Omukulu w’abasuda n’akambesa

E Siria yabya akambesa Akaisraeli akabya hali oko kihanda kyabo. Kabya ikabirihekwa n’abasuda be Siria, neryo mukabya kakobe k’omukali w’omukulu w’abasuda oyukahulawa mo Naamani. Akambesa kalere ako kabya kakaramya Yehova nomo ab’aho kabya kikere isibalimuramaya.

Naamani abya alwere ebihagha (obukoni obukalire b’oko ngobi), neryo iniakabya inianemowa obulumi. Akambesa ako mukanza erimuwatikya. Mukabwira mukali wa Naamani kati: ‘Ninasi oyo wangalamya mwira waghu. E Israeli, yine omuminyereri wa Yehova oyukahulawa mo Elisha. Anganalamya mwira waghu.’

Omukali wa Naamani mwamubwira ebyo akambesa ako kalyabugha. Naamani abya inianayiteghekire erikola ekyosi-kyosi anamatalama, neryo mwaghenda omo nyumba ya Elisha e Israeli. Naamani mwalengekania ati Elisha akendimukokya ng’omundu w’olukengerwa. Aliwe omo mwanya w’erikania naye iyuwene-wene, Elisha mwatuma omughombe wiwe eriyakania na Naamani n’erimubwira eky’erikola. Mwayamubwira ati: ‘Ughende uyanabire omo Yordani mo ngendo 7. Neryo ukendilama.’

Naamani mwahitana kutsibu n’eribugha ati: ‘Nilue niasi niti omuminyereri oyu akendinilamya omwisaba oko Mungu wiwe n’erinilamya omwinihira kw’ebyala biwe lisa. Aliwe, akambwira ati nighende omo lusi olu omo Israeli. Tunawite esyonyusi esyuwene e Siria. Sinanganabira musyo?’ Naamani mwahitana, neryo mwalua omo nyumba ya Elisha.

Abaghombe ba Naamani mubamuwatikya eribya n’amalengekania awuwene. Mubamubwira bati: ‘Siwangakolire ekyosi-kyosi wanamatalama? Ekyo omuminyereri oyu akakubwira ati ukole kyolobire. Busanaki wamaghana erikikola?’ Naamani mwabahulikirira. Mwaghenda omo Lusi lwe Yordani n’eriyighusa omo maghetse mo ngendo 7. Oko ngendo ye 7, Naamani mwalua omo maghetse iniamabilama ndeke. Mwatsema kutsibu. Neryo mwaya eyiri Elisha eriyamusima. Naamani mwabugha ati: ‘Lino namabiminya ngoko Yehova yo Mungu w’ekwenene.’ Ukalengekanaya uti akambesa Akaisraeli mukayowa kati omughulu Naamani asuba eka iniabirilama?