Erilolo ry’Omwami Daudi

Sauli abere abihola, Daudi mwabya mwami. Daudi abya awite emyaka 30. Habere habilaba emyaka milebe ini mwami, omo righolo-gholo lighuma iniane oko lutwe lw’enyumba yiwe y’obwami, mwalangira omukali mubuya. Daudi mwaminya ngoko omukali oyo yo Batsheba kandi ngoko ni mukali w’omusuda, ye Uria. Daudi mwabugha ati bamuletere Batsheba omo nyumba yiwe y’obwami. Mwaghotsera naye, neryo mwabya mukule. Daudi mwanza eribisa ekyo akola. Mwabwira omukulu w’abasuda biwe ati ahire Uria y’embere omo malwa kandi amulekeranaye. Uria abere abitibwa, Daudi mwatahya Batsheba.

Aliwe Yehova abya inianasamilire emyatsi mibi yosi eyo. Mwakolaki? Mwatuma omuminyereri Natani oko Daudi. Natani mwabugha ati: ‘Habya omuteke oyuwite esyombuli nyingyi, n’omwera oyo wabya awite embuli nguma nyisa eyo abya anzire kutsibu. Omuteke mwimya embuli nguma y’omwera eyo.’ Daudi mwahitana kutsibu n’eribugha ati: ‘Omuteke oyo atolere iniakwa!’ Neryo Natani mwabwira Daudi ati: ‘Niwe muteke oyo!’ Daudi mwahwerekerera, n’eribwira Natani ati: ‘Nabirikosera Yehova.’ Erilolo eri mulyaletera Daudi n’ekihanda kiwe amaligho mangyi. Yehova mwasuyira Daudi, aliwe mwatamwita kundi mwabugha ekwenene kandi mwayikehya.

Daudi mwanza erihimbira Yehova y’ehekalu, aliwe Yehova mwasombola mughala wa Daudi ye Solomona erihimbayo. Daudi mwatsuka erisonderya Solomona y’ebindu n’eribugha ati: ‘Ehekalu ya Yehova yitolere iyuwana kutsibu. Solomona akine mulere, aliwe ngendimuwatikya omw’iteghekania ebindu eby’erihimbamo.’ Daudi mwateka esyofranga siwe nyingyi eriwatikya oko mubiiri w’obuhimbe. Mwasondya abahimbi abasi omubiiri wo ndeke. Mwakuma-kuma ehoro n’efeza, n’erituma abandu bayende emiti y’emierezi erilua e Tiro ne Sidoni. Abere iniakisiya iniahola, Daudi mwakangania solomona ngoko akendisyahimba ehekalu. Mwabugha ati: ‘Yehova mwakanibwira ati nikuhandikire emyatsi eyi. Yehova akendikuwatikya. Isiwakwa obuba. Usike, utsuke omubiiri.’