Omukobe oyo wowa oMungu

Yozefu abya mughuma w’oko baghala ba Yakobo balere. Abakulu biwe mubalangira ngoko tata wabo anzire kutsibu Yozefu. Ukalengekanaya uti mubayowa bati busana n’ekyo? Mubatsura Yozefu kandi mubamupona. Kiro kighuma Yozefu abere alota esyonzoli esikaswekaya, mwakanirya abaghala babo bo kusyo. Mubalangira ngoko esyonzoli esyo sikamaanisaya ngoko kiro kighuma bakendisyamukukamira. Ekyo ibwa mukyaleka ibatasyamupona kutsibu!

Kiro kighuma abaghala babo Yozefu babya ibanemulisya esyombuli hakuhi n’omuyi we Shekemu. Yakobo mwatuma Yozefu eriyalebya nga baliyo bati. Mubalangirira Yozefu yo hali inianemwasa, neryo bamabwirana bati: ‘Omulume w’esyonzoli yolya anemwasa. Muleke tumwite!’ Mubamuhamba n’erimughusa omo kyuna. Aliwe ye Yuda, omughuma w’oko baghala babo, mwabugha ati: ‘Isitwamwita! Kwanya itwamughulya mo mukobe.’ Neryo mubaghulya Yozefu oko bakomersa be Midiani ababya bakaya e Misri, bamabaha ebihande 20 by’efeza.

Neryo abaghala babo Yozefu mubahira ekanzu yiwe y’omo musasi w’embene, bamatumirayo tata wabo bati: ‘Eyi si kanzu ya mughala waghu?’ Neryo Yakobo mwalengekania ati enyama y’omoli yabiriita Yozefu. Mukyamwita obulighe bunene. Muhatabya n’omughuma oyo watoka erimukirania.

E Misri, Yozefu mwaghulibwa mo mukobe oko mukulu mughuma oyukahulawa mo Potifari. Aliwe Yehova abya iniane na Yozefu. Potifari mwalangira ngoko Yozefu abya asi ndeke erikola emibiiri kandi ini w’eriyiketera. Ekyo mukyaleka Yozefu iniahabwa obukulu obw’eriteya ebindu byosi bya Potifari.

Muka Potifari mwalangira ngoko Yozefu abya mubuya kandi w’akaghala. Obuli kiro iniakabwira Yozefu ati aghotsere naye. Yozefu angakolireki? Mwaghana n’eribugha ati: ‘Iyehe! Ekyo ni kibi. Omukama waghe ayiketere ingye, kandi uli mukali wiwe. Namabighotsera naghu, inamakola erilolo embere sy’oMungu!’

Kiro kighuma, muka Potifari mwasonda erihamba Yozefu yo kinyanganga. Mwamuhamba omo syongyimba siwe, aliwe Yozefu mwatibita. Potifari abere ahika eka wiwe, omukali wiwe mwamubwira ati Yozefu mwakasonda erimuhamba. Ayo abya amabehi. Potifari mwahitana kutsibu, neryo mwahira Yozefu y’omo ngomo. Aliwe Yehova mwatibirirwa Yozefu.