ESOMO 15
Yesu nindi?
Yesu ni mughuma w’oko bandu abasibwe kutsibu omo historia. Abandu bangyi basi erina lya Yesu, aliwe sibasi okw’iye ko myatsi mingyi. N’abandi bandu bangyi bakalengekanaya oko Yesu k’omo syonzira esisighene. EBiblia ikatubwiraki oko Yesu?
1. Yesu nindi?
Yesu ni mumalaika w’obutoki, ikere elubula. Yehova Mungu mwahangyika Yesu embere sy’erihangyika ekindu kyosi-kyosi. Busana n’ekyo akahulawamo ‘kambere k’ebihangyikwa byosi.’ (Abanya Kolosai 1:15) EBiblia ikakanaya oko Yesu mo ‘Mughala w’oMungu ekyusa kiwe’ kundi Yehova iyuwene-wene yo wahangyika Yesu. (Yoane 3:16) Yesu mwakola haghuma na Tata wiwe Yehova akamuwatikya erihangyika ebindi bindu. (Soma Emisyo 8:30.) Yesu akayitsinga eribya n’obwira obuwene haghuma na Yehova. Akakola butaleghula ng’omubuyi w’oMungu kutse “Ekinywa,” omwitwalira abandi b’emilaghe n’amahano w’oMungu.—Yoane 1:14.
2. Yesu asa oko kihugho ko busanaki?
Hamabilaba emyaka hakuhi 2 000, omo nzira y’ekitiko-tiko Yehova mwakolesya akaghala kiwe kabuyirire erihumirya engebe ya Yesu erilua elubula omo nda ya Maria omukali oyo wabya isyalyataminya omulume. Neryo Yesu mwabutwa mo mundu. (Soma Luka 1:34, 35.) Yesu mwasa oko kihugho abye Masiya oyo walaghawa kutse Kristo atoke erisabula abandu.a Amaminyereri wosi awalebirye Masiya mwabererera oko Yesu, ekyo mukyawatikya eriminya Yesu “mo Kristo oMughala w’oMungu oyuliho.”—Matayo 16:16.
3. Lino Yesu ali hayi?
Enyuma sy’erihola ng’omundu, Yesu mwalubukibwa n’omubiri w’ekimalaika, neryo amasuba elubula. Elubula, ’oMungu mwamuha olukengerwa lunene kutsibu.’ (Abanya Filipi 2:9, NWT) Lino, Yesu ni mumalaika w’obutoki bunene.—Yehova musa yuli n’obutoki bunene kumulenga.
WIGHE BINGYI
Uminye kwenene Yesu nga nindi kandi n’erigha okwiye nga ni ry’omughaso busanaki.
4. Yesu si Mungu w’obutoki bosi
EBiblia ikakangiriraya yiti nomo Yesu ane mumalaika w’obutoki elubula, akayikehaya oko Mungu wiwe kandi Tata wiwe, Yehova. Tukabugha tutya busanaki? Mulebaye EVIDEO erilangira ngoko Biblia ikakanganaya yiti Yesu na Tata wiwe ni bandu babiri abatalingirirene oko butoki.
Amasako awakwamire akatuwatikaya erilangira ngoko Yehova na Yesu ni bandu babiri abasighene. Musome obuli risako neryo musubiraye oko mabulyo awakwamire.
Musome Luka 1:30-32.
Omumalaika mwakangania ati ngoko Yesu na Yehova Mungu “ow’Endata Kutsibu” ni bandu babiri abasighene?
Musome Matayo 3:16, 17.
Omughulu Yesu abatisibawa, elubula moyaluira omulenge owakabugha atiki?
Ukalengekanaya uti oyo abya mulenge wandi?
Musome Yoane 14:28.
Nindi yo wa kera kandi oyuwite ehamuli nene? Tata kutse mughala?
Yesu mwahula Yehova mo Tata wiwe, ekyo kikatukangirirayaki?
Musome Yoane 12:49.
Yesu analengekenie ati iye na Tata wiwe ni mundu mughuma? Ukalengekanaya utiki?
5. Ebikakanganaya ngoko Yesu yo Masiya
EBiblia irimo amaminyereri mangyi awakakanaya oko Masiya—nibughambu oyo Mungu abirisombola eriha abandu b’omulamo. Amaminyereri ayo mwawatikya abandu eriminya Masiya ng’abyandi. Mulebaye EVIDEO erilangira amaminyereri malebe awo Yesu aberereraya omughulu asa oko Kihugho.
Musome amaminyereri w’eBiblia aya, neryo musubiraye oko mabulyo awakwamire:
Musome Mika 5:2 eriminya eyo Masiya endibutirwa.b
Eributwa lya Yesu molyanaberererya obuminyereri obu?—Matayo 2:1.
Musome Esyonyimbo 34:20 ne Zekaria 12:10 erilangira ebyo eBiblia yabugha embere oko luholo lwa Masiya.
Amaminyereri aya mwanabererera?—Yoane 19:33-37.
Ukalengekanaya uti mwateghekania emyatsi y’embere atoke eriberereryayo?
Amaminyereri ayo akaleka iwaminyaki oko Yesu?
6. Tukabana endundi omwigha eriminya Yesu
EBiblia ikabugha yiti erigha eriminya Yesu n’ebyo oMungu anzire inyakola ni ry’omughaso munene. Musome Yoane 14:6 ne 17:3, neryo musubiraye oko ribulyo rino:
Busanaki erigha erminya Yesu ni ry’omughaso?
Yesu mwatukingulira enzira y’eribya bira b’oMungu. Mwakangirirya ekwenene y’oko Yehova, n’omo nzira yiwe, twanganabana engebe y’erikota
ABANDU BALEBE BAKABUGHA BATI: “Abimiri ba Yehova sibikirirye Yesu.”
Iwe wangasubirya utiki?
MUKIGHA MYATSI YAHI?
Yesu ni mumalaika w’obutoki. Ni Mughala w’oMungu kandi ni Masiya.
Eriyibukya
Busanaki Yesu akahulawamo “kambere k’ebihangyikwa byosi”?
Embere sy’eryasa oko kihugho Yesu mwakolaki?
Tukaminya tuti ngoko Yesu yo Masiya?
EBINDI EBY’ERIMINYA
Uminye bingyi oko ebikatuwatikaya eriminya ngoko Yesu yo Masiya.
“Amaminyereri awakakanaya oko Masiya akanakanganaya ngoko Yesu yo Masiya?” (Emyatsi y’oko jw.org)
Sonda eriminya eBiblia nga ikanakangiriraya yiti oMungu mwabya Tata wa Yesu ngoko abandu bakanabya n’abana.
“Busanaki Yesu akahulawamo mughala w’oMungu?” (Emyatsi y’oko jw.org)
Langira busanaki amakangirya w’Obusatu syahambene n’eBiblia.
Ulebaye ngoko engebe y’omundu mughuma moyabinduka enyuma sy’eriminya ebyo eBiblia ikakangiriraya oko Yesu.
a Omo somo 26 ne 27 tukendisyalangira abandu nga balaghire okwilamibwa busanaki kandi ngoko Yesu atuha omulamo.
b Ulebaye Endomeko 2 erilangira obuminyereri obwabugha embere omughulu owo Yesu endihika oko kihugho.