Solomona amahimbira Yehova y’ehekalu

Solomona abere abibya mwami we Israeli, Yehova mwamubulya ati: “Wanzire inakuhaki?” Solomona mwasubirya ati: ‘Nikine mulere, kandi sinasi ekyo nangakola. Kisi umbe amenge nitoke erisondola abandu baghu.’ Yehova mwabugha ati: ‘Kundi wabirisaba amenge, ngendikuyira mo w’amenge omo kihugho. Kandi ngendikuyira mo muteke kutsibu. Kandi wamabiniowa, ighukendisyabyaho ebiro binene.’

Solomona mwatsuka erihimba ehekalu. Mwakolesya ehoro n’efeza, emiti, n’amabwe, ebyosi ibyuwene kutsibu. Amaelfu w’abalume n’abakali abasi ndeke erihimba mubakolera oko hekalu. Enyuma w’emyaka 7, ehekalu muyatolera erihererwa oko Yehova. Yabya mw’ekiherero, ekyabya kikahererwako obuhere. Solomona mwakukama embere sy’ekiherero n’erisaba ati: ‘Yehova, ehekalu eno si nene kutsibu kandi siyuwene kutsibu embere syaghu, aliwe kisi ligha eriramya n’erisaba lyetu.’ Yehova mwalengekania atiki oko hekalu eyo n’omusabe wa Solomona? Solomona abere abinabugha erisaba, omuliro mwalua elubula amahisya obuhere obwabya oko kiherero. Eki mukyakangania ngoko Yehova amaligha ehekalu. Abaisraeli babere balangira ekyo mubatsema kutsibu.

Omwami Solomona mwaminywa omo Israeli yosi nibya n’omo biharo by’ehali busana n’amenge wiwe. Abandu ibakasa eyiri Solomona atoke eribawatikya oko syombanza syabo. Nibya n’omwami-mukali we Sheba mwasa akasyamulengako omw’imubulya amabulyo awakala-kalire. Abere abyowa ebisubiryo biwe, mwabugha ati: ‘Munitaligha ebyo abandu babya bakambwira okw’iwe, aliwe lino namaligha ngoko nibya uwite amenge manene kulenga n’ebyo abandu babya bakabugha. OMungu waghu, Yehova, abirikutsumula.’ Ekihanda kye Israeli kyabya omo ngebe eyuwene kandi n’abandu ibatsemire. Aliwe emyatsi yabya ikasonda eribinduka.