ESOMO 11
Tukakola emihindano minene-minene busanaki?
E Meksiko
E Ujeremani
E Botswana
E Nikaragua
E Italia
Abandu aba batsemire busanaki? Bali oko muhindano wetu munene. Abaghombe b’oMungu ba kera mubalaghirwa erihindana haghuma ngendo isatu obuli mwaka, netu kutya tukalindirira n’engumbu nene emihindano yetu minene-minene. (Eryibuka Ebihano 16:16) Obuli mwaka, tuwite emihindano minene-minene eyisatu: emihindano ibiri y’omutimbo y’ekiro kighuma-kighuma, n’omuhindano w’ekiharo w’ebiro bisatu. Emihindano eyi ikatuwatikaya yiti?
Yikahimba obughuma bwetu. Ngoko Abaisraeli ibakatsemera eripipa Yehova ‘y’omo syondeko,’ netu tukatsemera erimuramya oko mihindano yetu minene-minene. (Esyonyimbo 26:12; 111:1) Emihindano eyi yikatuha omwanya w’erisungana n’eribya haghuma n’Abimiri balikyetu abomo sindi ndeko kutse ebindi bihugho. Omwitungyi, tukalya haghuma aho tukakolera omuhindano, ekyo nakyo kikaleka itwatsemera haghuma emihindano eyi. (Emibiri 2:42) Oko mihindano eyi, tukayilangirira olwanzo olukaleka ‘Abakristo balikyetu bosi’ ibabya omo bughuma omo kihugho kyosi.—1 Petero 2:17.
Yikahimba erikirirya lyetu. Kandi Abaisraeli mubawatikibwa ‘eriminya ebinywa’ by’Amahandiko ebyakanibawa. (Nehemia 8:8, 12) Netu tukatsemera amakangirirya awakalwa omo Biblia awo tukasunga oko mihindano yetu. Obuli muhindano munene akabya n’omutwe mukulu owakalwa omo Biblia. Emikanio n’emyatsi eyo abandi babirilolako ikatwighisaya ngoko twangakola erisonda ly’oMungu omo maisha wetu. Tukahimbawa omughulu tuk’owa abanemuyikasa erikwama emighambo y’oMungu oko biro bino ebikalire. Ebitsange ebihambene n’eBiblia ebikalaba oko muhindano w’ekiharo, bikaleka itwatsemera emyatsi y’eBiblia kandi bikatuha amahano awangatuwatikya. Oko buli muhindano, ababiriyiha oko Mungu bakabatisibawa.
Busanaki tukatsemera emihindano yetu minene-minene?
Emihindano minene-minene yangakuwatikya yiti?