Abril

Kuti tibesereke ngo muripo tinodikana kuva no rutendo. (Vaef. 1:7) Vandhu vakadanijwari ndi Jesu kuti vo “mavhuta amweni” avadikani kuha pau no kumwa vhinyu pa Cirariro ca Mambo. (Joh. 10:16) Pikija zvakadaro, ivona vanobesereka ngo ngazi no muviri wa Jesu Kristu. Kuitisa kudini? Ivona vanobesereka ngo kukhombija rutendo ku muripo wa Jesu no kukhombija rutendo ku zviro zvinoshamaisa zvavakapuwa ngo ndava yo muripo uwu. (Joh. 6:53) Ngo divi rimweni, vaya vanoha pau no kumwa vhinyu vanokhombija kuti vanoita divi ro citenderano cipsa, cimwenizve vano vetero yo kuzotonga mu Umambo wo kumatenga. Ngo kudaro, azvinenyi kuti itusu tiri Makristu okuzojwa kana kuti vo mavhuta amweni, tinodikana kuva no rutendo hwakavanga kuti tikwanise kupona kwenda no kwenda. w24.12 13 ¶14, 16

Pa mukuvo wovaiita Cirariro ca Mambo, Jesu wakapekeja pau icina mbijo vajiji vake ecivavhunja kuti pau yondhoyo yaiimirira muviri wake. Perapo iyena wakavavhunja kuti vhinyu yaiimirira ‘ngazi yake yo citenderano.’ (Mrko. 14:​22-25; Ruk. 22:20; 1 Vak. 11:24) Citenderano imbza ici ‘cakaithwa ndi Jehovha no Vaziraeri’ kana kuti na vayani basi vanozotonga na Jesu mu “Umambo hwa Mwari.” (Vahe. 8:​6, 10; 9:15) Zvakanangwa ndi Jesu pa Cirariro ca Mambo, zvinoshanda ku cikwata cidoko cinodanijwa kuti “mushambi mudoko.” Vapostori vaaingari navo, vainga vari vokutanga kuita divi mu mushambi uwu mudoko. Ivona vanozova no mukana wokutonga na Jesu kumatenga. w24.12 11 ¶9-10

Jesu wakatengeswa ngo umwe wo shamwari jake, cimwenizve, vavengi va Jesu vakamusunga no kumupumbha zviro zvaainga acizivi kuita. Pejisire masoca akaenda na Jesu ku ndau yaaizouraiwa, vomukohomera pa citaka. Zvokadi, zvese izvi zvakaita kuti Jesu atambujike maningi. Asi Jehovha wakatambujikavo maningi ndizvona. Jehovha wainga no simba ro kuimisa matambujiko aisonganari no Mwana wake. Asi iyena aazivi kuita zvondhozvo. Ngenyi? Ngo ndava yo rudo hwake. Muripo wa Jesu Kristu, i citatijo co kuti Jehovha anomuda maningi. Jehovha wakaita zvese zvaaikwanisa zvokuti wakatogumira pakuhwajihwa maningi kuti amusujunure ku ushaishi no rufu. (1 Joh. 4:​9, 10) Kunasa kunanga, Jehovha ari kubesera umwe nga umwe wedu kuti ahwisane no cishaishi no cikunyisa. w24.08 6 ¶13-14

Tingazwisisa ushoni kuti Jehovha anotida maningi kudari tikasotesesa kuhwajihwa kwaakava nako ngo kuvona Mwana wake ecitambujika kuti atifire. Sathana wakananga kuti apana no mushandiri umwe wa Jehovha anozoenderera mberi akagondeka kwaari paya paanosongana no zvineso. Kuitira kuvonesa kuti zvakanangwari ndi Sathana ngo zvokunyepa, Jehovha wakatendera kuti Jesu atambujike acito afa. (Job. 2:​1-5) Jehovha wainga ecivona Mwana wake Jesu paainga ecishohwa ngo vavengi vake avo vainga vatungamiriri vo zviara, paiitakwa ngo masoca no paakakohomehwa pa mutanda. Perapo Jehovha wakazovonazve Mwana wake anodiwa ecitambujika no kufa ngo njira inohwaja. (Mat. 27:​28-31, 39) Jehovha wainga no simba ro kuimisa izvi kuti zvicaitika. (Mat. 27:​42, 43) Asi, kudari Jehovha naakaimisa kuti izvi zvicaitika, apana muripo waizopagahwi, nee aticaizovepi no vetero iri yese. Ngo kudaro, Jehovha wakatendera kuti Mwana wake acungirire matambujiko aya mbhera kufa. w25.01 22 ¶7

