Ibhuku Lika-Isaya Lingakududuza

1-2. UJehova usincedisa njani nxa sidanile kumbe sikhathazekile?

AKE SITHI nangu umntwana lapha uyakhala, ukhala kabuhlungu kathuliseki. Engxenye okungabe kumzwisa ubuhlungu yikuthi sebethuthela kweyinye indawo. Bonke abangane akade elabo usezabatshiya emuva kumbe engxenye uzwa ubuhlungu ngento ayiphambanisileyo. Umama omthandayo umntanakhe ubezakwenzani? Ubezamthatha amgone amesule inyembezi ambuze ukuthi engabe ehlutshwa kuyini, abesemduduza aze amtshele ukuthi uyamthanda.

² UJehova laye uzifanisa lomama olothando oduduza umntanakhe. Uthi: “Ngizaqhubeka ngiliduduza, njengomama oduduza indodana yakhe.” (Isaya. 66:13) Akulamzali olothando olwedlula olukaJehova. (Isaya. 49:15) UJehova usiphe iLizwi lakhe iBhayibhili elilamazwi asiduduzayo lasiqinisayo nxa sidanile kumbe sikhathazekile.—Rom. 15:4.

3. Sizaxoxa ngani esihlokweni lesi?

³ Ibhuku lika-Isaya lilamazwi aduduzayo avela kuJehova. (Isaya. 40:1) UBaba wethu olothando waphefumulela umphrofethi u-Isaya ukuthi abhale amazwi ayezaduduza abantu bakhe ababephakathi kobunzima. Lathi siyakudinga sibili ukududuzwa ngoba siphila ‘ezikhathini ezinzima.’ (2 Thim. 3:1) Esihlokweni lesi sizaxoxa ngamanye amavesi esebhukwini lika-Isaya angasiduduza futhi asiqinise nxa: (1) izinto zesithe zatshintsha empilweni yethu, (2) nxa silokhe sizithonisisa ngamaphutha esawenzayo, (3) nxa sidabukile ngenxa yokufelwa.

NXA IZINTO SEZITHE ZATSHINTSHA

4. Singezwa njani nxa izinto sezithe zatshintsha?

⁴ Izinto zingatshintsha empilweni yethu singalindelanga. (Umtshu. 9:11; 1 Khor. 7:31) Kungavuka kuleziphithiphithi lapho esihlala khona kumbe siphelelelwe ngumsebenzi loba siswele imali. Kwesinye isikhathi singaqabuka sesibanjwe umkhuhlane othile kumbe sokuthiwa sitshintshe umsebenzi ebesiwenza enhlanganisweni. Izinto ezinjalo zingasikhathaza siswele lokuthi sibambe ngaphi. Omunye umfowethu okuthiwa nguJoseph owayesesebenze eBhetheli okweminyaka engaba ngu-17 wacelwa ukuthi aphume eBhetheli ayephayona. Uthi: “Utshintsho lolu lwalunzima. Ngaswela lokuthi ngizaqalisela ngaphi njengoba ngasengizijayelele impilo yeBhetheli.” Nxa impilo yethu isithe yatshintsha, yiwaphi amavesi angasiduduza?

