Obwami b’oMungu niki?

1. Obwami b’oMungu niki?

Obwami b’oMungu ni butabali obuli elubula. Bukendisyalusyaho awandi matabali awosi neryo ibwaleka erisonda ly’oMungu likoleke omo lubula n’oko kihugho. Engulu y’Obwami b’oMungu ni mbuya. Obwami b’oMungu bukisiya ibwaberererya engumbu y’abandu ey’obutabali obuwene. Bukendisyaleka abandu abosi abali oko kihugho ibabya omo bughuma.​—Usome Danieli 2:44; Matayo 6:9, 10; 24:14.

Obwami bwosi-bwosi butolere ibwabya n’omwami. Yehova mwasombola Mughala wiwe Yesu Kristo, abye Mwami w’Obwami bwiwe.​—Usome Eribisulirwa 11:15.

Lebaya evideo Obwami b’oMungu niki?

2. Busanaki Yesu yutolere eribya Mwami?

Mughala w’oMungu yutolere eribya Mwami kundi iye ni mundu mubuya, oyutunganene. (Matayo 11:28-30) Kandi awite obutoki bunene bw’eriwatikya abandu kundi akendisyatabala ekihugho iniane elubula. Abere abilubuka mwasuba elubula, neryo mwalinda inian’ikere oko luhande lw’amalyo lwa Yehova. (Abaebrania 10:12,13) Endambi muyahika, neryo oMungu mwamuha obutoki obw’eritsuka eritabala.​—Usome Danieli 7:13, 14.

3. Ni bahi abakendisyatabala na Yesu?

Endeko y’abandu abakahulawa mo ‘abandu b’oMungu [ababuyirire NWT]” bakendisyatabala haghuma na Yesu elubula. (Danieli 7:27) Ababuyirire abatsuka erisombolwa babya bakwenda ba Yesu abatereghula. Erihika na lino, Yehova anemusombola abalume n’abakali abatereghula babye babuyirire. Nga Yesu, bakalubuka omo mubiri w’ekirimu.​—Usome Yoane 14:1-3; 1 Abanya Korinto 15:42-44.

Ni bangahi abakendisyaghenda elubula? Yesu mwabugha ati ni “kihyo kike.” (Luka 12:32) Eribuyirira emighanzo yabo bakendisyahika 144 000. Bakendisyatabala ekihugho haghuma na Yesu.​—Usome Eribisulirwa 14:1.

4. Ni kyahi ekyabya omughulu Yesu atsuka eritabala?

Obwami b’oMungu bwatsuka eritabala oko mwaka we 1914.a Ekindu ekyo Yesu atsuka erikola ng’Omwami lyabya erighusa Sitani n’esyombinga siwe oko kihugho. Sitani mwahitana kutsibu neryo mwatsuka eridunga ekihugho. (Eribisulirwa 12:7-10, 12) Eritsuka oko mughulu oyo, amalighe abiribya manene oko kihugho. Amalwa, enzala, amakoni, emisikyi, ebyosi ebi ni bighuma by’oko ‘kiminyikalo’ ekikakanganaya ngoko hakisiya hake Obwami b’oMungu ibwasondola emyatsi yosi y’ekihugho.​—Soma Luka 21:7, 10, 11, 31.

5. Obwami b’OMungu bukakolaki lino?

Erilabira omubiri w’eritula engulu mbuya omo kihugho kyosi, Obwami b’OMungu bune mukuma-kuma endeko nene y’abandu erilwa omo bihanda byosi neryo ibabya bughuma. Abandu banene ab’omutima molo banemuligha obutabali bwa Yesu. Obwami b’oMungu bukendisyabateya omughulu bukasyatoghotaya abandu babi ba lino. Kwesi, abosi abanzire eringira omo Bwami b’oMungu litolere ibigha erikenga Yesu.​—Usome Eribisulirwa 7:9, 14, 16, 17.

Omo myaka 1 000, Obwami obo bukendisyaberererya erisonda ly’oMungu ly’erimbere. Ekihugho kyosi kikendisyabya paradiso. Oko nduli, Yesu akendisyasubulirya Tata wiwe y’Obwami. (1 Abanya Korinto 15:24-26) Unasi omundu wosi-wosi oyo wangakania naye oko Bwami b’oMungu?​—Usome Esyonyimbo 37:10, 11, 29.