Yainga njiku 16 ya Nisani mu gore ra 33 Jesu Aviya. Vajiji va Jesu vakasuruvara, cimwenizve, vari kuthya. Pa njiku yondhoyo kamare, vajiji vaviri va Jesu vakaita hwendo vecienda ku mutundhu unozwi Emausi. Ivona vaivetera kuti Mesiya waizoita zviro zvinoshamaisa ku Vajudha asi wari iyena wainga wafa. Mwanarume umweni anovakhwederera otanga kufamba navo. Asi vajiji vanotanga kuverengera mwanarume uwu zviro zvinothyisa zvakaitika na Jesu. Ngo kudaro, mwanarume wiya wakatanga kubhuya ngo zviro zvokuti narini vajiji avacaizozvikanganwepi. Asi iyena “wakatanga ngo zvakatahwa ndi Mosi no vaporofeti vese,” ecisanangura kuti Mesiya waidikana kutambujika no kufa. Pejisire pavainga vaaphedo no kuguma kumutundhu wo vaienda, ivona vakazwisisa kuti mwanarume wiya wainga Jesu. (Ruk. 24:​13-35) Jesu acito ahwirira kudenga wakapeja makumarongomuna o njiku pa nyika, pa njiku iji, iyena wakabudira vajiji vake ko vhaza jakawanda. Jesu wakavangisa vajiji vake vaingari vakasuruvara vecithya. Ivona vakadakara maningi, vakavangiswa ndi Jesu kuti vaende kocumaera no kujijisa masoko akanaka ngo pamusoro po Umambo. w24.10 12 ¶1-3

Ngo zvocibarihwe kuvetera kuti mwana mudoko wese akure pakufamba ko nguva. Asi apana mundhu angakwanisa kuvangisa ushamwari hwake kuna Jehovha kudari iyena acikavangisiri pakuita zviri zvese. Inga muezaniso, hama jo ku Korinte jakatendera masoko akanaka jobhabhatijwa, joashira mujimu mucena no kujija zvakawanda no mupostori Pauro. (Maba. 18:​8-11) Asi pasure po makore manganani no vapera kubhabhatijwa, vazinji vakona vainga vacito vakura ku divi ro kumujimu. (1 Vak. 3:2) Pakutanga tinodikana kuva no cido kuti tizove Mukristu wakura. Vaya ‘vanoda kuva mapenji’ zvecirevera vaya vanoda kuramba vari vana vadoko ku divi ro kumujimu, avazokwanisi kuva Mukristu wakura. (Maz. 1:22) Itusu atidi kuva inga vaya vanonga vaamadhodha asi vecindovetera kuti vabari vavo vavatemere zvivaringo basi. Kusiyapo zvondhozvo, itusu tinodikana kukura ku divi ro kumujimu no kuvangisa ushamwari hwedu na Jehovha. Kudari imwimwi muciri kuvangisira kuti muve Mukristu wakura, kumbiranyi Jehovha kuti amupe “cido no simba ro kuita.”—Vafi. 2:13. w24.04 4 ¶9-10

Jehovha anotivhunja manera aanojizwa paanotonga mundhu kuti aparajwe. (Ezek. 33:11) Jehovha narini aacaizoparajepi mundhu kwenda no kwenda pacina thangwe raushoni. Iyena ndi Mwari wakazara ngo unyasha, anokhombija unyasha pese pazvinonga zvecidikana. Tinozivenyi ngo pamusoro po vandhu vaya vacikazomuswi? Bhaibheri rinobhuya ngo muezaniso munganani. Inga muezaniso, Jesu wakanasa kujekesa kuti Judha Iskariyote aacazomuswizve. (Mrko. 14:21; vonanyi Johani 17:12.) Judha Iskariyote wainasa kuzviziva kamare kuti iyena wainga ecishaishira Jehovha pomwe no Mwana Wake Jesu. (Vonanyi Marko 3:29.) Jesu wakanangazve kuti vatungamiriri vamweni vo zviara avanavo vetero yo kuzomuswa. (Mat. 23:33; vonanyi Johani 19:11.) Kunja kwa zvondhozvo, mupostori Pauro wakajekesa kuti vapanduki vacikakhauyi avazomuswi.—Vahe. 6:​4-8; 10:29. w24.05 4 ¶10-11

Patinogara phedo na Jehovha, Sathana aakwanisi kuita ciro cingatikhuvaza kwenda no kwenda. (1 Joh. 3:8) Mu nyika imbza, Jehovha anozoenderera mberi ecijivirira shamwari jake jakagondeka haiwa basi ku divi ro kumujimu asi pa rufu. (Apok. 21:4) Ngozvokadi kuti i cidakajiso cikuru maningi kuva murendo mutende ya Jehovha no kuva no ushamwari hwakavanga naye hwo kwenda no kwenda. (Ezek. 37:27) Kudari tecida kwenderera mberi tiri varendo vake, tinodikana kuitenyi? Kudari imwimwi makokwa ku muzi ko ari wese, mukaguma konayo munovetera kuti mune wo muzi amuvhunje zvamunodikana kuita. Mu njira yakaezana, itusu tinoda kuziva kuti Jehovha anoda kuti tiitenyi mu tende yake inga varendo. Rudo hwedu na Jehovha unotindundira kuti tiite zvese zvatinokwanisa kuti ‘tinase kumudakajisa.’ (Vako. 1:10) Narini atidikani kukanganwa zviro izvi no kumureremeja mukuvo wese. Kuceukija zviro izvi kunozotibesera kuti titame kuita zviro zvicikadakajisi Jehovha. Pacina kukana-kana, itusu tinoda ‘kujidodokesa’ patinofamba na Mwari wedu.—Mik. 6:8. w24.06 4 ¶8-9

