Puku ya Bobedi ya Dikoronika
15 Bjale moya wa Modimo wa tlela Asaria morwa wa Odede. 2 Ka gona o ile a ya a kopana le Asa gomme a re go yena: “Wena Asa le Bajuda ka moka le Babenjamini, ntheetšeng! Jehofa o tla dula a na le lena ge feela le ka se mo tlogele, le gona ge le ka mo tsoma o tla dira gore le mo hwetše, eupša ge le ka mo tlogela, le yena o tla le tlogela. 3 Baisiraele ba feditše nako e telele ba sa hlankele Modimo wa nnete, ba se na moperisita yo a ba rutago ebile ba se na Molao. 4 Eupša ge ba be ba le mathateng ba ile ba boela go Jehofa Modimo wa Isiraele, gomme ba mo tsoma ke moka yena a dira gore ba mo hwetše. 5 Dinakong tšeo, motho o be a ka se kgone gore a sepele a šireletšegile* ge a tšea leeto ka gobane go be go na le tlhakatlhakano e kgolo gare ga badudi ka moka bao ba dulago dinageng tšeo. 6 Setšhaba se be se fedišwa ke setšhaba se sengwe gomme motse o be o fedišwa ke motse o mongwe, ka gobane Modimo o be a ba hlakahlakantšhitše ka mathata a mehutahuta. 7 Eupša lena ebang le sebete ebile le se ke la nyama ka gobane le tla putswa ka baka la dilo tšeo le di dirago.”
8 Gateetee ge Asa a se na go kwa mantšu a le dilo tšeo di porofetilwego ke moporofeta Odede, o ile a bontšha gore o na le sebete gomme a tloša medingwana ka moka e šišimišago nageng ka moka ya Juda le ya Benjamini gotee le metseng yeo a bego a e thopile, yeo e bego e le tikologong ya dithabeng tša Efuraime gomme a tsošološa aletare ya Jehofa yeo e bego e le pele ga mathudi a ntlo ya Jehofa. 9 Le gona o ile a kgoboketša Juda ka moka le Benjamini gotee le batho bao ba bego ba sa tšwe moo, e lego batho bao ba bego ba etšwa go Efuraime, Manase le go Simeone, ka gobane ba be ba tšhabetše go yena ba etšwa ba le Isiraele e le ba bantšhi ge ba bona gore Jehofa Modimo wa gagwe o be a na le yena. 10 Ka gona ka kgwedi ya boraro ya ngwaga wa bo-15 wa ge Asa a buša, ba ile ba kgobokana Jerusalema. 11 Ke moka letšatšing leo ba ile ba direla Jehofa dihlabelo ka dikgomo tše 700 (makgolo a šupago) le dinku tše 7 000 (dikete tše šupago) tšeo ba tlilego le tšona ka morago ga gore ba fenye ntweng. 12 Go oketša moo, ba ile ba dira kgwerano ya gore ba tla tsoma Jehofa Modimo wa borakgolokhukhu ba bona ka dipelo tša bona ka moka le ka meoya* ya bona ka moka. 13 Motho yo mongwe le yo mongwe yo a bego a ka se tsome Jehofa Modimo wa Isiraele o be a swanetše gore a bolawe, go sa šetšwe gore ke yo mogolo goba ke yo monyenyane, ke monna goba ke mosadi. 14 Ka gona ba enela Jehofa ka go hlaboša, ba goeletša ba thabile ebile ba letša diphalafala le dinaka. 15 Bajuda ka moka ba ile ba thabišwa ke keno yeo ba e dirilego, ka gobane ba be ba e dirile ka dipelo tša bona ka moka, gomme ba mo tsoma ka mafolofolo ke moka yena a dira gore ba mo hwetše. Ka gona Jehofa a dira gore ba phele ka khutšo go gongwe le go gongwe moo ba lego gona.
16 Kgoši Asa o ile a tloša le makgolo wa gagwe e lego Maaka maemong a gagwe e le gore a se sa ba mohumagadi yo a hlomphegago, ka gobane o be a dirile modingwana wo o šišimišago wo o dirišwago borapeding bja kota e kgethwa.* Asa o ile a rema modingwana woo gomme a o fiša Moeding wa Kidirone. 17 Eupša mafelo a phagamego ao go rapelwago go ona ga se a ka a fedišwa Isiraeleng. Le ge go le bjalo, Asa o be a rata Modimo ka pelo ya gagwe ka moka matšatšing ka moka a ge a be a sa phela. 18 O ile a tšea dilo tšeo yena le tatagwe ba bego ba di kgethagaditše, a di iša ka ntlong ya Modimo wa nnete. Dilo tšeo e be e le silifera, gauta le dibjana tša go fapafapana. 19 Ga se gwa ka gwa ba le ntwa go fihlela ka ngwaga wa bo-35 wa ge Asa a buša.