Jobo

 2 “Le tla tlogela neng go tshwenyana le moya wa ka

Le go ntlhaba ka mantšu?

 3 Le šetše le nkgalemetše ga lesome,

E bile ga le jewe ke dihlong tša gore le ntshwara gampe.

 4 Ge e ba ka nnete ke dirile phošo,

Lena ga go na mo le tsenago tabeng ye.

 5 Ge e ba le ipona le le kaone go mpheta,

E bile le bona ke swanelwa ke go tlontlollwa ka baka la mathata a ka,

 6 Gona tsebang gore Modimo ke yena a ntahleditšego,

E bile o ntantše ka nete ya gagwe.

 7 Bonang! Ke dula ke goeletša ka baka la mathata a ka, fela ga go na yo a nkarabago,

Ke dula ke kgopela thušo, eupša ga go na yo a nthušago.

 8 Modimo o thibile tsela ya ka ka leboto la maswika, ga ke kgone le go feta.

O khupeditše ditsela tša ka ka leswiswi.

 9 O dirile gore ke se sa hlomphega,

E bile o ntšeetše seriti sa ka.

10 O ntlhasela ka mahlakoreng ka moka go fihlela ke ehwa,

O tumola kholofelo ya ka bjalo ka ge eka o tumola medu ya mohlare.

11 O nkgalefetše kudu,

E bile o mpona ke le lenaba la gagwe.

12 Mašole a gagwe a ipopile ngatana e tee gore a ntlhasele,

A hlomile ditente tša ona go dikologa tente ya ka.

13 Banabešo o ba išitše kgole kudu le nna,

Ge e le bao ba ntsebago bona ba ntlhanogetše.

14 Bagwera ba ka ba bagolo ba ntlogetše,

Le bao ke ba tsebago gabotse ba ntebetše,

15 Makgoba a ka a basadi le baeng ba ka ba ntšea bjalo ka motho yo ba sa mo tsebego,

Ke fetogile motšwantle go bona.

16 Ke biditše mohlanka wa ka, eupša ga a nkarabe,

Le ge ke mo kgopela gore a nkwele bohloko.

17 Legano la ka le nkgela le mosadi wa ka,

E bile ke šišingwa ke banabešo.

18 Ke šišingwa le ke bana ba banyenyane,

Ge ke re ke a ema, ba thoma go nkwera.

19 Bagwera ba ka ba bagolo ka moka ba ntlhoile,

Gomme bao ke ba ratago ba ntlhanogetše.

20 Mmele wa ka ke marapo feela,

Gomme ke phonyokga lehu ka lešobana la nalete.

21 Nkweleng bohloko, nkweleng bohloko hle lena bakgotse ba ka,

Ka gobane Modimo o dirile gore ke welwe ke mathata.*

22 Go reng le dulela go ntlaiša go swana le ge Modimo a ntlaiša,

Le sa tlogele go ntlhasela?

23 Okare mantšu a ka a ka ngwalwa!

Okare a ka ngwalwa ka pukung!

24 Okare nkabe a be a ka ngwalwa leswikeng ka pene ya tšhipi le morodi,

E le gore a dulele moo sa ruri!

25 Nna ke tseba gabotse gore yo a tlago go mphološa o a phela,

Le gore o tla tla ka moragonyana gomme a ema godimo ga lefase.

26 Ka morago ga gore letlalo la ka le senyege,

Ke tla bona Modimo ke sa phela,

27 Ke tla iponela yena,

Mahlo a ka a tla mmona, a ka se bonwe ke motho yo mongwe.

29 Tšhabang sabola,

Ka gobane ge le dira melato le tlo otlwa ka yona.

Le swanetše go tseba gore go na le moahlodi.”