Jehovha wakakumbira Abhirahama kuti apire mwana wake Izaki. Kunasa kunanga ici cakava cikumbiro cainesa maningi kuna Abhirahama mu upenyu hwake hwese. Pikija zvakadaro, Abhirahama wakatema civaringo co kuzwira Jehovha. Abhirahama paainga anasiririka kuti apire mwana wake, Jehovha wakamurambija. Jehovha waizviziva kuti Abhirahama waizohwajihwa maningi kudari naakauraya mwana wake. Cikumbiro ici ca Jehovha cinotijijisa ciro cinosisira maningi. Jehovha waizova wakanasiririka kuti ape mwana wake inga muripo kwatiri. Izvi zvinokhombija kuti Jehovha anoda maningi vandhu. (Gen. 22:​1-18) Pa makore akazotevera, Jehovha wakapekeja mutemo ku jinja ro Vaiziraeri, Mutemo uwu wainanga kuti ivona vaidikana kuita mupiro wo zvinyama kuti zvishaishi zvavo zviregerehwe. (Rev. 4:​27-29; 17:11) Mupiro iji jaiimirira mupiro umweni waisisira maningi, uwo waizosujunura vandhu vese kuvha ku cishaishi. Jehovha wakafemera vaporofita vakawanda, kuti vabhuye ngo pamusoro po mubarihwana uwu. Ivona vakananga kuti mubarihwana uwu waingari akagondeswa, wakazozivika inga Mwana wa Mwari, iyena waizodikana kutambujika no kufa kuti asujunure vandhu ku cishaishi no rufu.—Isa. 53:​1-12. w24.08 4 ¶7-8

Pamunoverenga Bhaibheri, ivanyi no cokwadi cokuti muri kushandisa zviya zvamuri kuverengaro. Pamunoverenga pari pese mu Bhaibheri, jivhunjisenyi kudari: ‘Zvandaverengari, ndingazvishandisa kudini wari no kumbejiyo?’ Inga muezaniso, ngatiti maverenga 1 Vatesaronika 5:​17, 18. Pasure po kuverenga vhesi mbiri iji, imwimwi mungaima, morangarijisisa kuti ndi kangana munoita mukumbiro no manera amunouita. Kusiyapo izvo, imwimwi mungarangarira ngo zviro zvamungabongesera. Kangaije mungatema civaringo co kubonga Jehovha ngo zviro zvitatu zvaakamuitira. Kudari mukapeja nguva mecirangarijisisa zvamajija mu Bhaibheri, zvinozomubesera kuti muzwisise Soko ra Mwari no kuita zvarinonanga. Rangariranyi kuti munozobesereka kudini kudari mukaphinda kuita izvi njiku jese pamunoverenga mativi amweni o Bhaibheri. Hina, imwimwi munonga meciita zvinonangwa ngo Bhaibheri. w24.09 4-5 ¶9-10

Jehovha wakatisika no mugariro wakanaka maningi. Pikija tinodakariravo kuashira, asi tingava no mudakaro wakakura maningi paya patinopekejavo vamweni. Tinojizwa ushoni patinokwanisa kubesera hama no hambzaji jedu. Tinodakarazve maningi kudari ivona vakatibongesera. Ngo kudaro, azvinenyi kuti tabongesehwa kana haiwa, itusu tinodakara maningi ngokuti taita zviro zvaushoni. Mucadokanganwa kuti zvese zvamunopa, ‘Jehovha ndiyena anozomupa zvakawanda kupinda zvondhozvo.’ (2 Kro. 25:9) Imwimwi amuzokwanisi kupekeja ari wese zviro kupinda Jehovha. Makomborero atinoashira ecivha kuna Jehovha, anotiita kuti tidakare maningi. Tatema civaringo cokutevejera Baba wedu vo kudenga vanokova. w24.09 31 ¶20-21

Jehovha ano usizi no unyasha. (Nduy. 103:13; Isa. 49:15) Jehovha anohwajihwa ngo matambujiko atiri kusongana nawo. (Zak. 2:8) Iyena anotibesera kuti timuzive no kuva shamwari jake. (Nduy. 25:14; Maba. 17:27) Iyena anojidodokesa, “anokotama kuti avone denga no nyika, iyena anovhisa pa bukuta, mundhu acina mubeseri.” (Nduy. 113:​6, 7) Kuitisa kudini ariwese waizoramba kukuja Mwari wedu mukuru? Tinokuja Jehovha ngokuti tinoda kuti vamweni vamuzive. Vazinji avazivi cokwadi ngo pamusoro pa Jehovha. Ngenyi? Ngokuti Sathana wakapofumaja murangariro jo vandhu vacikatendi ngo kundhandhanisa manyepo akashatisisa ngo pamusoro pake. (2 Vak. 4:4) Sathana wakakhohwesa vandhu kuti Jehovha ndi Mwari anonesa, acikaneseki ndisu, cimwenizve, ndiyena anoitisa matambujiko akawanda mu nyika muno. Asi tinoziva cokwadi ngo pamusoro pa Mwari wedu. Itusu tino mukana wo kuvhunja vandhu cokwadi no kumupa rukujo.—Isa. 43:10. w25.01 3 ¶6-7

