Indlela Abantu Abangaboniyo Abancediswa Ngayo
Emhlabeni wonke kucatshangelwa ukuthi abantu abangu-43 miliyoni ababoni lokuthi abangu-295 miliyoni ababoni kuhle.a Kuyadanisa ukuthi abantu abanengi abanjalo abaphathwa kuhle.
UNkulunkulu ubabona njani abantu abangaboniyo? IBhayibhili lithini ngabo? OFakazi bakaJehova bona babancedisa njani?
UNkulunkulu ubabona njani abantu abangaboniyo?
IBhayibhili liyakucacisa ukuthi uJehovab uyabathanda kakhulu abantu abangaboniyo. Ufuna baphathwe kuhle futhi labo bayithole imfundo evela kuye. Uphinda abathembise lekusasa elihle kakhulu.
Ivesi: “Uqalekisiwe umuntu obangela ukuthi umuntu oyisiphofu aphambuke endleleni.”—UDutheronomi 27:18.
Itshoni? Ezikhathini zakudala, uMthetho owawufakwe nguNkulunkulu wawuvikela abangaboniyo ukuthi bangaphathwa kubi.
Ivesi: “UNkulunkulu kakhethi.”—ImiSebenzi 10:34.
Itshoni? UNkulunkulu uyabaqakathekisa kakhulu abantu abangaboniyo ngendlela aqakathekisa ngayo labo ababonayo.
Ivesi: UJesu “wenza leziphofu ezinengi zabona.”—ULukha 7:21.
Itshoni? Ngesikhathi uJesu esemhlabeni wenza abantu abangaboniyo babona. Lokhu kwakutshengisa okuzakwenziwa nguMbuso kaNkulunkulu esikhathini esizayo.
Ivesi: “Amehlo eziphofu azavulwa.”—U-Isaya 35:5.
Itshoni? UJehova uthembisa ukuthi bonke abangaboniyo bazabona nxa uMbuso wakhe usubusa emhlabeni futhi sekuseduze ukuthi lokho kwenzakale.
Indlela oFakazi bakaJehova abancedisa ngayo abantu abangaboniyo
OFakazi bakaJehova abasezindaweni ezitshiyeneyo batshumayeza abantu abangaboniyo bebatshela ngethemba elivela kuNkulunkulu. Sikwenza njani lokhu?
Siphrinta iBhayibhili lamabhuku achasisa okutshiwo liBhayibhili ngebraille, siphinde sibe lamabhuku alamabala amakhulu, sibe lokurekhodiweyo lamavidiyo alungiswa ngendlela yokuthi kuba lula ukuthi asetshenziswe ngabangaboniyo kanye labangaboni kuhle.
Siba lemihlangano yebandla njalo wonke umuntu ukhululekile ukuthi abuye, okugoqela labangaboniyo.
Nxa umuntu efuna ukufunda iBhayibhili, siyamlanda simfundise.c
Senza konke lokhu kungelambadalo. Ngenxa yani? Ngenxa yokuthi uJesu wathi: “Liphiwe mahala, phanini mahala.”—UMathewu 10:8.
OFakazi bakaJehova bayafuna sibili ukuncedisa abantu abangaboniyo. Labo abafuna ukukhonza lathi uJehova bazathola abangane abazabakhuthaza ukuthi benze okuhle njalo abazabanceda. Zwana ukuthi abanye oFakazi bakaJehova abangaboniyo bathini.
UTalita Alnashi ohlala eSweden ulohlupho lokungaboni kuhle futhi lokhu kwamqalisa esasemncane. Bukela uzwe ukuthi abazali bakhe bamfundisa njani iBhayibhili lokuthi abangane bemuli yangakibo batshengisa njani ukuthi bayabathanda lokuthi bayabasekela.
UJames Ryan ohlala e-United States wazalwa engezwa endlebeni futhi ngokuhamba kwesikhathi wacina engasaboni. Bukela uzwe ukuthi kuyini okumenza ahlaliseke futhi athokoze empilweni.
UCynthia Pablo ohlala ePhilippines kezwa endlebeni futhi kaboni. Abantu akhonza labo bamncedisa njani ngesikhathi kulomkhuhlane omubi weCOVID-19? Bala indaba yakhe esihlokweni esithi: “Congregation Supports Deaf and Blind Sister During Pandemic.”
Yiziphi izinto esilazo ezinceda abangaboniyo ukuthi bafunde iBhayibhili?
