Lefitiko

27 Jehofa a tšwela pele a bolela le Moshe a re: 2 “Botša Baisiraele o re: ‘Ge e ba motho a ka dira keno ya gore o tla neela Jehofa tšhelete e beilwego yeo motho a ka rekwago ka yona, gona a patele se: 3 Ge e ba e le monna wa mengwaga ya magareng ga e 20 go ya go e 60, gona motho yoo a patele ditšhelete tše 50 tša silifera, gomme di kalwe go ya ka tsela yeo tšhelete ya silifera e kalwago ka yona lefelong le lekgethwa. 4 Ge e ba e le mosadi, gona theko e beilwego e be ditšhelete tše 30 tša silifera. 5 Ge e ba e le motho yo motona wa mengwaga e mehlano go ya go e 20, gona theko e beilwego e be ditšhelete tše 20 tša silifera, gomme ge e le motho yo motshadi e be ditšhelete tše lesome tša silifera. 6 Ge e ba e le ngwana wa go tloga ka wa kgwedi go ya go wa mengwaga e mehlano, gona theko e beilwego ya mošemane e be ditšhelete tše hlano tša silifera gomme ya ngwanenyana e be ditšhelete tše tharo tša silifera.

7 “‘Ge e ba e le motho wa mengwaga ya go tloga ka e 60 go ya godimo, gona theko e beilwego ya monna e be ditšhelete tše 15 tša silifera gomme ya mosadi e be ditšhelete tše lesome tša silifera. 8 Eupša ge e ba motho yo a dirilego keno a diila kudu moo a sa kgonego go patela tšhelete yeo e beilwego, gona a ye go moperisita gomme a mmotše gore a ka kgona go patela bokae. Ke moka moperisita yena o tla mmeela tšhelete yeo a ka kgonago go e patela.

9 “‘Ge e ba motho a re o tlo nea Jehofa phoofolo yeo e hlwekilego, gona phoofolo yeo e tla ba selo se sekgethwa go Jehofa. 10 A se ke a tliša phoofolo e nngwe go e na le go tliša yeo a bego a šetše a e kgethile, e bile a se ke a tliša yeo e phetšego gabotse go e na le go tliša yeo e sego ya phela gabotse, goba a tliša yeo e sego ya phela gabotse go e na le go tliša yeo e phetšego gabotse. Eupša ge e ba a ka tliša e nngwe go e na le go tliša yeo a bego a šetše a e kgethile, gona diphoofolo tšeo ka moka e be selo se sekgethwa. 11 Ge e ba a dirile keno ka phoofolo yeo e sa hlwekago yeo motho a sa swanelago go e neela Jehofa, gona a tliše phoofolo yeo go moperisita. 12 Ke moka moperisita o tla bolela gore ke bokae go ya kamoo a bonago phoofolo yeo ka gona. Tšhelete yeo moperisita a tlago go e bea, e tla dula e le bjalo. 13 Eupša ge e ba a nyaka go e reka gape gore e be ya gagwe, gona go ditšhelete tše dingwe le tše dingwe tše hlano tša silifera, a oketše ka tšhelete e tee ya silifera.

14 “‘Ge e ba motho a ka tshepiša go nea Jehofa ntlo ya gagwe e le selo se sekgethwa, gona moperisita a bolele gore e tla ba bokae go ya kamoo a e bonago ka gona. Tšhelete yeo moperisita a tlago go e bea, ke yona yeo ntlo yeo e tlago go patelelwa ka yona. 15 Eupša ge e ba motho yo a tshepišitšego go nea Modimo ntlo ya gagwe a nyaka go e reka gape gore e be ya gagwe, gona go ditšhelete tše dingwe le tše dingwe tše hlano tša silifera, a oketše ka tšhelete e tee ya silifera, ke moka e tla ba ya gagwe.