Jesu Mwana wa Mwari wainga akakwana, iyena wakaita mushamaiso jakakura maningi, pikija zvakadaro, Sathana wakashandisa vandhu kuti vandhandhanise manyepo ngo pamusoro pake. Inga muezaniso, vatungamiriri vo zviara vaivhunja vandhu kuti Jesu waigogomera madhimoni ngo “zina ro mutongi wo madhimoni.” (Mrko. 3:22) Jesu paaitongwa, vatungamiriri vo zviara vakamushora vecituka Jehovha no kuvangisa vandhu kuti vakumbire kuti iyena aurawe. (Mat. 27:20) Perapo, vateveri va Jesu pavaicumaera masoko akanaka, vavengi vavo vacizivi kutenda “vakakukumijira vandhu vo majinja kuti vamukire hama jedu.” (Maba. 14:​2, 19) Ngo pamusoro po Mabasa o Vapostori 14:​2, Murindiri wo 1 wa Dezembro wo 1998 wakadurujira kuti: “Vaya vaibesera Sathana vakaramba masoko aicumaehwa ngo Makristu, no kutonanga zvakashata ngo pamusoro pawo nokuita kuti vandhu vamweni vatame kuvapurukira no kuvazonda.” Nyamasi uno, Sathana ari kuenderera mberi ecicengeja “vandhu vese vanogara pasi pano.” w24.04 11 ¶15-16

Kuti mundhu amuswe azvifiri pa mukuvo waanozofa. Jehovha ndi mutongi wakakwana, zvivaringo zvake mukuvo wese zvakarungama nokutizve zvakanaka. (Nduy. 33:​4, 5) Asi tingava no cokwadi cokuti “Mutongi wo nyika yese” mukuvo wese anozoita zvakarurama. Cimwenizve, tingaguma pa mbhejiso yokuti mundhu amuswe azvifiri kwaanogara. Jehovha narini aacaizoparejepi zviuru no zviuru zvo vandhu kana kuzvivona inga “mbuji” ngokuti kwazvinogara akuzivi kumbocumaehwa masoko akanaka o Umambo. (Mat. 25:46) Mutongi wakarurama wo nyika yese anoneseka maningi ngo pamusoro po vandhu ava kupinda itusu. Itusu atina manera okuziva kuti Jehovha anozoitisa kudini ngo pamusoro po shwiro iji mukati mo dambujiko guru. Kangaije vamweni vo vandhu ava vacino mukana wokujija ngo pamusoro pa Jehovha, no kuva no rutendo kwaari no kutema civaringo cokuzogara ku divi rake paya paanozocenesa zina rake mu nyika yese.—Ezek. 38:16. w24.05 12 ¶14-15

Itusu vandhu va Jehovha tinodakarira kubesera vamweni. (2 Vak. 8:4) Asi nguva jimweni kuti tiite izvi, zvinoda cicunge. Inga muezaniso, pa mukuvo unonga weciitika hondo, vakuru vanodikana kwenda koovangisa hama no hambzaji jo ku ungano ngo kuvapa besero ku divi ro kumujimu no kutovabeseravo pa zvinodiwa zvavo zvo kunyama. Vakuru vanoda zvimavhuta zva Jehovha, ngo iyo ndava ivona vakanasiririka kuti vahwisane no ngozi iri yese kuti vape besero ririrese rinodiwa ku hama. Pa mugariro wakadari inga ndi uwu, zvinosisira maningi kuti tienderere mberi takabatana. Cimwenizve cinosisira, ngo co kuzwira ndhungamiriro jinovha ku Bheteri. (Vahe. 13:17) Vakuru mukuvo wese vanodikana kugara veciceukija ndhungamiriro jo sangano ngo pamusoro po kugara takanasiririka kuitira ngozi jinoitika jega. (1 Vak. 14:​33, 40) Ivanyi makacunga, asi ngwariranyi. (Maz. 22:3) Mucito maita ciri cese, tanganyi marangarira, itanyi zvese zvamunokwanisa kuti muve makangwaririka. Thembanyi Jehovha. Jehovha angamubesera kuti mukwanise kubesera hama jenyu no kungwarira kwese. w24.07 4 ¶8; 5 ¶11

