Busanaki litolere iwalola embere?

1. Erilola embere uk’igha eBiblia likendikuwatikya liti?

Tunasi ngoko ebike ebyo wamabiminya ebi ebyeritsukirako erigha eBiblia byabirileka iwanza Yehova kutsibu. Isiwumbaya er’igha utoke eriwatya olwanzo olu. (1 Petero 2:2) Wamabilola embere omwiseghera hakuhi n’oMungu uk’igha eBiblia wanganasyabana engebe y’erikota.​—Usome Yoane 17:3; Yuda 21.

Omwilola embere eriminya oMungu, erikirirya lyaghu likendiwata. Erikirirya likendikuwatikya eritsemesya oMungu. (Abaebrania 11:1, 6) Likendileka iwayisubako n’erisuba oko mibere.​—Usome Emibiri 3:19.

2. Ebyo wamab’igha oko Mungu byangawatikya biti abandi?

Kwenene omundu eribwira abandi emyatsi eyo abiriminya likatsemesaya. Itwe bosi twanzire eritula omwatsi mubuya. Ngoko unemulola embere erigha eBiblia, ukendiminya ngoko wangakolesya yo eriwatikya abandi eriminya ebyo w’ikirirye oko Yehova n’oko ngulu mbuya.​—Usome Abanya Roma 10:13-15.

Abandu banene bakatsuka eritula engulu mbuya oko bira babo kutse oko bandu b’ekihanda kyabo. Aliwe, ubye mwenge. Okwanya kweribabwira uti edini yabo ni y’amabehi, ubabwire oko syondaghane sy’oMungu. Kandi isiwabirirawa ngoko abandu bakatsemera emibere ey’omundu akakanganaya kulenga ebyo akabugha.​—Usome 2 Timoteo 2:24, 25.

3. Wangabya n’obwira buli buti n’oMungu?

Erigha eKyinywa ky’oMungu likendikuwatikya erikula omo bwira bwaghu n’oMungu. Oko nduli, wanganabya n’obwira obuwene kutsibu na Yehova. Wanganabya mughuma w’oko bandu abali omo kihanda kiwe.​—Usome 2 Abanya Korinto 6:18.

4. Wangalola embere uti erikulya obwira bwaghu n’oMungu?

Wamabilola embere omw’igha eKyinywa ky’oMungu, eri lyanganakuwatikya erikulya obwira bwaghu n’oMungu. (Abaebrania 5:13, 14) Usabe omughuma w’Abimiri ba Yehova akukangiriraye eBiblia omwilabira ekitabu EBiblia Yikatukangirirayaki? Erilola embere uk’igha eKyinywa ky’oMungu, obutseme bwaghu bukendyasa bukabya bungyi.​—Usome Esyonyimbo 1:1-3; 73:27, 28.

Engulu mbuya yikalwa ewa Yehova, oMungu oyutsemire. Wanganamweghemera omwibya haghuma n’abandu biwe. (Abaebrania 10:24, 25) Omwilola embere eritsemesya Yehova y’enzira y’eribana engebe kundu, engebe y’erikota. Eriseghera hakuhi n’oMungu ky’ekindu kyuwene kundu ekyo wangakola.​—Usome 1 Timoteo 1:11; 6:19.