Yehova amakania na Samweli

Eli, omuhereri mukulu abya awite abaghala biwe babiri ababya bahereri oko tabernakulo. Habya Hofni na Finehasi. Mubatakwama emighambo ya Yehova kandi ibakaghalaya abandu. Abaisraeli ibakabya baletera Yehova y’obuhere, Hofni na Finehasi ibakatsuka eriyisombolera mw’amaghabo awuwene kutsibu. Eli mwaminya ebyo abaghala biwe babya bakakola, aliwe mwatayira kindu. Yehova mwanaligha ekiri ng’ekyo erilola embere?

Nomo Samweli abya mulere kutsibu oko Hofni na Finehasi, mwatakola ng’abo. Yehova mwatsemera Samweli. Kiro kighuma, Samweli inianaghotsere, mwowa omundu akabirikira erina liwe. Samweli mwahangana n’eritibita eyiri Eli n’eribugha ati: “Ingye y’ono.” Aliwe Eli mwabugha ati: “Sinitakubirikira, usube omo ngyingo.” Samweli mwasuba omo ngyingo. Kandi mwowa omulenge. Samweli abere owa omulenge oyo engendo y’akasatu, Eli mwaminya ngoko Yehova yukabirikira Samweli. Eli mwabwira Samweli ati amatasyowa omulenge oyo iniabugha ati: “Yehova, kanaya, omughombe waghu anahulikirire.”

Samweli mwasuba omo ngyingo. Neryo kandi mwowa omulenge oyo ati: “Samweli! Samweli!” Mwasubirya ati: “Kanaya, omughombe waghu anahulikirire.” Yehova mwabugha naye ati: ‘Ubwire Eli uti ngendimuha amalipizi n’ekihanda kiwe. Anasi ebibi ebyo abaghala biwe banemukola omo tabernakulo yaghe, aliwe syatayira kindu.’ Omo tututu, Samweli mwakingula emilango y’etabernakulo ngoko anabya abeghere. Mwasagha eribwira omuhereri mukulu ebyo Yehova alyabugha. Aliwe Eli mwamubirikira n’erimubulya ati: ‘Mughala waghe, Yehova mwakakubwira atiki? Umbwire ebyosi.’ Neryo Samweli mwabwira Eli y’ebyosi.

Samweli abere anemukula, Yehova mwalola embere erimusondola. Omo kihugho kyosi kye Israeli, abandu bosi mubaminya ngoko Yehova abirisombola Samweli eribya muminyereri kandi mutsweri.