16 “‘Ge e ba motho a tshepiša go nea Jehofa karolo e nngwe ya tšhemo ya gagwe, gona moperisita o tla bolela gore ke bokae go ya ka peu yeo e ka bjalwago go yona. Tekanyo e tee* ya peu ya mabele e tla lekana le digrama tše e ka bago tše 570 (makgolohlano-masomešupa) tša silifera. 17 Ge e ba a nea Modimo tšhemo ya gagwe ka Ngwaga wa Tokologo, gona tšhelete yeo e beilwego e tla dula e le bjalo. 18 Ge e ba a nea Modimo tšhemo ya gagwe ka morago ga Ngwaga wa Tokologo, gona moperisita a mmotše gore e tla ba bokae go ya ka mengwaga yeo e šetšego pele go fihla Ngwaga o mongwe wa Tokologo, gomme moperisita a fokotše tšhelete yeo a e beilego. 19 Eupša ge e ba motho yoo a ka reka tšhemo yeo gape gore e be ya gagwe, gona go ditšhelete tše dingwe le tše dingwe tše hlano tša silifera, a oketše ka tšhelete e tee ya silifera, ke moka tšhemo yeo e tla dula e le ya gagwe. 20 Bjale ge e ba a ka se reke tšhemo yeo gape gomme ya rekišetšwa motho yo mongwe, gona e ka se sa hlwa e rekwa gape. 21 Ge tšhemo yeo e lokollwa ka Ngwaga wa Tokologo, e tla ba selo se sekgethwa go Jehofa, e lego tšhemo yeo e neetšwego Modimo. E tla ba ya baperisita.

22 “‘Ge e ba motho a nea Jehofa tšhemo yeo a e rekilego eupša e se karolo ya bohwa bja gagwe, 23 gona moperisita a mmalele gore e tla ba bokae go ya ka mengwaga yeo e šetšego pele go fihla Ngwaga o mongwe wa Tokologo, gomme a mmotše gore e tla ba bokae lona letšatšing leo. Tšhemo yeo ke selo se sekgethwa go Jehofa. 24 Ka Ngwaga wa Tokologo tšhemo yeo e tla boela go motho yo a e rekilego go yena, e lego yena mong wa tšhemo yeo.

25 “‘Theko e nngwe le e nngwe e bewe go dirišwa tsela ya go kala tšhelete ya lefelong le lekgethwa. Tšhelete e nngwe le e nngwe ya silifera e lekane le digrama tše 12.*

26 “‘Eupša go se be le motho yo a dirago gore leitšibulo la phoofolo e be le lekgethwa, ka ge maitšibulo e le a Jehofa. Go sa šetšwe gore ke leitšibulo la poo goba la nku, ke la Jehofa. 27 Ge e ba leitšibulo leo e le la e nngwe ya diphoofolo tšeo di sa hlwekago gomme motho yoo a swanetše go le reka gape ka tšhelete yeo e beilwego, gona go ditšhelete tše dingwe le tše dingwe tše hlano tša silifera, a oketše ka tšhelete e tee ya silifera. Eupša ge e ba le ka se rekwe gape, gona le rekišwe go ya ka tšhelete yeo moperisita a e beilego.

28 “‘Go se be le selo seo motho a ka se neago Jehofa go tšwa dilong tša gagwe seo se ka rekišwago goba sa rekwa gape. E ka ba e le batho, diphoofolo goba tšhemo ya gagwe. Selo se sengwe le se sengwe seo se neetšwego Jehofa ke se sekgethwakgethwa. 29 Le gona motho le ge e le ofe yo a ahloletšwego lehu a se ke a rekollwa. O swanetše go bolawa.

30 “‘Karolo e nngwe le e nngwe ya lesome ya dilo tšeo di tšweletšwago ke naga goba dienywa tša mehlare, ke ya Jehofa. Ke selo se sekgethwa go Jehofa. 31 Ge e ba motho a nyaka go reka gape karolo le ge e le efe ya lesome yeo a e ntšhitšego, a ntšhe karolo ya bohlano ya tšhelete ya yona go oketša go tšhelete yeo a rekago ka yona. 32 Ge e le karolo e nngwe le e nngwe ya lesome ya dikgomo, ya dinku le dipudi, e lego phoofolo e nngwe le e nngwe ya lesome yeo e fetago ka tlase ga lepara la modiši, e tla ba selo se sekgethwa go Jehofa. 33 Go sa šetšwe gore phoofolo yeo e phetše gabotse goba ga se ya phela gabotse, o se ke wa kgetha e nngwe goba wa neela e nngwe go e na le go neela yeo o bego o šetše o e kgethile. Ge e ba o ka kgetha phoofolo e nngwe, gona diphoofolo tšeo ka moka di neelwe Modimo. Le gona o se ke wa reka phoofolo yeo gape.’”

34 Ye ke melao yeo Jehofa a e neilego Moshe kua Thabeng ya Sinai gore a e nee Baisiraele.