Mambo Dhavhidhi wainasa kuziva Jehovha. Iyena waimuthemba. Paaiteverehwa ngo vavengi vake kubatanijavo na Mambo Sauri, Dhavhidhi wakaita mukumbiro kuna Jehovha ecikumbira besero rake. Jehovha paakapera kudavira mukumbiro uwu no kumubesera, Dhavhidhi wakazonanga kudari: “Jehovha anopona!” (Nduy. 18:46) Dhavhidhi waida kunangenyi paakananga magama aya? Bhuku rimweni rinobhuya ngo zvo Bhaibheri rakananga kuti pa magama aya, Dhavhidhi waida kuvonesa kuthemba kwake Jehovha “no kuvonesa kuti akuna Mwari umweni wokadi kuciripi Jehovha iyena anoda kubesera vashandiri vake.” Kuvha ku zvakamuitikirari, Dhavhidhi wakanasa kuziva kamare kuti Jehovha wainga ecivona zvese zvainga zvecimuitikira nokuti Jehovha wainga akanasiririka kuti amubesere. Izvi ndizvona zvakabesera Dhavhidhi kuti aenderere mberi ecishandira Jehovha no kumukuja. (Nduy. 18:​28, 29, 49) Kuva no cokwadi cokuti Jehovha ndi Mwari anopona ngozvinozotibesera kuti tienderere mberi tecimushandira no kuvangisira kwese. Izvi zvinozotipekejavo simba kuti tikwanise kuhwisana no muejo uri wese watinozosongana nawo no kutivangisa kuti tienderere mberi teciita zvese zvatinokwanisa kuti tiitise nane mu basa rake. Pacina kukana-kana, izvi ndizvona zvinozotibesera kuti tikhwedere phedo na Jehovha. w24.06 20-21 ¶3-4

Tinojijenyi ngo masoko a mupostori Pauro ku Vatesaronika? Patinozwa masoko acikazwirani no zvatakajija mu Bhaibheri kana marehwa-rehwa aciripi iwona, tinodikana kushandisa uzivi. Ku Uniyau Sovhiyetika yokare, vavengi vedu vakandhandhanisa masoko ainga pa karata, aidari inga aivha ku cine ro pasi pese. Karata iyi yaivangisa hama kuti jiumbe sangano raivaparajanisa no raijiimirira roga. Karateyo yaiita inga yokadi, asi hama jainga jakagondeka ajizivi kucengejeka. Ivona vakazwisisa kuti masoko ainga pa karata iyi, acaizwiranepi no zvavainga vakajijiswa. Nyamasi uno, vavengi vedu, kazinji vanoshandisa interneti kuti vaticengeje no kutiparajanisa. Kusiyapo ‘kukasika kuruza murangariro wedu wakanaka,’ tinodikana kusotesesa kuti zviro zvatiri kuzwaro no zvatiri kuverenga zvinozwirana no zvatakajija kana kuti haiwa.—2 Vat. 2:2; 1 Joh. 4:1. w24.07 12 ¶14-15

Cimwe co civaringo cinosisira maningi cingatemwa ngo mundhu, ngo cokujipira kuna Jehovha no kuita divi ro mbhuri yake. Jehovha anovetera kuti vandhu vese vaite zvondhozvo. Ngenyi? Iyena anoda kuti ivona vabuse ushamwari wo phedo naye no kupona no kucikaperi. (Dhot. 30:​19, 20; Vaga. 6:​7, 8) Asi pikija zvakadaro, Jehovha aavangiriji ari wese kuti amushandire, iyena anotendera kuti mundhu umwe nga umwe asane zvaanoda kuita. Waro Mukristu wakabhabhatijwa kudari akaphwanya mutemo wa Mwari oita cishaishi cikuru keni? Kudari iyena akatama kukhauya anodikana kuvhiswa mu ungano. (1 Vak. 5:13) Pikija zvakadaro, Jehovha anovetera no kusengerera kwese kuti mundhu wakaitaro zvakashata, ahwirire Kwaari. Kunasa kunanga, iri ndirona thangwe rinosisira rakaita kuti Jehovha atipe muripo, kuitira kuti vashaishi vanokhauya varegerehwe. Jehovha Mwari wedu ano rudo anobesera vaya vakaita zvishaishi zvikuru kuti vakhauye.—Zak. 1:3; Varo. 2:4; Jako. 4:8. w24.08 14 ¶1-2

Pa mukuvo wokuti mupostori Johani wakatara karata yake yocitatu, vandhu vakawanda vaindhandhanisa jijiso jo kunyepa no kubara zvineso mu ungano. Zvinodakajisa ngozvokuti vamweni vakaenderera mberi ‘vecifamba mu cokwadi.’ Ivona vaizwira Jehovha ‘vecifamba mukuzwirana no mutemo jake.’ (2 Joh. 4, 6) Makristu aya akagondeka aazivi kudakajisa basi mwoyo wa Johani, asi akadakajisavo mwoyo wa Jehovha. (Maz. 27:11) Tinojijenyi? Kugondeka kunoviisa mudakaro. (1 Joh. 5:3) Inga muezaniso, itusu tinodakara maningi patinoziva kuti tadakajisa mwoyo wa Jehovha. Jehovha anodakara maningi paanovona kuti tanyisa muejo jo nyika ino tozwira mutemo jake. Ngirozi jokumatenga jinodakaravo maningi ndizvona. (Ruk. 15:10) Itusu tinodakara maningi patinovona hama no hambzaji jedu jecienderera mberi jakagondeka. (2 Vat. 1:4) Nyika ino ya Sathana painozoparajwa, itusu tinozodakara maningi ngokuziva kuti takaenderera mberi takagondeka mbhera ku magumo. w24.11 12 ¶17-18

