Puku ya Bobedi ya Dikoronika
17 Morwa wa gagwe e lego Jehoshafate o ile a ba kgoši legatong la gagwe gomme bogoši bja gagwe bja ba matla Isiraeleng. 2 A bea mašole metseng ka moka yeo e šireleditšwego ya Juda, a ba a aga mafelo ao a bego a tlo bea mašole go ona nageng ya Juda le metseng ya Efuraime yeo Asa tatagwe a bego a e thopile. 3 Jehofa o ile a dula a na le Jehoshafate, ka gobane o ile a sepela ditseleng tšeo di ilego tša sepelwa ke Dafida rakgolokhukhu wa gagwe nakong e fetilego, ebile ga se a ka a hlankela Bobaali. 4 Ka gobane o ile a hlankela Modimo wa tatagwe a ba a kwa ditaelo tša gagwe, ebile ga se a ka a dira dilo tšeo Isiraele e bego e di dira. 5 Jehofa a thuša Jehoshafate gore mmušo wa gagwe o dule o tiile gomme batho ba Juda ka moka ba dula ba efa Jehoshafate dimpho. Ka baka leo, a ba le mahumo a mantšhi ke moka batho ba mo hlompha kudu. 6 O ile a ba le sebete sa go dula a ekwa Jehofa, a ba a tloša le mafelo a phagamego ao go rapelwago go ona le dikota tše kgethwa* kua Juda.
7 Ka ngwaga wa boraro wa ge Jehoshafate a buša, go ile gwa romelwa molaetša gore go bitšwe baetapele bao a ba kgethilego, e lego Bene-haile, Obadia, Sakaria, Nethanele le Mikaya, gomme a ba roma gore ba ye ba rute metseng ya Juda. 8 Ba be ba na le Balefi, e lego Shemaya, Nethania, Sebadia, Asahele, Shemiramothe, Jehonathane, Adonija, Tobija le Tobi-adonija, ebile ba be ba na le Elishama le Jehorama bao e lego baperisita. 9 Ba ile ba thoma go ruta batho ba Juda, ba swere puku ya Molao wa Jehofa. Le gona ba ile ba sepela le metse ka moka ya Juda ba ruta batho.
10 Mebušo ka moka yeo e dikologilego dinaga tša Juda e ile ya boifa Jehofa gomme ya se ke ya lwa le Jehoshafate. 11 Bafilisita ba be ba tlišetša Jehoshafate dimpho le tšhelete go bontšha gore ba a mo hlompha. Batho ba Arabia ba ile ba mo tlišetša dinku tše tona tše 7 700 (dikete tše šupa le makgolo a šupa) le dipudi tše tona tše 7 700 (dikete tše šupa le makgolo a šupa) tšeo di tšwago mehlapeng ya bona.
12 Jehoshafate o ile a tšwela pele a eba matla kudu le gona o ile a tšwela pele a aga mafelo ao a šireleditšwego le metse ya go bolokela dilo kua Juda. 13 O ile a dira mešomo e mentšhi metseng ya Juda. Le gona, Jerusalema o be a na le mašole, ona mašole a matla. 14 Mašole a a be a beakantšwe go ya ka malapa a borakgolokhukhu ba ona. A be a beakantšwe ka tsela ye: Go moloko wa Juda go be go na le baetapele ba mašole a 1 000 (sekete). Wa mathomo e be e le Adene, yoo a bego a na le mašole a matla a 300 000 (dikete tše makgolo a mararo). 15 Jehohanani yoo le yena e bego e le moetapele, o be a le ka tlase ga Adene gomme a na le mašole a 280 000 (dikete tše makgolopedi-masomeseswai). 16 Le gona, Amasia morwa wa Sikiri yoo le yena e bego e le moetapele o be a le ka tlase ga Adene. Amasia o be a ikemišeditše go hlankela Jehofa ebile a na le mašole a matla a 200 000 (dikete tše makgolo a mabedi). 17 Go moloko wa Benjamini, moetapele e be e le Eliada yoo e bego e le lešole le matla. O be a na le mašole a 200 000 (dikete tše makgolo a mabedi), gomme lešole le lengwe le lengwe le be le itlhamile ka bora le kotse. 18 Jehosabadi yoo le yena e bego e le moetapele, o be a le ka tlase ga Eliada. O be a na le mašole a 180 000 (dikete tše lekgolo-masomesewai) ao a bego a ikemišeditše go lwa ntwa. 19 Batho ba ka moka ba be ba hlankela kgoši, go oketša go bao kgoši e bego e ba beile metseng yeo e šireleditšwego nageng ya Juda ka moka.