Busanaki Abimiri ba Yehova babiribindula amakangirirya wabo malebe?

Eritsuka kera, amakangirirya wetu wosi aseghemere eBiblia. Busana n’ekyo, omughulu tukatasyowa ndeke amakangirirya malebe w’eBiblia, tukabindula ebyo tulwe twikirirye kugho.a

Ekyo kihambene n’akanuni akakabanika omo Emisyo 4:18, akakabugha kati: “Nikwa enzira yʼabatunganene iri ngʼekyakakala kyʼomwitsange, ekikakoleraya nʼerikanya erihika oko kiro kiyima-yima.” Ngoko ekyakakala ky’omwitsange kikakoleraya lyolo-lyolo neryo itwasa tukalangira ndeke obulambo, oMungu naye akakoleraya lyolo-lyolo eryowa ryetu amakangirirya w’Ekinywa kiwe, kandi oko mughulu ow’atolere. (1 Petro 1:10-12) EBiblia muyabugha embere ngoko akendisyakanyirirya ekyakakala ekyo “oko mugulu wʼenduli yʼemigulu.”​—Danieli 12:4.

Eribindula amakangirirya wetu sikitolere ikyatuswekya kutse ekyatudunga. Abaghombe ba kera b’oMungu nabo, mubanowa muhanda amakangirirya malebe, n’eribya n’erilindilira eritatolere. Mukyabasaba eritasyabindula amalengekania wabo.

• Musa mwayisogha erisabula ekihanda kye Israeli emyaka 40 embere sy’ekiro eky’oMungu abya inyabirihiraho.​—Emibiiri y’Abakwenda 7:23-25, 30, 35.

• Abakwenda mubatowa obuminyereri obwabya bukakania oko luholo lwa Masiya n’erilubuka liwe.​—Isaya 53:8-12; Matayo 16:21-23.

• Oko Bakristo b’erimbere muhabya abalebe abayiteba oko mighulu eyo “ekiro kya Yehova” ky’endihikirako.​—2 Abanya Tesalonika 2:1, 2.

Enyuma, oMungu mwabawatikya eryowa emyatsi eyo yo ndeke. Netu, tukasaba tuti alole embere eritukolera atya.​—Yakobo 1:5.