Munodikana kupeja mukuvo wakadini mecipsaka kuzivana no mundhu mucito mamuvhunja kuti munomuda? Kudari mukamuvhunjirira ngo kukasika, iyena angavona kuti imwimwi amunasi kurangarira mucito matema zvivaringo. (Maz. 29:20) Asi kudari mukanonokazve maningi, munozoita inga mundhu acikazivi zvokuita, maningi-ningi kudari mundhuwo azvibata kuti imwimwi muri kumuda. (Muc. 11:4) Ceukijanyi kuti mucito mavhunjirira mundhuwo, mucajikhohwesa kuti munozocadha naye. Asi munodikana kuva no cokwadi cokuti makanasiririka kuti muzocadha no kuziva kuti zvamunodaro mundhuwo anazvo kana kuti haiwa. Waro kudari imwimwi mukazwisisa kuti ari wese ari kumuda keni? Kudari imwimwi mucizivi kumudavo, nasanyi kumujekesera ngo manera amunoita zviro. Akucaizova kunaka mwoyo kuita kuti mundhu umweni asare ecirangarira kuti pacino mukana wokuva no ushamwari naye kuveni andizvopi.—Vaef. 4:25. w24.05 22-23 ¶9-10

Makristu okuzojwa akagondeka ndiwona basi anozoashihwa ndi Jesu mu Umambo wo kumatenga. Vokuzojwa vanonga vacizivi kwenderera mberi vakarinda, avazobatanijwi pamwepo no “vakasanwa.” (Mat. 24:31) Makristu ese, azvinenyi kuti vano vetero yo kurarama kudenga kana pasi pano, vanodikana kuvona zvakananga Jesu inga ngwajo kuti vaenderere mberi vakarinda no kugondeka. Tinonasa kuziva ushoni Jehovha. Ndiyo ndava, tinothemba matongero ake. Atineseki dangani Jehovha ari kuzoja vandhu vakagondeka mazuva ano. Tiri kuceukija zvakabhuya Jesu ngo pamusoro po vashandi vo nguva gumi na imwe vo pa muezaniso wake wo munda wo muuvha. (Mat. 20:​1-16) Vaya vakakokwa kuti vaviye koshanda mu munda wo muuvha vo pa nguva yo kupejisira, vakaashira mupocero wakaezana no wo vaya vakatanga kushanda. Mu njira yakaezana, azvinenyi kuti mundhu wazojwa nguva yapi, vokuzojwa vanozoashira mupfupo wavo wo kwenda kudenga kudari vakatongwa vovoneka kuti vakagondeka. w24.09 24 ¶15-17.

Jesu wakagaja muezaniso wakakwana ungatibesera kuti tingaitisa kudini kuti tihwisane no kutama kururama. Iyena wakatajwa ngo njira icizivi kururama ngo vandhu vakawanda kubatanijavo no vo pa mbhuri pake. Vamweni vo pa mbhuri pake vaitorangarira kuti iyena anopenga, vatungamiriri vo zviara vakananga kuti iyena ano dhimoni, kuveni masoca o Ciroma akamushora, kumutaja ngo njira icizivi kururama, pejisire vomuuraya. (Mrko. 3:​21, 22; 14:55; 15:​16-20, 35-37) Pikija zvakadaro, Jesu wakakwanisa kuhwisana no kutama kururama uku acikahwirijiri. Ngozvapi zvatingajija kuvha ku muezaniso wake? (1 Ped. 2:​21-23) Jesu wakasiya muezaniso wakakwana kuitira kuti ngozvapi zvatingazoita paya patinoshaisha kutajwa ngo vamweni kana ngo njira icizivi kururama. Iyena waiziva mukuvo waushoni wo kuvereketa no mukuvo wo kunyarara. (Mat. 26:​62-64) Iyena acaigarepi ecijiinikira paciro cimwe nga cimwe caainyepehwa ngo vandhu. (Mat. 11:19) Paaibhuya, iyena aacaitukepi vamweni nee aacaivathyisijirepi. w24.11 4-5 ¶9-10

