Tukahimba Ebisenge by’Obwami busanaki, nabyo bikahimbawa biti?

Enyumba eyo tukaramirayamo ikahulawamo Ekisenge ky’Obwami kutse Enyumba y’Obwami kundi ebyo tuk’ighiramo bilebirye Obwami b’oMungu, omwatsi mukulu owo Yesu abya akahubirya.​—Luka 8:1.

Y’enyumba eyo tukaramaya m’oMungu w’ekwenene. Abimiri ba Yehova bakakolesaya ebisenge ebi erilolya embere omubiri w’eritulira abandu b’engulu mbuya. (Matayo 24:14) Ebisenge by’Obwami sibiri lingirirana kandi sibisosene, aliwe bihimbirwe ndeke butsira bikekete, kandi hane esyondeko esikakolera emihindano omo kisenge kighuma. Omo myaka ya lino-lino, twabirihimba Ebisenge by’Obwami binene bihya-bihya (hakuhi ebisenge 5 obuli kiro) busana n’erikanya rya baghambuli n’esyondeko. Eki kikatokekana kiti?​—Matayo 19:26.

Bikahimbawa omo bihembo by’esyofranka esikahirawa haghuma. Esyofranka esi sikatumawa oko Beteli sitoke eribwekwa esyondeko esilaghire erihimba kutse eriwania Ebisenge by’Obwami.

Bikahimbawa n’abandu bosi abakayiherera busa. Omo bihugho bingyi, mwabirihirwa Ebipya by’Abahimbi b’Ebisenge by’Obwami. Abali omo bipya n’ababiriyiherera bakahumira eyi-neyi omo kihugho ekyo balimo, n’omo biharo mina-mina ebiri hali, eriwatikya esyondeko erihimba Ebisenge by’Obwami. Omo bindi bihugho, mwabirihirwa abimiri ababeghere erihimba busana n’erilebererya obuhimbe bw’Ebisenge by’Obwami n’eritasya byuwania omo kiharo kilebe ekyo babirihabwa. N’omo abandi abasi omubiri w’erihimba bakayiherera eriwatikya, oko buli buhimbe, abaghala n’abali betu abali omo ndeko eyo bakahimbira bakayiherera kutsibu eriwatikya. Ekirimu kya Yehova n’akaghala ako abandu biwe bakahiraho n’omutima wosi byo bikaleka ebyosi ebi ibyatokekana.​—Esyonyimbo 127:1; Abanya Kolosai 3:23.

• Busanaki esyonyumba esyo tukaramirayamo tukasyahula mo Bisenge by’Obwami?

• Kikatokekana kiti erihimba Ebisenge by’Obwami omo kihugho kyosi?