Puku ya Bobedi ya Dikoronika

32 Ka morago ga gore Hesekia a dire dilo tše ka moka ka go botega, Kgoši Sanheribe wa Asiria o ile a tla gore a tlo hlasela Juda. O ile a dikanetša metse e šireleditšwego e le gore a thube metse yeo gomme a e thope.

2 Ge Hesekia a bona gore Sanheribe o tlile a itokišeditše go tlo lwa le Jerusalema, 3 o ile a boledišana le baetapele le mašole a gagwe gomme a phetha ka gore ba thibe didiba tšeo di bego di le ka ntle ga motse ke moka bona ba mo thekga. 4 Ka gona batho ba bantšhi ba kgobokana, gomme ba thiba didiba le dinokana tšeo di bego di elela moo nageng ba re: “Ke ka baka la eng dikgoši tša Asiria di swanetše go tla mo gomme di hwetše meetse a mantšhi?”

5 Le gona ka ge a be a ikemišeditše o ile a tsošološa leboto leo le bego le wele le ditora tšeo di bego di le go lona gomme a aga leboto le lengwe ka ntle. O ile a ba a lokiša Mmoto wa Motse wa Dafida gomme a dira dibetša tše dintšhi kudu le dikotse. 6 Ka morago o ile a kgetha baetapele ba mašole gare ga setšhaba gomme a ba kgoboketša lebaleng leo le bego le le kgauswi le keiti ya motse a ba kgothatša a re: 7 “Ebang le sebete gomme le tie matla. Le se ke la boifa goba la tšhošwa ke kgoši ya Asiria le batho bao e nago le bona ka gobane bao ba nago le rena ke ba bantšhi go feta bao ba nago le yona. 8 Yena o ithekgile ka matla a batho, eupša rena re na le Jehofa Modimo wa rena yo a tlago go re thuša go lwa dintwa tša rena.” Ke moka setšhaba sa matlafatšwa ke mantšu ao a Kgoši Hesekia wa Juda.

9 Ka morago ga dilo tšeo, ge Kgoši Sanheribe wa Asiria a be a le Lakishi a na le mašole a gagwe ka moka, o ile a romela bahlanka ba gagwe Jerusalema go Kgoši Hesekia wa Juda le go Bajuda ka moka bao ba bego ba le Jerusalema, a re:

10 “Kgoši Sanheribe wa Asiria o re: ‘Le tshepile eng ge le dutše mo Jerusalema gomme le sa tšhabe mola e dikaneditšwe? 11 Hesekia o a le fora ge a le botša gore Jehofa Modimo wa lena o tla le phološa seatleng sa kgoši ya Asiria. O bolela maaka, go e na le moo le tlo hwa le bolawa ke tlala le lenyora.” 12 Na Hesekia ga se yena yo a tlošitšego mafelo a phagamego ao go rapelwago go ona a Modimo wa lena le dialetare tša gagwe ke moka a botša Juda le Jerusalema a re le swanetše go khunama pele ga aletare e tee le be le dire dihlabelo tšeo di thuntšhago muši go yona”? 13 Na ga le tsebe seo nna le borakgolokhukhu ba ka re ilego ra se dira ditšhaba ka moka tša dinageng tše dingwe? Na medimo ya dinaga tše dingwe e ile ya kgona go phološa dinaga tšeo seatleng sa ka? 14 Gare ga medimo ka moka ya ditšhaba tše dingwe yeo borakgolokhukhu ba ka ba ilego ba e fediša, ke modimo ofe yoo a ilego a kgona go phološa setšhaba sa gagwe seatleng sa ka, moo e lego gore Modimo wa lena a ka kgona go le phološa seatleng sa ka? 15 Bjale le se ke la dumelela Hesekia a le fora goba a le lahletša ka tsela ye. Le se ke la ithekga ka yena ka gobane ga go na mmušo le ge e le ofe goba modimo wa setšhaba le ge e le sefe yoo a ilego a kgona go phološa setšhaba sa gagwe seatleng sa ka le seatleng sa borakgolokhukhu ba ka. Ka gona le Modimo wa lena a ka se kgone go le phološa seatleng sa ka!’”

