Pandɛ tɛ Salomo ndo fa kpale mɛ lengbi ti singɔ na awa vɔrɔngɔ Yehova abɛse ala du ana. Wakristo kɔi lengbi ti lingɔ kota siɔ kpale wa lo hũ mabere ya, kpale niko si na ni “mbala kaka.” Na gesi lo pa ya, se ni li siɔ kpale ti ngaso ko, adu na lo mɛ ya, “ta ni da bɛ ni na ni ma.” Kanda se lo gbɔ̃ li lo na seni na ndo akpale mɛ aɔ ko, lo na hũngɔ ya lo mundó ekateli ti siɔni mɛ agwe na lo ngbĩi ya, lo li kota siɔ kpale. Ekateli ti siɔni ni alengbi ti dungɔ mabere, dungɔ na akwa ti siɔni, lengɔ awele ti siɔni, lingɔ na ya sitɛ ti internet ti siɔni bere gwengɔ ka ndo mɛ ta ni nzɔ̃ni na lo tɛ awakristo ma. Ngoi mɛndɛ̃ alengbi nga ti dungɔ ya, lo zia lingɔ sambela, dingɔ Ngbangɔ, gwengɔ bombi nga na singɔ kwa ti fangɔ tɛnɛ. Ngama tɛ palanga mɛ mbeti ti Masese tɛnɛ tɛnɛ tɛ lo ko, ta lo li siɔ kpale so mbala kaka ma. Wangɔ mɛ elengbi ti luangɔ na ndo kpale mɛ nɛ? Ta ayɔ bo ya e kɛ̃ siɔ kpale ma, kanda ayɔ nga ya e kɛ̃ aye zu mɛ alengbi ti gwengɔ na e yɛkɛ yɛkɛ ya, e li siɔ kpale. Ni la du ye mɛ Salomo kambisa na gesi na pɛ hɛ̃ngɔ se lɛlo tɛ palanga ti kɔli ná tɛ wali ti ndumba.—Mat. 5:29, 30. w24.07 p. 16 par. 10-11

Ye ti ngbondoni niko adu nɛ? Adu kwa mɛ aba pangɔ nzɔ̃ pa ti Lo-lengɔ Gbia tɛ Nzapa mɛ ndo hɛ̃ dungɔ lɛ ngɛ̃́. (2 Kɔr. 4:1) Ta niko ti kpondo adu ana? Ni ndo fa awa kwa tɛ Nzapa mɛ ala ndo pa nzɔ̃ pa hɛ̃ azi mɛndɛ̃. Na ngoi tɛ Polo ndó ko, awa kangɔ ye ndo salelandó ata so batangɔ na aye ti ngbondoni, tɛ ti tɛngɔ, vinyɔ nga na falanga. Kwɛ kɔi, Yehova ndo salela e ti nɛngɔ ya, e pa nzɔ̃ pa. Na lége ti lisalisi tɛ Yehova, elengbi ti luangɔ ngunu mɛ e na gwɛ̃ ni ti nɛngɔ ya, e pa nzɔ̃ pa ni hɛ̃ azi mɛndɛ̃. Ngoi mɛndɛ̃, elengbi ti dungɔ na mbɛtɔ na lo tɛ azi bere na lo mɛ ya, ala ndo temela e. Elengbi ti nwɔ̃ngɔ dangɔ bɛ niko ngasia? Zia e ba sambela mɛndó atoma li na ngoi mɛndó agbanzi ala na kwa ti fangɔ tɛnɛ. Ta ala ziandó ya, mbɛtɔ gbanzi ala na fangɔ tɛnɛ ma, ala yɔndó ka ti Yehova ya, ‘lo za ala ti nɛngɔ ya, ala ngbã lá kwɛ fangɔ tɛnɛ tɛ lo na ge ge ge zu,’ Yehova hɛ̃ndó gbinya ti sambela tɛ ala mbala kɔi. (Awa. 4:18, 29, 31) Se du ya, mɔ ti na mbɛtɔ tɛ azi ko, ayɔ ya mɔ li sambela hɛ̃ Yehova ya lo za mɔ. Yɔ ka ti lo ya lo za mɔ, mɔ nwɔ̃ mbɛtɔ ti kpɛngɔ lɛ azi, wa mɔ ti na songo ti pangɔ nzɔ̃ pa hɛ̃ ala. w24.04 p. 16 par. 8-9

Songo tɛ e na lo tɛ Yehova ndo to e, e li ya ili lo du santo. E ndo ye nga hɛ̃ngɔ ti e na lingɔ ya ili Yehova ti vuruni na ngoi mɛ e ndo tɛnɛ tɛnɛ mɛ aba nvɛ̃nɛ mɛndó Satana lé na ili lo. (Eb. 3:1-5; Yobo 2:4; Yn. 8:44) Na ngoi mɛ e ndo fa tɛnɛ ko, e ndo du na dengɔ bɛ ti tɛnɛngɔ tɛnɛ mɛ aba Nzapa tɛ e, na tɛnɛngɔ mbilimbili mɛ aba lo hɛ̃ azi zu mɛ aye mangɔ e. Gwɛ̃ tɛ e du ya, azi zu ahĩnga ya, seliye tɛ Yehova mɛ ɔ ngbondoni adu songo, se tɛ lo ti lengɔ gbia a du mbilimbili nga omɛ a lengbi, Lo-lengɔ Gbia tɛ lo na onzingɔ apɛnɔ zu, wa ni na hɛ̃ngɔ dengɔ bɛ ná siriri hɛ̃ azi ti ndasewa zu. (Nz. 37:10, 11, 29; 1 Yn. 4:8) Na ngoi mɛ e ndo tɛnɛ tɛnɛ ti seliye tɛ Yehova hɛ̃ azi kaya kwa tɛ e ti fangɔ tɛnɛ ko, e ndo li ya, ili lo ti santo. E nga na dengɔ bɛ na lo mɛ ya, e na ndima na lo ti ili lo mɛ e yɔ. w24.05 p. 18 par. 12