Puku ya Pele ya Dikoronika
10 Bafilisita ba ile ba lwa le Baisiraele gomme mašole a Baisiraele a tšhaba Bafilisita. Baisiraele ba bantšhi ba ile ba bolaelwa Thabeng ya Giliboa. 2 Bafilisita ba hlasela Saulo le barwa ba gagwe, gomme ba bolaya barwa ba gagwe e lego Jonathane, Abinadaba le Malaki-shua. 3 Bafilisita ba ile ba lwa le Saulo kudu. Mafelelong batho bao ba bego ba thuntšha mesebe ka bora ba mo hwetša ke moka ba mo gobatša. 4 Ke moka Saulo a botša morwadi wa dibetša tša gagwe a re: “Tšea sabola ya gago o mpheleletše ka yona, e le gore banna ba ba go se bolle ba se tle ba nkgoboša.” Eupša morwadi wa dibetša tša gagwe yena o be a sa nyake go dira seo ka gobane o be a boifa o šoro. Ka gona Saulo a tšea sabola a itahlela godimo ga yona. 5 Ge morwadi wa dibetša tša Saulo a bona gore Saulo o hwile, le yena a itahlela godimo ga sabola ya gagwe a hwa. 6 Saulo le barwa ba gagwe ba bararo le batho ka moka ba ntlo ya gagwe bao ba bego ba na le yena ba ile ba hwa. 7 Ge Baisiraele ka moka bao ba bego ba le moeding ba bona gore batho ka moka ba tšhabile le gore Saulo le barwa ba gagwe ba hwile, ba ile ba tlogela metse ya bona gomme ba tšhaba. Ka morago ga moo, Bafilisita ba tla ba dula metseng yeo.
8 Letšatšing le le latelago, ge Bafilisita ba etla go utswa dilo tša batho bao ba bolailwego, ba ile ba hwetša Saulo le barwa ba gagwe ba hwile Thabeng ya Giliboa. 9 Ba ile ba mo tšeela dilo tšeo a bego a na le tšona, ba mo kgaola hlogo gomme ba tšea le dibetša tša gagwe ke moka ba romela molaetša nageng ka moka ya Bafilisita gore Bafilisita ba tsebiše medingwana ya bona le setšhaba taba yeo. 10 Ke moka ba bea dibetša tša gagwe ka ntlong ya modingwana wa bona, gomme ba bofelela hlogo ya gagwe ka ntlong ya Dagoni.
11 Ge batho ka moka bao ba dulago Jabeshe yeo e lego Gileada ba ekwa ka dilo ka moka tšeo Bafilisita ba di dirilego Saulo, 12 mašole ka moka a matla a ya a tšea setopo sa Saulo le ditopo tša barwa ba gagwe. A di tliša Jabeshe ke moka a bolokela marapo a bona ka tlase ga mohlare o mogolo kua Jabeshe gomme mašole ao a ikona dijo ka matšatši a šupago.
13 Ka gona Saulo o ile a hwa ka ge a ile a se botegele Jehofa ka gobane o ile a se kwe seo Jehofa a se boletšego, le ka ge a ile a ya go botšiša motho yo a dirišanago le meoya e mebe 14 go e na le go botšiša Jehofa. Ka gona o ile a mmolaya gomme a nea Dafida morwa wa Jese bogoši.