5. Kuyini uJehova asithembisa khona ku-Isaya 42:16? (Khangela lomfanekiso.)

⁵ Bala u-Isaya 42:16. Evesini le uJehova ukhuluma ngokuthi uzakhokhela ‘iziphofu endleleni ezingayaziyo atshintshe lobumnyama obuphambi kwazo kube yikukhanya.’ Nxa izinto sezithe zatshintsha empilweni yethu singaphelelwa kube angathi sesiyiziphofu ezihamba endleleni ezingayaziyo kumbe kube angathi sesiphakathi kobumnyama kumbe sizibone angani sihamba endaweni emagodigodi. Kungaba angathi siphakathi kwesinanga esiminyeneyo kumbe igusu elimnyama tshu singaboni lokuthi sizaphuma njani. Lanxa singaze sibe phakathi kohlupho olunjani uJehova usiqinisekisa ukuthi kasoze asilahle uzasikhokhela asincedise. Uyabe ezasibamba ngesandla ahambe lathi futhi asikhanyisele ukuze senelise ukudabula phakathi kobumnyama obungabe bukhona. Uphinda alungise lendlela emagodigodi esingabe sihamba ngayo kube angathi yindawo echayileyo. UJehova ukwenza njani lokhu? Usipha amacebo asincedayo esebenzisa iLizwi lakhe lenhlanganiso yakhe. (Hubo. 119:105; Isaya. 30:21) Angaphinda athume abafowethu labodadewethu kumbe abanye abantu nje ukuthi basincedise. Lanxa singabe siphelelwe singakwazi ukuthi kuzahamba njani, esikwaziyo yikuthi uJehova uzahlala esincedisa ngoba uyasithanda.—Isaya. 41:10; 1 Phet. 5:​6, 7.

6. Kuyini okumele sihlale sikukhumbula lanxa izinto zingatshintsha?

⁶ Umfowethu uJoseph esike sakhuluma ngaye uthi bazibonela indlela uJehova abancedisa ngayo yena lomkakhe sebecelwe ukuthi basuke eBhetheli. Uthi: “UJehova wasincedisa kakhulu. Wathuma abafowethu labodadewethu ukuthi basincedise ngendlela ezitshiyeneyo. Wasiduduza, wasinakekela futhi ulokhe esenza njalo lakhathesi.” Nxa lakuwe izinto sezithe zatshintsha, yazi ukuthi uJehova uzakukhokhela futhi akuqinise kungelandaba ukuthi utshintsho lwakhona lukhanya lunzima okunganani. (Isaya. 54:10; 58:11) UJoseph uqhubeka esithi: “Ngiyayithanda eyinye ingoma ye-Broadcasting elamazwi athi, ‘elakusasa kalaziwa kodwa uJehova ngiyamazi.’a Lanxa izinto zingahamba ngendlela ebesingayilindelanga esikwaziyo yikuthi uJehova uzahlala esincedisa, kasoze asilahle.”

NXA SIZITHONISISA NGAMAPHUTHA ESAWENZAYO

7. Umuntu angezwa njani nxa ewonele uJehova?

⁷ Nxa singatshela abadala ngesono esikhulu esisenzileyo bayasincedisa ukuthi siphinde siqinise ubungane bethu loJehova lathi besesizama ngazo zonke indlela ukuthi singasiphindi lesosono. (Zaga. 28:13; Jak. 5:​14-16; 1 Joh 1:9) Lanxa kunjalo kungenzakala ukuthi sibe silokhu sidliwa yisazela sizithonisisa ngento esayenzayo. Ungabe ulokhe uzibuza usithi, ‘Kambe ukuthi uJehova ungithethelele sibisibili?’ (2 Khor. 2:7) Khona kuyazwisiseka ukuthi kungani umuntu engazibuza umbuzo lo ngoba vele akulula ukukhohlwa isono osenzileyo. Inkosi uDavida yathi: “Angilakuthula ngaphakathi kwami ngenxa yesono sami.” Yaphinda yathi, “Sengimdambiyana futhi ngicobekile.” (Hubo. 38:​3, 8) Nxa kuyikuthi lawe uzwa njalo ngowakwenzayo, ibhuku lika-Isaya lingakududuza.

8-9. U-Isaya 1:18 uthini ngendlela uJehova athethelela ngayo?

⁸ Bala u-Isaya 1:18. Ivesi le isinceda sizwisise indlela uJehova athethelela ngayo. Uthi lanxa izono zethu “zibomvu gebhu” yena uzazenza “zibe mhlophe njengongqwaqwane.” Kutshoni lokho? Lapha uJehova uyasiqinisekisa ukuthi nxa angasithethelela, uhle asicitshe isono akhohlwe ngaso. Kasoze abe elokhe esithonisisa ngaso.

