Puku ya Pele ya Dikoronika
18 Ka morago ga nako Dafida o ile a lwa le Bafilisita gomme a ba fenya, a ba tšeela Gathe le metse ya yona yeo e e dikologilego. 2 Ke moka a fenya Bamoaba gomme ya ba bahlanka ba gagwe, ka gona ba mo tlišetša dimpho.
3 Dafida a fenya Kgoši Hadadesere wa Tsoba kgauswi le Hamathi ge a be a eya go hloma mmušo wa gagwe Nokeng ya Eforate. 4 Dafida o ile a thopa dikariki tša ntwa tše 1 000 (sekete), banamedi ba dipere ba 7 000 (dikete tše šupago) gotee le mašole a 20 000 (dikete tše masomepedi) ao a sepelago ka maoto. Ke moka a kgaola mešifa ya maotong ya dipere tše dingwe ka moka tšeo di gogago dikariki tša ntwa, eupša a šadiša dipere tše 100 feela. 5 Ge Basiria ba Damaseko ba etla go thuša Kgoši Hadadesere wa Tsoba, Dafida o ile a bolaya banna ba Basiria ba 22 000 (dikete tše masomepedi-pedi.) 6 Ke moka Dafida a bea mašole kua Siria ya Damaseko, Basiria ya ba bahlanka ba Dafida gomme ba mo tlišetša dimpho. Jehofa o be a dula a thuša Dafida go fenya kae le kae moo a bego a eya gona. 7 Le gona, Dafida a tšea dikotse tša gauta tša dinkgokolo tšeo di bego di swerwe ke bahlanka ba Hadadesere gomme a di tliša Jerusalema. 8 Dafida o ile a tšea koporo e ntšhi kudu metseng ya Hadadesere, e lego motse wa Thibehathe le wa Kuni. Solomone o ile a diriša koporo yeo go dira sebjana se segologolo sa koporo seo se bitšwago Lewatle, a dira le diphilara le dibjana tša koporo.
9 Ge Kgoši Tou wa Hamathi a ekwa gore Dafida o fentše mašole ka moka a Kgoši Hadadesere wa Tsoba, 10 o ile a napa a roma Hadorama morwa wa gagwe go Kgoši Dafida gore a yo mmotšiša gore bophelo bo ya bjang le go mo lebogiša ka gobane o lwele le Hadadesere a ba a mo fenya, (ka gore Hadadesere o be a kile a lwa gantšhi le Tou). Le gona o ile a mo tlišetša dilo ka moka tša mehutahuta tša go dirwa ka gauta, ka silifera le ka koporo. 11 Kgoši Dafida o ile a tšea dilo tšeo gomme a di nea Jehofa, a ba a tšea le silifera le gauta tšeo a di tšerego ditšhabeng tše dingwe ka moka tšeo a bego a di fentše, e lego Edomo, Moaba, tšeo a di tšerego go Baamoni, go Bafilisita le go Baamaleke.
12 Abishai morwa wa Tseruya o ile a bolaya Baedomo ba 18 000 (dikete tše lesomeseswai) Moeding wa Letswai. 13 O ile a bea mašole kua Edomo gomme Baedomo ka moka e ile ya ba bahlanka ba Dafida. Jehofa o ile a dula a thuša Dafida go fenya kae le kae moo a bego a eya gona. 14 Dafida a buša Isiraele ka moka, gomme a kgonthišetša gore setšhaba sa gagwe ka moka se swarwa ka toka le ka go loka. 15 Joaba morwa wa Tseruya e be e le molaodi wa mašole gomme Jehoshafate morwa wa Ahiludi o be a ngwala dilo tšeo di diregago. 16 Tsadoko morwa wa Ahitubo le Ahimeleke morwa wa Abiathara e be e le baperisita gomme Shafusha e le mongwaledi. 17 Benaya morwa wa Jehoyada e be e le molaodi wa Bakereta le Bapelethe. Barwa ba Dafida bona ba be ba mo latela ka maemo.