Apokaripsi
8 Iyena paakafunungura cinamiro co cinomwe, kudenga kwakanyarara mukati mo bindikati ro nguva. 2 Ndakavonazve ngirozi nomwe jainga jakaima pamberi pa Mwari, ijona jakapuwa mbhayapaya nomwe.
3 Pakaguma ngirozi imwenizve yainga yakabata mujiyo wo rubani wo goridhi. Iyona yakaima phedo no artari. Yakapuwa rubani hwakawanda maningi kuti iite mupiro pamwepo no mukumbiro yo vakasanwa vese panyezuru po artari. Artari yondhoyo yainga iri pamberi po cigaro co umambo. 4 Mu nyara mo ngirozi iyi, makabuda usi hwo rubani hwaienda kuna Mwari pomwe no mukumbiro jo vakasanwa. 5 Asi ngirozi iya yakabata mujiyo wo rubani ngo kukasika, youzaja ngo muriro wo pa artari yoikhandira pasi. Kwakava no mbheni no maizwi no kupaja ko mbheni pomwe no kuzungunyika ko pasi. 6 Ngirozi nomwe jiya jainga jakabata mbhayapaya nomwe, jakanasirira kuti jirije.
7 Ngirozi yokutanga yakarija mbhayapaya yayo. Kwakava no nvura yo mapuwe no muriro wakavhengwa no ngazi, izvi zvakakhandihwa pasi pano, divi doko* ro pasi pese rakapera kupsa, divi doko* ro muti yese yakapera kupsa no divi doko* ro ndhonve jese jakapera kupsa.
8 Ngirozi yocipiri yakarija mbhayapaya yayo. Ciro cakaita inga dundhu guru raibwaka, rakakhandihwa mu jombe. Divi doko* ro jombe rese rakaita ngazi; 9 divi doko* ro zvisikwa zvinopona zviri mujombe zvakafa, divi doko* ro piketi jo mujombe jakaphwanyika.
10 Ngirozi yocitatu yakarija mbhayapaya yayo, ndhondho huru yaibwaka inga mwenje* yakambhwera yecivha kudenga, yombhwerera panyezuru po divi doko* ro murambo jese pomwe no ndau jese jinobuda kumwa. 11 Ndhondho iyi inodanijwa kuti Muti Unovava.* Divi doko* ro kumwa yese yakavava, vandhu vazinji vakafa ngo pamusoro po kumwa iyi, ngokuti kumwa iyi yakavava.
12 Ngirozi yo cirongomuna yakarija mbhayapaya yayo. Kurira ko mbhayapaya uku kwakagumira divi doko* ro zuva no divi doko ro mweji no divi doko ro ndhondho, kuti mativi madoko azvo aite cidima, divi doko ro masikati ritame ruvheneko, zviitikevo zvondhozvo no usiku.
13 Inini ndakasota, ndozwa hokotora yecimburuka kudenga, yecikhuwa,* yeciti: “Nyathwa, nyathwa, inyathwa ku vandhu vari pasi pano, ngokuti kwasara ngirozi ndhatu jiri kuda kurija mbhayapaya yajo!”