Puku ya Bobedi ya Samuele
24 Jehofa a galefela Isiraele gape ge motho yo mongwe a be a hlohleletša Dafida a re: “Sepela o yo bala Baisiraele le Bajuda.” 2 Ke moka kgoši ya bolela le Joaba molaodi yo mogolo wa mašole a Isiraele ya re: “Hle eyang go meloko ka moka ya Isiraele go tloga Dani go ya Beresheba, le bale batho e le gore ke tsebe gore ke ba bakae.” 3 Eupša Joaba a re go kgoši: “Anke Jehofa a oketše batho ka makga a 100 gomme wena kgoši mong wa ka o bone seo. Eupša ke kgopela go botšiša, ke ka baka la eng wena kgoši mong wa ka o nyaka go dira selo sa mohuta wo?”
4 Eupša kgoši ya gana go theetša Joaba le balaodi ba mašole. Ka gona, Joaba le balaodi ba mašole ba tloga moo pele ga kgoši gomme ba ya go bala batho ba Isiraele. 5 Ba ile ba tshela Noka ya Jorodane gomme ba kampa kua Aroere ka lehlakoreng le letona la motse wo o bego o le gare ga moedi ke moka ba leba nageng ya Bagada ka morago ba ya Jatsera. 6 Ka morago ga moo, ba ya Gileada le nageng ya Tahatimi-hodishi, ka morago ba ya Dani-jaani ke moka ba dikologa ba ya Sidone. 7 Ka morago ba ya lefelong leo le šireletšegilego motseng wa Tiro le metseng ka moka ya Bahefe le ya Bakanana gomme ba feleletša ba fihlile Negebe ya Juda kua Beresheba. 8 Ka gona ba sepela nageng ka moka gomme ba fihla Jerusalema ka morago ga dikgwedi tše senyane le matšatši a 20. 9 Ke moka Joaba a fa kgoši palo ya bao ba badilwego. Isiraele e be e na le mašole a matla ao a itlhamilego ka disabola a 800 000 mola Juda yona e be e na le a 500 000.
10 Eupša Dafida a bethwa ke letswalo ka morago ga gore a bale batho. Ke moka a re go Jehofa: “Ke dirile sebe se segolo kudu ka go bala batho. Bjale hle Jehofa ke kgopela gore o ntebalele nna mohlanka wa gago ka gobane ke dirile bošilo bja mafelelo.” 11 Ge Dafida a tsoga mesong, Jehofa o ile a bolela le moporofeta Gada, mmoni wa Dafida, a re: 12 “Eya go Dafida o mmotše gore: ‘Jehofa o re: “Ke go tlišetša dikotlo tše tharo. Ikgethele yeo o nyakago ke go tlišetša yona.”’” 13 Ka gona Gada a ya go Dafida gomme a re go yena: “Na o kgetha gore nageng ya gago go be le tlala ka mengwaga e šupago goba na o kgetha gore o fetše dikgwedi tše tharo o tšhabela manaba a gago ao a go rakedišago, goba na o kgetha gore nageng ya gago go fele matšatši a mararo go na le bolwetši bjo bo bolayago? Bjale naganišiša gabotse seo ke swanetšego go se botša yo a nthomilego.” 14 Ka gona Dafida a re go Gada: “Ke tlaletšwe kudu. Hle anke re se ke ra otlwa ke motho eupša re otlwe ke Jehofa, ka gobane o tla re kwela bohloko kudu.”
15 Ke moka Jehofa a tliša bolwetši bjo bo bolayago Isiraeleng go tloga mesong go fihla nakong e beilwego, moo go ilego gwa hwa batho ba 70 000 go tloga Dani go fihla Beresheba. 16 Ge morongwa a be a otlolla letsogo la gagwe gore a fediše badudi ba Jerusalema, Jehofa o ile a itshola* ka baka la masetlapelo ao, ke moka a botša morongwa yoo a bego a tlile go fediša batho a re: “Go lekane! Tlogela go ba fediša.” Morongwa wa Jehofa o be a le kgauswi le seboa* sa Arauna wa Mojebusi.
17 Ge Dafida a bona morongwa yo a bego a bolaya batho, o ile a re go Jehofa: “Ke nna ke dirilego sebe, ebile ke nna ke dirilego phošo. Bjale batho ba bona ba dirile eng?* Hle anke o otle nna le ba lapa la tate.”
18 Ka morago Gada a tla go Dafida letšatšing leo gomme a re go yena: “Rotoga o yo agela Jehofa aletare seboeng sa Arauna wa Mojebusi.” 19 Ka gona Dafida a phetha taelo ya Jehofa yeo a e boletšego a diriša Gada. 20 Ge Arauna a lebelela fase a bona kgoši le bahlanka ba yona ba etla go yena, gateetee a tšwa gomme a khunama hlogo ya gagwe e kgwathile fase go bontšha gore o hlompha kgoši. 21 Ke moka Arauna a re: “Ke ka baka la eng kgoši mong wa ka a tlile go nna mohlanka wa gagwe?” Dafida a re: “Ke tlile go reka seboa go wena gore ke agele Jehofa aletare, e le gore kotlo yeo e wetšego batho, e kgaotšwe.” 22 Eupša Arauna a re go Dafida: “Anke kgoši mong wa ka a itšeele sona gomme a direle Modimo sehlabelo. Ke go fa le dikgomo gore e be sebego sa go fišwa le selei* sa go fola le dijoko tša dikgomo gore e be dikgong. 23 Nna Arauna, ke nea wena kgoši dilo tše ka moka.” Arauna a buša a re go kgoši: “Anke Jehofa Modimo wa gago a go šegofatše.”
24 Eupša kgoši ya re go Arauna: “Aowa, o swanetše gore o nthekišetše tšona, nka se direle Jehofa Modimo wa ka dihlabelo tša go fišwa ka dilo tšeo ke sego ka di reka.” Ka gona, Dafida a reka seboa* le dikgomo ka dishekele* tša silifera tše 50. 25 Ke moka Dafida a agela Jehofa aletare gona moo gomme a neela dihlabelo tša go fišwa le tša go dira khutšo le Modimo.* Ka gona, Jehofa a kwa thapelo ya Dafida ge a be a rapelela setšhaba. Ke ka baka leo a ilego a se sa bolaya Baisiraele ka bolwetši bjo a bego a bo tlišitše nageng.