Amborangariranyi kupa cipo cinosisira cakaseja no caushoni ku mundhu wamunoda. Imwimwi maizokhugunyika kudari mundhuwo akatora cipoco ociviga otamazve kuceukija ngo pamusoro paco. Ngo divi rimweni, imwimwi maizodakara maningi kudari mundhuwo akashandisa ushoni cipo ici no kukhombija kubongesera. Cipo ici cinobatana papi no cipo co muripo ca Jehovha? Jehovha wakapa Mwana wake kuitira itusu. Jehovha anodakara maningi patinokhombija kubongesera ngo cipo ici cinosisira no rudo hwake hwakamuita kuti atipe muripo uwu. (Joh. 3:16; Varo. 5:​7, 8) Pa kufamba ko nguva, tingatamazve kubongesera ngo cipo ici, zvaizodari inga kuviga cipo ca Jehovha. Itusu tinonga takadakara ngo cipo ici asi tinonga takaciviga inga ticikacivoni. Kuti titame kuita izvi, tinodikana kugara tecibongesera ngo zvatakaitihwa ndi Jehovha na Jesu. w25.01 26 ¶1-2

Kuti mukwanirise kushanda inga mukuru, amudikani kuva mundhu wavha kutendeuka wari. Izvi azvirevi kuti anodikana kuva mundhu waano makore akawanda naabhabhatijwa, asi anodikana kuva no nguva inodikana kuti ave Mukristu wakaivha. Mucito magajwa inga mukuru, munodikana kuvonesa inga ndi Jesu, kuti munojidodokesa no kusengerera mecivetera mukuvo kwao wokuti Jehovha azomupekeja mabasa mazinji mu ungano. (Mat. 20:23; Vafi. 2:​5-8) Imwimwi mungakhombija kuti muri mundhu wakagondeka ngo kuzwira ndhungamiriro no mutemo ja Jehovha pomwe no kuzwira ndhungamiriro jamunopuwa ngo sangano rake. Bhaibheri rinonasa kujekesa kuti vakuru vanodikanavo kukwanisa kujijisa vamweni. Waro, izvi zvinoreva kuti vakuru vese vanodikana kuva vecinasa kuita hurukuro? Haiwa. Vakuru vazinji pikija vacikakwanisi kuita ushoni hurukuro, vanokwanisa kujijisa ushoni mu basa ro kucumaera no paya pavanovhakacira hama no hambzaji kuti vajivangise. w24.11 23-24 ¶14-15

Pamunoverenga Bhaibheri mowana zviro zvokuti amunasi kuzvizwisisa ushoni, psakisisanyi. Perapo, kumbhiri ko njiku, rangarijisisanyi ngo zvamawana no zvazvinoreva ngo pamusoro pa Jehovha na Jesu no rudo hwavo kwamuri. (Nduy. 119:97) Mucaruza mudakaro paya pamunotama zviro zvipsa kana zvinoshamaisa pamunonga meciverenga kana kupsakisisa. Jivonenyi inga mundhu ari kupsaka goridhi. Ngo kusengerera kwese, vandhu vanopsaka goridhi, vanopeja nguva no njiku jakawanda vacito vawana nee zvigoridhi zvidoko. Asi vanoenderera mberi vecipsaka ngokuti cidimbu co goridhi cinosisira maningi kwavari. Asi zviro zvinosisira maningi i ciro cimwe nga cimwe cipsa catinojija mu Bhaibheri. (Maz. 8:10) Ngo kudaro, ivanyi mundhu anosengerera, kwanirisanyi urongwa hwenyu hwo kuverenga Bhaibheri.—Nduy. 1:2. w25.01 25 ¶14-15

Jehovha anoda kuti tiregerere vaya vanotishaishira no kutibhuira zviro zvakashata. (Nduy. 86:5; Ruk. 17:4; Vaef. 4:32) Tinohwajihwa maningi kudari tikaitihwa zvakashata, maningi-ningi kudari watiitiraro zvakashata ndi shamwari yo phedo kana umwe wo paukama hwedu. (Nduy. 55:​12-14) Nguva jimweni, kuhwajihwa kwatinonga tecizwa mu murangariro, kungaita inga kuti tabaiwa ngo cipanga. (Maz. 12:18) Tingatoita inga kuti apana ciri cese caitika, tototama kuvonesa kuti tahwajihwa. Asi kuita kudari, kunoezaniswa no kubaiwa ngo cipanga, tocisiya ciripo. Bundu redu arizoperi basi kudari tikavonesa kuti zvaitikaro azvizivi kutinyangajisa. Kazinji mundhu paanotinyangajisa, kangaije tingada kumunyangajwira. Bhaibheri rinovonesa kuti pa mugariro jimweni, azvizivi kushata kunyangajwa. Asi irona rinotingwajazve kuti mugariro uwu ucizivi wari kunaka, audikani kutitungamirira. (Nduy. 4:4; Vaef. 4:26) Ngenyi? Ngokuti ushungu, auvisi muviyo jaushoni. (Jako. 1:20) Ceukijanyi kuti kuva no ushungu kungaitika, asi ndusu tingakheta kwenderera mberi tinako. w25.02 15 ¶4-6

