ESOMO 05
EBiblia ni mulaghe w’oMungu okwitwe
Yehova abirituha ekihembo kibuya kundu, eBiblia. Yiri mw’ebitabu bikebike 66. Nikwa wanganayibulya uti: ‘EBiblia yalua hayi? Ni kitabu kyandi?’ Erisubirya oko mabulyo ayo, uleke twighe ngoko omulaghe w’eBiblia atuhikira.
1. Abandu bo bahandika eBiblia, neryo busanaki tukabugha tuti ni kitabu ky’oMungu?
EBiblia yahandikawa n’abandu hakuhi 40 omo mughulu w’emyaka hakuhi 1 600, eritsuka oko mwaka 1513 M.M.W. erihika hakuhi oko omwaka 98 M.W. Kandi abahandika eBiblia sibabyaho oko mughulu mughumerera. Nomo yanahandikawa n’abandu mbiriri-mbiriri, eBiblia yosi yiri omo bughuma. Ekyo kikatokekana kiti? Kundi eBiblia ni kitabu ky’oMungu. (Soma 1 Abanya Tesalonika 2:13.) Abahandikayo mobatahandika amalengekania wabo. Aliwe abandu ‘mobabugha ebyo oMungu ahabo bakasondolibwa n’ekirimu kibuyirire.’a (2 Petero 1:21) OMungu mwakolesya ekirimu kibuyirire erisondola, kutse erikuna abandu erihandika amalengekania wiwe.—2 Timoteo 3:16.
2. Nindi yo wangabana eBiblia n’erisomayo?
Engulu mbuya eyikabanika omo Biblia yanganawatikya abandu ‘b’obuli kitunga ky’abandu, obuli kihanda, n’obuli mubughe.’ (Soma Eribisulirwa 14:6.) Kundi eBiblia ni kitabu ky’oMungu, yikabanika omo mibughe mingyi kulenga ebindi bitabu byosi omo historia. Munabwire, hakuhi obuli mundu anganahulikirira omulaghe owakabanika omo Biblia. Ekyo kitokekene n’omo abandu bangabya omo kihugho kyahi kutse n’omo bangabugha mubughe wahi.
3. Yehova mwateya eBiblia yo ati?
EBiblia yahandikawa oko bindu ebitebugha mughulu muli, ng’esyongobi sy’esyonyama. Aliwe, mohabya abandu abanzire eBiblia; mobahandikayo n’erisubirira erihandikayo ngendo-ngendo omo byala ikasyabulirana. Nomo hanabya abatabali n’abasondoli balebe b’ebisomo ababya bakasonda eribughaho eBiblia, mohabya abandi bandu abahira engebe yabo y’omo bwiko batoke eriteyayo. Yehova syalyataligha ati omundu wosi-wosi kutse ekindu kyosi-kyosi kimukakiraye erikania netu. EBiblia ikabugha yiti: “Ekinywa ky’oMungu kikabyaho kera na kera.”—Isaya 40:8, NWT.
WIGHE BINGYI
Wighe bingyi ngoko oMungu asondola abahandika eBiblia, ngoko ateghayayo, n’ekyo akola itoke erihikira abandu.
4. EBiblia ikatubisulira omwenyeyo
Mulebaye EVIDEO. Neryo musome 2 Timoteo 3:16, n’erisubirya oko mabulyo awakwamire.
Abandu bamabya ibobahandika eBiblia, busanaki yikahulawamo Kinywa ky’oMungu?
Naghu unikirirye ngoko oMungu mwakolesya abandu batoke erihandika amalengekania wiwe?
Omusekretere anganahandika ebaruha, aliwe emyatsi eyirimo yikalua oko mundu oyulyamubwirayo. Kutya, abandu mobahandika eBiblia, aliwe emyatsi eyo bahandika yalua oko Mungu
5. Abandu abasonda eribughaho eBiblia mobataluka
EBiblia yamabya ini kitabu ky’oMungu, syangataluka eriteyayo. Omo historia yosi, abandu b’ehamuli mobasonda eribughaho eBiblia. Abasondoli b’ebisomo babya ibakabisayo. Abandu bangyi mobahira engebe yabo y’omo bwiko batoke eriteya eBiblia nomo banabya bakendereribwa, kandi n’omo esyonzighu syabo syasonda eribita. Erigha oko mughuma w’abandu abo, Mulebaye EVIDEO, n’erisubirya oko mabulyo awakwamire.
Eriminya ngoko abandu bahira engebe yabo y’omo bwiko busana n’eriteya eBiblia, lyanamaleka iwanza erisomayo?
Musome Esyonyimbo 119:97, neryo musubiraye oko ribulyo rino:
Ekyakuna abandu bangyi erihira engebe yabo y’omo bwiko batoke eribindula n’erighabira abandu b’esyo Biblia niki?
6. Ekitabu busana n’abandu bosi
Omo historia yosi eBiblia ky’ekitabu ekyabiribindulwa n’erighabirwa abandu bangyi kulenga ebindi byosi. Musome Emibiri 10:34, 35, neryo musubiraye oko amabulyo ano:
Busanaki oMungu anzire ekitabu kiwe ikyabindulwa omo mibughe mingyi n’erighabirwa abandu bangyi kutsibu?
Ni myatsi yahi yo yikaleka iwatsemera eBiblia?
Hakuhi
abandu bosi
b’omo kihugho
banganasoma eBiblia y’omo mubughe owo bakowa
Ikabanika omo mibughe kulenga
3 000
EBiblia
yosi kutse mo kihande
5 000 000 000
Emighanzo y’esyo Biblia esyabiritsapisibwa,
silengire kutsibu emighanzo y’ebindi bitabu
ABANDU BALEBE BAKABUGHA BATI: “EBiblia ni kitabu kya kera kandi kyahandikawa n’abandu.”
Naghu ukalengakanayaki?
Ni myatsi yahi eyikakanganaya ngoko eBiblia ni kitabu ky’oMungu?
MUKIGHA MYATSI YAHI?
EBiblia ni kitabu ky’oMungu, kandi mwakolesya akaghala kiwe kitoke erihikira abandu bosi.
Eriyibukya
Eribugha tuti oMungu mwasondola abandu erihandika eBiblia, liri na maana ki?
Ekikakuswekaya niki ukalangira ngoko eBiblia yateghibawa, ngoko ikaghabirawa abandu bangyi kandi ngoko ikabindulawa omo mibughe mingyi?
Ukayowa wuti eriminya ngoko oMungu mwakola emyatsi yosi eyi atoke eribya akakania nawu?
EBINDI EBY’ERIMINYA
Usome ehistoria y’eBiblia—eritsuka ngoko yabya ikahandikwa kera erihika oko syo tafsiri sy’eBiblia esya munabwire.
Lebaya ngoko eBiblia yabala ngendo isatu oko basonda eribugha yoho.
“Ehistoria y’eriteghibwa ly’eBiblia” (Munara wa Mulinzi Na. 4 2016)
SUlebaye ngoko abandi bandu bahira engebe yabo y’omo bwiko busana n’eribindula eBiblia omo yindi mibughe.
EBiblia yabirihandikwa n’eribindulwa kangyi-kangyi omo yindi mibughe. Busanaki twanganikirirya ngoko omulaghe w’oMungu mwateyibwa ndeke?
“EBiblia yabirihindulwa kutse eritsandibwa?” (Emyatsi y’oko jw.org)