Nkhani ya Solomo yuonesha zingacitikile mtumiki aliyense wa Yehova ngati angasamale lini. Yove angacite cimo ikulu ndipo pavuli pake angaone kuti zonse zecitika “mosayembekezeleka.” Olo payakine angalaŵile kuti “zengocitika mwangozi.” Koma ngati angaganizile mosamala, angazindikile kuti etola masitepu olakwika amene ecitisha kuti acite cimo ikulu. Payakine esankha ashamwali amene enzokonda lini Yehova olo payakine zinthu zosangulusha zecisankha, mawebusaiti na malo zenze lini zabwino kwa Mkhristu. Kuyangizhyila apo, payakine enze eleka kupemphela, kuŵelenga Baibo, kupezeka pa misonkhano olo kutolamo mbali mu utumiki. Tetyo, mlumbwana wofotokozewa m’buku ya Miyambo ecita cimo ikulu cifukwa ca zosankha ziipa zecipanga. Kansi tuphunzilapo cinji? Tuphunzilapo kuti tufunika lini tyala kupewa cimo, koma tufunika soti kupewa zinthu zamene zingatipangishe kucita cimo. Solomo emvwikisha mfundo iyi pavuli pofotokoza za cocitika cila.—Mat. 5:​29, 30. w24.07 16 ¶10-11

Kansi cuma cupanamila cinji? Cupanamila nchito yopulumusa miyoyo, yamene ni kulalikila uthenga wa Ufumu. (2 Akor. 4:1) Nanga viya va lito vupanamila cinji? Vupanamila atumiki a Mulungu amene olalikila ayakine uthenga uweme. M’nthawi ya Paulo, ocita zamalonda enzoseŵenzesha manongo alito kuti anyamulilemo vinthu va mtengo wapatali monga vakulya, vinyu na ndalama. Molingana na izi, Yehova watipasa nchito yofunika ngako yamene ni kulalikila uthenga uweme. Ndipo na thandizo yake, tingankhale na mphamvu zatufunikila kuti tikwanishe kucita nchito iyi mokhulupilika. Nthawi ziyakine, mungacite wowa poganiza kuti ŵanthu akususheni na kuti amvwishile lini uthenga wanu. Koma kansi n’cinji cingakuyavyeni kugonjesa wowa uyu? Ganizilani pemphelo yecipeleka atumwi, pa nthawi yecilamuliwa kuti aleke kulalikila. M’malo mocita wowa, esenga Yehova kuti aŵayavye kupitilizhya kulaŵila motang’a mtima. Ndipo nthawi yamene iyo, Yehova eyankha pemphelo yao. (Mac. 4:​18, 29, 31) Ngati nthawi ziyakine mucita wowa, mukomusenga kuti atang’ishe cikondi canu pa yove na ŵanthu na colinga cakuti mukwanishe kulalikila uthenga uweme. w24.04 16 ¶8-9

Cikondi casu pa Yehova cutisonkhezela kutuŵisha zina yake. Tufuna kutolako mbali pa kutuŵisha zina yake ku wenye wa Satana. (Gen. 3:​1-5; Yobu 2:4; Yoh. 8:44) Kupitila mu nchito yolalikila, tunkhala ofunishisha kunkhala ku mbali ya Mulungu nouzhya ŵanthu amene ni okonzeka kumvwishila zokhuza Mulungu na cendi cokhuza yove. Tufuna kuti aliyense aziŵe kuti nkhalidwe yake ikulu ni cikondi, ulamulilo wake ni wacilungamo na kuti lombapano Ufumu wake usilizhye mavuto noleta mtendele na cimwemwe ku ŵanthu. (Sal. 37:​10, 11, 29; 1 Yoh. 4:8) Tikauzhyako ŵanthu zokhuza Yehova, tutuŵisha zina yake. Tunkhala soti osangalala cifukwa tuziŵa kuti tucita zatufunika kucita monga Mboni za Yehova. w24.05 18 ¶12