Jesu wakaezanisa upenji wokuviga mare ticikapsaki kuva “mukhupuki pamberi pa Mwari.” (Ruk. 12:​16-21) Apana anokwanisa kuziva zvinozoitika mangwana. (Maz. 23:​4, 5; Jako. 4:​13-15) Itusu tinohwisana no cineso cokuteverehwa ngokuti tiri vateveri va Jesu. Jesu wakananga kuti tinodikana kuva takanasiririka kuti ‘tisiye zvese zvatinazvo’ kuti tikwanise kuva vateveri vake. (Ruk. 14:33) Makristu o muzana rokutanga o ku Judheya, akatendera kusiya zviro zvese zvavainga nazvo no vakadakara. (Vahe. 10:34) Mu njiku jedu jino, hama zinji no hambzaji jakaruza mabasa ajo ngokuti ajizivi kubesera divi riri rese ro poritika. (Apok. 13:​16, 17) Ngozvapi zvakavabesera kuti vaite izvi? I kuthemba kwavo cigondiso ca Jehovha cokuti: “Inini andizokusiyi, inini andizokuregeri.” (Vahe. 13:5) Ngo kudaro, tinoita zvese zvatinokwanisa kuti tiwane mare inokwana kuti tizoshandise paya patinonga taavasharuka, cimwenizve, tinothemba kuti Jehovha anozotibesera. w25.03 29 ¶13-14

Jehovha aaveteri kuti itusu tikure ku divi ro ku mujimu ticina besero riri rese. Vaya vari kushanda inga vahavisi no vajijisi mu ungano vakanasiririka kuti vabesere hama imwe nga imwe kuti ive Mukristu “wakura” ku divi ro ku mujimu kuitira kuva no ‘mugariro jakakwana jo mundhu wakura inga zvaari Kristu.’ (Vaef. 4:​11-13) Jehovha anotibeseravo ngo kutipa mujimu wake mucena kuti ‘tirangarire inga ndi Kristu.’ (1 Vak. 2:​14-16) Kunja kwa zvondhozvo, Jehovha wakafemera vatari vo Mavhangeri marongomuna kuitira kutibesera kuziva manera airangarira Jesu, kubhuya no kuita basa rake pasi pano. Ngo kutevejera manera Jesu airangarira no kuita, tingakwanisa kuva Makristu akura. Asi kuti tive Makristu akura, tinodikana ‘kujija zvizinji ngo pamusoro pa Kristu, kupinda zviya zvatakajijaya pakutanga.’ Kana kuti jijiso jo kutanga ngo pamusoro pa Kristu. w24.04 4-5 ¶11-12

Njiku jese tinoda kutema zvivaringo. Zvivaringo zvimweni zvakadari inga ndinoda kuhenyi comangwanani kana ndicito ndaenda kovata, zvakareruka kuzviita. Asi kuno zvivaringo zvimweni zvinonesa maningi kuda kuzviita. Zvimweni zvingapsasa uhomi hwedu, mudakaro wedu, ukama hwedu, no kunamata kwedu. Tinoda kuti zvivaringo zvedu zvitibesere no kubeseravo mbhuri yedu. Kunja kwa zvese izvi, tinoda kuti zvivaringo zvedu zvidakajise Jehovha. (Varo. 12:​1, 2) Ciro cinosisira cinozomubesera kuti muteme civaringo caushoni ngo co kuziva zvese zvinobatanijwepo. Ngenyi izvi zvinosisira? Amborangariranyi kuti mundhu ariwese ari kuhwaja, woenda kovhunja medhiko ngo pamusoro po ndhendha yake inonesa maningi. Kureva kuti medhiko waizotema civaringo co kurapa mundhu ari kuhwajaro acito atanga apsakisisa kuti ngozvapi zvaari kuzwa? Zvakajeka kuti haiwa. Imwimwi munozotemavo zvivaringo zvaushoni, kudari mukatanga marangarira ngo kungwarira kwese ngo pamusoro po zviro zvinobatanijwa pa shwiroyo. w25.01 14 ¶1-3

Tinozivenyi ngo pamusoro po unyasha una Jehovha? Jehovha wakakhombijisa kudini kuti “aadi kuti vandhu vafe”? (2 Ped. 3:9) Vonanyi manera Jehovha akakhombija unyasha kuno vandhu vamweni vakaita zvishashi zvikuru. Inga muezaniso, Mambo Dhavhidhi wakaita uhure no kuuraya. Asi iyena wakakhauya, ndiyo ndava Jehovha wakamukhombijira unyasha no kumuregerera. (2 Sam. 12:​1-12) Mambo Manasa mu upenyu hwake wakaita zviro zvakashatisisa. Pikija pa mugariro wakadari, Jehovha wakavona kuti Manasa waingadi akhauya kamare, ndiyo ndava wakamuregerera. (2 Kro. 33:​9-16) Muezaniso iji jinovonesa kuti Jehovha anokhombijira unyasha paya pazvinonga zvecidikana. Anozomusa vandhu vokuti pikija vakaita zvishaishi zvakakura, vakakhombija kukhauya. w24.05 4 ¶12