16 Bahlanka ba Sanheribe ba tšwela pele ba kwera Jehofa Modimo wa nnete le Hesekia mohlanka wa gagwe. 17 Sanheribe o ile a ba a ngwala le mangwalo gore a roge Jehofa Modimo wa Isiraele le go mo kwera, a re: “Go no swana le ge medimo ya ditšhaba tša dinaga tše dingwe e sa ka ya kgona go phološa batho ba yona seatleng sa ka, le Modimo wa Hesekia a ka se kgone go phološa batho ba gagwe seatleng sa ka.” 18 Ba tšwela pele ba goeletša ka leleme la Bajuda ba goeletša batho ba Jerusalema bao ba bego ba le lebotong gore ba boife ba be ba tšhoge e le gore ba tle ba thope motse woo. 19 Ba ile ba bolela gampe ka Modimo wa Jerusalema ka tsela yeo ba ilego ba bolela gampe ka medimo ya ditšhaba tšeo di lego mo lefaseng yeo e dirilwego ke batho. 20 Eupša Kgoši Hesekia le moporofeta Jesaya, morwa wa Amotse ba tšwela pele ba rapela ka taba ye ebile ba llela Modimo wa magodimong gore a ba thuše.

21 Ke moka Jehofa a romela morongwa wa gagwe gomme a fediša mašole ka moka a matla, baetapele ka moka le balaodi ka moka ba mašole bao ba bego ba le kampeng ya kgoši ya Asiria, moo e ilego ya boela morago nageng ya yona e swabile. Ka morago ga moo, o ile a tsena ka ntlong* ya modimo wa gagwe gomme ba bangwe ba barwa ba gagwe ba mmolaya ka sabola gona moo. 22 Ka gona Jehofa a phološa Hesekia le batho bao ba bego ba dula Jerusalema seatleng sa Kgoši Sanheribe wa Asiria le diatleng tša manaba a mangwe ka moka gomme a ba dira gore ba be le khutšo ka mahlakoreng ka moka. 23 Batho ba bantšhi ba ile ba tlišetša Jehofa dimpho Jerusalema ba ba ba tlišetša Kgoši Hesekia wa Juda dilo tše dibotse, ka morago ga moo ditšhaba ka moka di ile tša mo hlompha kudu.

24 Mehleng yeo, Hesekia o ile a babja wa go hwa gomme a rapela Jehofa, ke moka yena a mo araba a ba a mo fa seka. 25 Eupša Hesekia ga se a ka a leboga dilo tše dibotse tšeo a ilego a di direlwa, ka gobane o ile a thoma go ikgogomoša gomme Modimo a mo galefela a ba a galefela Juda le Jerusalema. 26 Eupša Hesekia o ile a tlogela go ikgogomoša gomme a ikokobetša. Badudi ba Jerusalema le bona ba ile ba mo ekiša gomme Jehofa a se sa ba galefela mehleng ya Hesekia.

27 Hesekia o ile a huma kudu a ba a tuma gomme a itirela dintlo tša go bolokela dilo, gore a bee silifera, gauta, maswika a bohlokwa, makhura a balesamo, dikotse le dilo ka moka tše di rategago. 28 O ile a aga mafelo a go bolokela dilo tšeo di dirilwego ka mabele, tšeo di dirilwego ka beine e mpsha le tšeo di dirilwego ka makhura, a ba a aga le mašaka a diruiwa tša mehutahuta gotee le mašaka a mehlape. 29 O ile a ikagela le metse, a ba le dikgomo tše dintšhi, dinku le dipudi tše dintšhi ka gobane Modimo o be a mo file dilo tše dintšhi kudu. 30 Hesekia ke yena a ilego a thiba sediba sa ka godimo sa meetse a nokana ya Gihone gomme a a lebiša ka bodikela gore a ye motseng wa Dafida, le gona Hesekia o ile a atlega dilong ka moka tšeo a bego a di dira. 31 Eupša ge baetapele ba Babilona ba roma baboleledi ba bona go yena go mmotšiša ka seka seo ba ilego ba se bona nageng, Modimo wa nnete o ile a mo tlogela e le gore a mo leke gore a kgone go tseba dilo ka moka tšeo di lego pelong ya gagwe.

32 Ditaba ka moka tša Hesekia le dilo ka moka tšeo a di dirilego tšeo di bontšhago gore o na le botho* di ngwadilwe ponong ya moporofeta Jesaya morwa wa Amotse, ka Pukung ya Dikgoši tša Juda le tša Isiraele. 33 Mafelelong Hesekia a hlokofala go no swana le borakgolokhukhu ba gagwe, ba mmolokela mmotong wa ge o eya mabitleng a barwa ba Dafida gomme Bajuda ka moka le badudi ka moka ba Jerusalema ba ile ba mo hlompha lehung la gagwe. Ke moka morwa wa gagwe Manase a ba kgoši legatong la gagwe.