Ekyaghanda Ekikasondola eky’Abimiri ba Yehova

Balikyetu Banzwa:

Itwe baramya ba Yehova, twanzire Ekinywa kiwe, eBiblia. Twikirirye ngoko kirimo ehistoria eyitemo makosa, kikatusondola ndeke omo ngebe, kandi kirimo emyatsi eyuwene eyikakanganaya ngoko Yehova anzire abandu. (Esyonyimbo 119:105; Luka 1:3; 1 Yohana 4:19) Twanzire kutsibu eriwatikya abandi erigha ekwenene y’obughuli eyiri omo Kinywa ky’oMungu. Busana n’ekyo, tuli n’obutseme bunene erihulukya ekitabu kino: “Ebyo twangigha omo Biblia.” Twanzire eribabwira emyatsi milebe oko kitabu eki.

Ekitabu eki mukikateghekanibawa kutsibu-tsibu busana n’abana. Aliwe kandi, twanganakolesyakyo eriwatikya abakulire abanzire eriminya bingyi oko Biblia. Neryo kundi eBiblia ni kitabu ky’obuli mundu, ahate eritika-tika itwe bosi tukendibana endundi omw’iyiteghererya emyatsi eyirimo, eyangatuwatikya eribya n’obutseme bw’ekwenene.

Ekitabu kino kikakolesaya emyatsi eyiri omo Biblia erikania oko historia y’ekihanda ky’erimbere eritsuka okw’ihangyika. Motukayikasa kutsibu erikania emyatsi y’omo Biblia eyi omo nzira nyolo n’eyowikire, kandi motukayikasa erikaniayo ngoko yinakwamene.

Aliwe, ekitabu kino sikirikanaya lisa oko myatsi eyiri omo Biblia. Emyatsi eyirimo n’esyopitsa biteghekanibwe omo nzira eyikaleka iwalangira ebiri omo Biblia ebi ibyabya nga binemubya, kandi iwalangira eriyowa ly’abakakanibawako omo kitabu eki.

Ekitabu kino kikatuwatikaya erilangira ngoko eBiblia ni kitabu ekikakanaya oko balume n’abakali abowa Yehova n’abaghana erimwowa. Kandi kikaleka itwigha esyosomo oko bandu abo. (Abanya Roma 15:4; 1 Abanya Korinto 10:6) Ekitabu eki kighabirwe mw’ebitswe 14. Oko nzuko y’obuli kitswe hali ekikuhi ky’ebyo twangigha.

Wamabya ighuli mubuti, wanganasoma esomo nguma n’omwana waghu neryo imwakania oko pitsa eyihambene n’esomo eyo. Neryo inywe bosi babiri imwanganasoma amasako w’eBiblia agho esomo eyo iseghemereko. Uwatikaye omwana waghu erilangira ebyo akasoma omo Biblia nga bihambene biti n’esomo eyiri omo kitabu. Enzira eyi yanganakolesibwa eriwatikya omundu oyukulire eriminya omo kikuhi omwatsi owali omo Biblia.

Tuli n’amaha ngoko ekitabu kino kikendiwatikya ab’omutima molo, bangabya balere kutse abakulu, erigha emyatsi y’omughaso eyiri omo Kinywa ky’oMungu n’erikolesyayo omo ngebe yabo. Ekyo kikendileka nabo ibaramya Yehova haghuma n’ekihanda kiwe ekyo anzire kutsibu.