Musa mwasombola eriramya Yehova

E Misri, ab’omo kihanda kya Yakobo mubaminywa mo Baisraeli. Yakobo na Yozefu babere babihola, oghundi Farao mwatsuka eritabala. Mwasagha ati Abaisraeli balimwasa bakabya n’akaghala kanene kulenga Abamisri. Neryo Farao oyo mwayira Abaisraeli mo bakobe. Mwabakasa eribya bakakokotya esyombiriki n’erikola kutsibu omo malima. Aliwe, ngoko Abamisri babya bakakasa Abaisraeli erikola kutsibu, Abaisraeli nabo ibakabya ibanemukanya. Neryo kundi Farao mwatanza ekyo, mwahamula ati esyomekeke syosi sy’obulume esy’Abaisraeli esikabutawa sitawe. Uterilengekania obuba obo Abaisraeli babya nabo!

Omukali Omuisraeli oyukahulawamo Yokebedi mwabuta omwana w’obulume omubuya. Eritoka erimuteya, mwamuhira omo katiri, amakabisa omo lubingu oluli oko musike w’olusi lwe Nile. Mwali w’ab’olumekeke olo, ye Miriamu, mwasighala hakuhi erilebya ekikendibya.

Mwali wa Farao mwandaghala akayanabira omo lusi olo, neryo mwalangira akatiri ako. Mweya mw’olumekeke ilune mulira, neryo amalukwira obulighe. Miriamu mwabulya ati: ‘Nikusondere omukali oyo wangakulemberera omwana oyu?’ Mwali wa Farao abere aligha, Miriamu mwayenda mama w’olumekeke olo, ye Yokebedi. Mwali wa Farao mwamubwira ati: ‘Wimaye omwana oyu, unyilemberere iye, ngendisyakuliha.’

Omwana abere abirikula, Yokebedi mwamuletera mwali wa Farao, oyo wamuha erina Musa, neryo amamukulya ng’omwana wiwe. Musa mwakula ng’omughala w’omwami kandi iniakahabawa ekyosi-kyosi ekyo anzire. Aliwe Musa mwatibirirwa Yehova. Abya inianasi ngoko ni Muisraeli, butsira Mumisri. Neryo mwasombola erikolera Yehova.

Abere ayira emyaka 40, Musa mwasombola eriwatikya abandu babo. Kiro kighuma, mwalangira Omumisri akahunza omukobe Muisraeli, neryo Musa mwahunza Omumisri oyo, amahola. Musa mwabisa omubiri wiwe omo mutsanga. Farao abere aminya ekyo, mwanza eriita Musa. Aliwe Musa mwatibitira omo kihugho kye Midiani. Yehova mwamuwatikya iniane eyo.