Baisiraele kudu. 15 Ge le ka tlogela go mo latela, o tla ba tlogela gape ba le lešokeng gomme le tla dira gore setšhaba se ka moka se fedišwe.”

16 Ka morago ba ya go yena ba re: “Re kgopela go agela mehlape ya rena mašaka a maswika mo, re be re agele bana ba rena metse. 17 Eupša rena re tla dula re itokišeleditše ntwa, e bile re tla eta Baisiraele pele go ba go fihlela re ba fihlišitše lefelong la bona, mola bana ba rena bona ba tla dula metseng yeo e šireleditšwego ba šireletšegile go badudi ba naga ye. 18 Re ka se boele malapeng a rena go ba go fihlela Moisiraele yo mongwe le yo mongwe a hweditše naga ya gagwe e le bohwa. 19 Ka gobane re ka se hwetše bohwa le bona go tloga ka lehlakoreng le lengwe la Noka ya Jorodane go ya pele, ka gobane bohwa bja rena re bo hweditše ka bohlabela bja Noka ya Jorodane.”

20 Moshe a ba araba a re go bona: “Yo mongwe le yo mongwe a itokišeletše go lwa pele ga Jehofa. 21 Le tshele Noka ya Jorodane pele ga Jehofa ge a raka manaba a gagwe pele ga gagwe. 22 Le tla lwa go fihlela le fentše naga pele ga Jehofa, ka morago ga moo le tla boa, gomme le ka se sa ba le molato pele ga Jehofa le go Isiraele. Naga ye e tla ba ya lena e le bohwa bjo Jehofa a le neilego bjona. 23 Eupša ge e ba le ka se dire seo, le tla ba le diretše Jehofa sebe. Ge go le bjalo le tsebe gore le tla ikarabela ka sebe sa lena. 24 Ka gona le ka agela bana ba lena metse le be le agele mehlape ya lena mašaka a maswika, eupša le swanetše go dira seo le se tshepišitšego.”

25 Barwa ba Gada le barwa ba Rubeni ba re go Moshe: “Rena bahlanka ba gago re tla dira feela bjalo ka ge wena mong wa rena o re laela. 26 Bana ba rena, basadi ba rena, mehlape ya rena le diruiwa tša rena ka moka di tla šala metseng ya Gileada, 27 eupša rena bahlanka ba gago re tla tshelela ka thoko yela ya Noka ya Jorodane. Go tla tshela monna yo mongwe le yo mongwe yo a itokišeleditšego go lwa pele ga Jehofa feela bjalo ka ge wena mong wa rena o bolela.”

28 Moshe a nea moperisita Eleasara, Joshua morwa wa Nuni le baetapele ba meloko ya Baisiraele taelo yeo e rego: 29 “Ge e ba barwa ba Gada le barwa ba Rubeni ba ka tshela Noka ya Jorodane le lena, gomme monna yo mongwe le yo mongwe a itokišeleditše go lwa pele ga Jehofa, ke moka la fenya naga, gona le tla ba nea naga ya Gileada gore e be ya bona. 30 Eupša ge ba ka se tshele le lena ba itokišeleditše ntwa, gona ba dule le lena nageng ya Kanana.”

31 Barwa ba Gada le barwa ba Rubeni ba araba ba re: “Re tla dira seo Jehofa a se boditšego rena bahlanka ba gago. 32 Re tla itokišeletša ntwa gomme ra tshelela nageng ya Kanana gore re yo lwela Jehofa, eupša naga yeo re tlago go e tšea gore e be bohwa bja rena e tla ba ya ka bohlabela bja Noka ya Jorodane.” 33 Ka gona Moshe a e nea barwa ba Gada, barwa ba Rubeni le seripa sa ba moloko wa Manase morwa wa Josefa, a ba nea mmušo wa Sihoni kgoši ya Baamore le mmušo wa Ogo kgoši ya Bashani, e lego naga ka moka, metse le metsana ya nageng yeo.

34 Barwa ba Gada ba aga motse wa Diboni, wa Atharothe, wa Aroere, 35 wa Atarothe-shofani, wa Jatsera, wa Jogobea, 36 wa Bethe-nimira le wa Bethe-harane, e lego metse yeo e šireleditšwego, ba agela le mehlape mašaka a maswika. 37 Barwa ba Rubeni ba aga motse wa Heshibone, wa Eleale, wa Kiriathaima, 38 wa Nebo le wa Baali-meone. Maina a metse yeo a be a fetotšwe. Le gona ba ile ba aga motse wa Sibima, ke moka ba reela metse yeo ba e agilego maina a maswa.

39 Barwa ba Makiri morwa wa Manase ba ya Gileada gore ba e hlasele ba be ba e tšee, gomme ba rake Baamore bao ba bego ba dula moo. 40 Ka gona Moshe a nea barwa ba Makiri morwa wa Manase naga ya Gileada ke moka ba thoma go dula go yona. 41 Barwa ba Jairi morwa wa Manase ba yo hlasela Baamore ba thopa metsana ya bona, gomme ba e reela leina ba re ke Hafothe-jairi. 42 Noba a yo hlasela Kenathe, a thopa le metsana yeo e lego kgauswi le yona gomme a e bitša ka leina la gagwe a re ke Noba.