Genesisi
39 Josefa wakaendeswa Ejipita. Muejipita waidanijwa Potifari, wainga muimiriri wo banje ra Faro no mutungamiriri wo vangwariri, wakamutenga no Vaishimaeri vakamuendesaya kondhoyo. 2 Asi Jehovha wainga na Josefa. Ngo kudaro, iyena waibudirira maningi, wova mutungamiriri wo nyumba ya patarau wake, mu Ejipita. 3 Patarau wake wakavona kuti iyena wainga na Jehovha, Jehovha waimuita kuti abudirire mu zvese zvaaiita.
4 Josefa waidakarihwa maningi ndi Potifari. Ngo kudaro, Potifari wakamugaja kuti atungamirire pamuzi pake no kumuita kuti atungamirire zviro zvake zvese. 5 Kuvhira paakagajwa ndi Potifari kuti atungamirire pamuzi pake no zviro zvake zvese, Jehovha wakakomborera mu Ejipita uwu ngo ndava ya Josefa. Makomborero a Jehovha akava panyezuru po zviro zvese zvainga pamuzi no mumunda. 6 Pa kupejisira, Potifari wakasiya zvese mu nyara ja Josefa. Potifari aacaineseka ngo zviri zvese. Asi waineseka ngo zvokuha zvake basi. Kusiyapo izvo, Josefa wainga akaseja,* wova no ciimo cakanaka.
7 Zvakazoitika ngo zvokuti mukaji wa patarau wake wakatanga kusota Josefa, woti: “Vatanai na inini.” 8 Asi iyena wakaramba, wovhunja mukaji wa patarau wake kuti: “Pa zviro zvese zvandinoita pano, patarau wangu avakai-kai ndizvona. Ivona vakandipekeja zviro zvese kuti ndizvingwarire. 9 Apana mundhu mukuru kupinda inini pamuzi pano, ivona avazivi kundirambira ciri cese, vakandirambira imwimwi basi, ngokuti muri mukaji wavo. Waro ndingaitisa kudini cishaishi cakakura kudari, ndoshaishira Mwari?”
10 Ngo kudaro, iyena waindovhunjirira Josefa njiku jese, asi aazivi kutendera kuvatana naye kana kugara naye. 11 Asi njiku imweni paakanghwina mumba kuenda koita basa rake, maenga mucina mushandiri umweni mumbemo. 12 Mukaji wa patarau wake wakamubata ngo nguvo yake, wonanga kuti: “Vatanai na inini.” Asi iyena wakasiya nguvo yake iya munyara make, wotizira kunja. 13 Paakandovona kuti Josefa wasiya nguvo yake munyara jake wotizira kunja, 14 iyena wakatanga kukhuwa* ecidanija vandhu vo pamuzi pake eciti: “Vonanyi! Muhebheru uwu wakaviiswari ngo mwamuna wangu, ari kuda kutishoresa. Iyena waviya kondiri ecida kuvatana na inini, asi ndakhuwa* ngo izwi rangu rese. 15 Paandondizwa ndecikhuwa,* wasiya nguvo yake pamutivi pangu wotizira kunja.” 16 Pasure pazvo, wakasiya pamutivi pake nguvo ya Josefa iya, mbhera patarau wake voviya.
17 Perapo iyena wakavhunja patarau wa Josefa zviro zvondhozvo, eciti: “Muhebheru uwu wamakativiisirari wakaviya ecida kundijipa. 18 Asi pandandotanga kukhuwa,* wasiya nguvo yake pamutivi pangu, wotizira kunja” 19 Patarau wa Josefa paakandozwa zvakananga mukaji wake, kuti: “Nga izvi zvandiitira mushandiri wenyu,” wakanyangajwa maningi. 20 Ngo kudaro, patarau wa Josefa wakamutora womudira mukadheya, ndau inofungihwa vasungwi va mambo, wogara mondhomo.
21 Asi Jehovha wakaenderera mberi ana Josefa, womuitira rudo hucikacinji no kuita kuti aitihwe unyasha ngo mutungamiriri wo kadheya iya. 22 Ngo kudaro, mutungamiriri wo kadheya iya wakagaja Josefa kuti avonerere vasungwi vese. Zviro vese zvovaiita, ndiyena waizvivonerera. 23 Mutungamiriri wo kadheya iya apanazve caaivonerera caitungamirihwa ndi Josefa, ngokuti Jehovha wainga na Josefa, Jehovha waiita kuti zvese zvaaiita Josefa zvibudirire.