Lefitiko

2 “‘Bjale ge e ba motho a nyaka go tlišetša Jehofa sebego sa mabele, a tliše folouru yeo e šitšwego gabotse, gomme a bee makhura le diorelo godimo ga yona. 2 A se tliše go barwa ba Arone bao e lego baperisita, gomme moperisita a ntšhe folouru yeo e šitšwego gabotse ya go tlala seatla yeo e tswakilwego le makhura le diorelo ka moka tša yona. Ke moka a dire gore se thunye muši aletareng e le gore Modimo a dule a gopola sebego seo ka moka, gomme a se amogele e le sebego seo se thunyago muši wo o nkgago bose wo o yago go Jehofa. 3 Selo le ge e le sefe seo se šetšego sebegong sa mabele, ke sa Arone le barwa ba gagwe. Ke selo se sekgethwakgethwa ka gobane se tšerwe dibegong tšeo di fišetšwago Jehofa.

4 “‘Ge e ba o neela sebego sa mabele seo se bešitšwego sebešong, gona e be sa folouru yeo e šitšwego gabotse. E be senkgwa sa nkgokolo seo se sa omelwago seo folouru ya sona e tswakilwego le makhura goba diphaphatha tše di sa omelwago tšeo di tloditšwego ka makhura.

5 “‘Ge e ba sebego sa gago sa mabele se diretšwe ka paneng, gona e swanetše go ba sa folouru yeo e šitšwego gabotse le e sa omelwago yeo e tswakilwego ka makhura. 6 Se ngwathaganywe gomme o tšhele makhura godimo ga sona. Ke sebego sa mabele.

7 “‘Ge e ba sebego sa gago sa mabele se diretšwe ka paneng, gona e swanetše go ba sa folouru yeo e šitšwego gabotse yeo e tswakilwego le makhura. 8 O neele Jehofa sebego sa mabele seo se dirilwego ka dilo tše, gomme o se nee moperisita yoo a tlago go se batametša kgauswi le aletare. 9 Moperisita a tšee se sengwe sa sebego sa mabele a se fišetše aletareng e le sebego seo se thunyago muši wo o nkgago bose wo o yago go Jehofa, e le gore Modimo a dule a gopola sebego seo ka moka. 10 Selo le ge e le sefe seo se šetšego sebegong sa mabele ke sa Arone le barwa ba gagwe. Ke selo se sekgethwakgethwa ka gobane se tšerwe dibegong tšeo di fišetšwago Jehofa.

11 “‘Le se ke la neela Jehofa sebego sa mabele seo se nago le komelo, ka gobane ga se la swanela go tšea folouru yeo e dubilwego yeo e bedilego goba todi ya dinose, gomme la direla Jehofa sebego sa go fišwa.

12 “‘Le ka di neela Jehofa e le sebego sa dienywa tša pele, eupša le se ke la di tliša aletareng e le sebego sa monkgo o bose.

13 “‘Dibego tša lena tša mabele ka moka le di noke ka letswai. Le se ke la lebala go tšhela letswai leo le le gopotšago ka kgwerano ya Modimo wa lena. Dibego tša lena ka moka le di tšhele letswai.

14 “‘Ge e ba o neela Jehofa sebego sa mabele sa dilo tšeo o di bunnego pele, gona o tliše mabele a mathomo ao a bešitšwego mollong le bupi bja mabele ao a sego a šilwa gabotse, e le sebego sa mabele sa dilo tšeo le di bunnego pele. 15 O se tšhele makhura le diorelo. Ke sebego sa mabele. 16 Moperisita a se fiše mollong e le gore Modimo a dule a gopola sebego seo ka moka. A fiše mabele ao a sego a šilwa gabotse ao a tšhetšwego makhura le diorelo ka moka, e le sebego sa go fišwa seo se direlwago Jehofa.