Amabhuku ebraille. Senza amaBhayibhili ebraille, kungabe kungamabhuku wonke eBhayibhili kumbe kuyingxenye yawo. (Ukuze ubone ezinye izindimi ezilamaBhayibhili ebraille, khangela ibhokisi elithi “INguqulo Yomhlaba Omutsha ngeBraille.”) Siphinda senze lamabhuku amanengi awebraille achasisa okutshiwo liBhayibhili. Kulabo abangathanda ukufunda ibraille, silebhuku elithi Learn to Read Braille elenzelwe ukufundisa abangaboniyo ukuthi babale ngebraille bencediswa ngumuntu obonayo.
Nxa ufuna ukuthola amabhuku ebraille, khuluma loFakazi kaJehova kumbe ucele bakuphathele.
Hamba ku-jw.org udawunilode amafayili ongawasebenzisa ku-notetaker device.d
Esilakho okunganceda abangaboni kuhle. Silamabhuku amanengi aphrintwa ngamabala amakhulu. Kanti njalo umuntu uyenelisa ukukhulisa amabala kuwebhusayithi yethu i-jw.org ukuze enelise ukubala kuhle. Le-JW Library layo iyamvumela ukuthi enelise ukukhulisa amabala alokho akubalayo.
Nxa ufuna ukuthola amabhuku alamabala amakhulu, khuluma loFakazi kaJehova kumbe ucele bakuphathele.
Ungenelisa ukudawuniloda ibhuku elilamabala amakhulu kuwebhusayithi yethu i-jw.org.
Amabhuku arekhodiweyo. IBhayibhili lethu okuthiwa yiNguqulo Yomhlaba Omutsha lirekhodwa ngezindimi ezedlula 200. Siphinda sirekhode amabhuku amanengi achasisa lokho okutshiwo liBhayibhili futhi kuyabe kuchasiswa lemifanekiso esemabhukwini lawo.
Lalela kumbe udawunilode okurekhodiweyo ku-jw.org laku-JW Library.
Ungadawuniloda amafayili avuma ukubala okubhaliweyo ngezempucuko.
Amavidiyo alamazwi achasisa okwenzakalayo. OFakazi bakaJehova balamavidiyo asekelwe eBhayibhilini alamazwi achasisa okwenzakalayo ngezindimi ezedlula 100. Amavidiyo la anceda abantu ukuthi bazwisise lokho iBhayibhili elikutshoyo futhi bazimisele ukukwenza.
Ngena ku-inthanethi ubone amanye amavidiyo la:
Imihlangano emikhulu lemincane esiba layo. OFakazi bakaJehova balamabandla abahlangana kuwo maviki wonke endaweni ezitshiyeneyo ukuze bafunde ngoJehova njalo bamkhonze. Siphinda sibe lemihlangano emikhulu minyaka yonke. Kweminye imihlangano yethu siyabukela amavidiyo futhi siba leqiniso lokuthi labo abafuna ukulalela ama-audio alamazwi achasisa okwenzakalayo bayawathola. Nxa kuvuma, emihlanganweni yethu emincane lemikhulu siyabatolikela abangezwayo endlebeni labangaboniyo. Samukela wonke umuntu njalo asikhethi.
Dinga lapho okungenelwa khona imihlangano yaboFakazi bakaJehova eduze lalapho ohlala khona.
Zwana okunengi ngemihlangano yethu yesabelo esiyenza minyaka yonke.
Woba khona eSikhumbuzweni sokufa kukaJesu, umbuthano oqakatheke kakhulu esiwenza minyaka yonke.
UJosé Luis Ayala ohlala eMexico wazalwa engezwa endlebeni njalo wacina engasaboni eseleminyaka engu-29. Bukela ividiyo le ubone ukuthi imihlangano yethu imnceda njani empilweni yakhe lokuthi wancediswa njani ukuthi abe yingcitshi ekufundiseni iBhayibhili.
a Umuntu ongaboni kuhle okukhulunywa ngaye lapha uyabe elohlupho olungelaphekiyo njalo lumvimbela ukuthi enze ezinye izinto empilweni. Kanti njalo nxa kukhulunywa ngabantu abangaboniyo esihlokweni lesi kutshiwo abayiziphofu labangaboni kuhle.
b UJehova libizo likaNkulunkulu. (IHubo 83:18) Khangela isihloko esithi “Ngubani UJehova?”
c Ungacela ukutshengiswa ukuthi isifundo seBhayibhili samahala senziwa njani.
d Umuntu ongaboniyo angasebenzisa i-notetaker device ukuze abale izinto ze-braille njalo umtshina lo ungenelisa ukumbalela. Nxa umuntu elomtshina lo akusadingeki ukuthi abe lamabhuku amanengi awe-braille.