⁹ Lanxa uDavida walala lenkosikazi yeyinye indoda waphinda wabulalisa indoda yakhona, uJehova wamthethelela futhi ngokuya kwesikhathi wathi uDavida yindoda eqotho. (2 Sam. 11:​3, 4, 14, 15; 12:13; 1 Amakho. 9:​4, 5) UJehova wakhumbula ngokuthembeka kukaDavida wakhohlwa ngamaphutha akhe. Lathi nxa singaphenduka ngenhliziyo yonke uJehova uyasithethelela abesesincedisa ukuthi simkhonze sichelesile singadliwa yisazela. Manje yiwaphi amanye amavesi asebhukwini lika-Isaya angasinceda nxa silokhe sihlutshwa ngamaphutha esawenzayo?

10. U-Isaya 38:17 uyichasisa njani indlela uJehova athethelela ngayo?

¹⁰ Bala u-Isaya 38:17 lamabala angaphansi. Amazwi athi “izono zami zonke usuziphosele ngemva kwakho” angabekwa langokuthi “izono zami zonke usuzisusile phambi kwakho.” Ivesi le ithi uJehova uyathatha izono zomuntu aziphosele ngemva kwakhe lapho angasoze abe elokhe ezibona khona kumbe ecabanga ngazo. Elinye ibhuku elichasisa amavesi aseBhayibhilini lithi amazwi la angabekwa langokuthi “uzicitshile izono zami kwangani vele azizange zibe khona.” Yikho-ke nxa uJehova esesithethelele uyacitsha izono zethu kube angani asizange sike siphambanise. Uyabe engasoze aphinde ayivuse indaba yakhona kumbe asijezisele izono lezo ngoba ziyabe sezicitshiwe zingasekho. Uze athi: “Kangisoze ngizikhumbule izono zakho.” (Isaya. 43:25) Kuyaduduza sibili ukwazi lokho. Manje nxa kuyikuthi uJehova uMahluleli Omkhulu usezicitshile izono zethu, singobani thina ukuthi sibe silokhu sizithonisisa ngazo?

11. Kuyini uJehova akuqakathekisa kakhulu lanxa kungabe kulamaphutha esawenzayo? (Khangela lomfanekiso.)

¹¹ Loba nini lapho ozwa khona udliwa yisazela kumbe uzithonisisa ngokwenzakala kudala kuhle ukuthi uzikhumbuze indlela uJehova athethelela ngayo. Uthethelela ngokupheleleyo, kafanani labantu abangakuxolela kodwa basale bekubambele isikhwili futhi kakunineli khatshana kumbe akwenyanye ngenxa yamaphutha owawenzayo. (Isaya. 57:16) Yena akuqakathekisa kakhulu ngesikwenza khathesi lokuzimisela kwethu ukuqhubeka simkhonza kodwa amaphutha akudala sowawalahlela khatshana. (Isaya. 55:7) UJehova uyasithanda kakhulu yikho esithethelela nxa singaphambanisa. Ngakho ungavumi ukuthi amaphutha akudanise uze ubhazalale ekukhonzeni, phela uJehova ukugcinele izibusiso ezinhle phambili.

NXA SIDABUKILE NGENXA YOKUFELWA

12. Singezwa njani nxa singafelwa?

¹² Ukufelwa kungasidabula emoyeni futhi ubuhlungu bakhona bungadonsa okweminyaka leminyaka. Kwesinye isikhathi singazibuza ukuthi kungani uJehova wayekela umuntu esimthanda kangaka wasitshiya. Abazali bomunye umfowethu okuthiwa nguMichael batshela endlini. UMichael uthi: “Inhliziyo yami yadabuka kakhulu ngezwa ubuhlungu engingeke ngibuchasise. Lanxa ngangikwazi ukuthi uJehova ayisuye okubangeleyo lokho, ngamzondela kakhulu ngizibuza ukuthi yindaba engabavikelanga.” Engxenye lawe uyake uzwe njalo. Manje uJehova ubaduduza njani abantu abadabuke kangako?

13. UJehova usithembisani ku-Isaya 25:8?

¹³ Bala u-Isaya 25:8. UJehova uthi “uzakuqeda ukufa kungasaphindi kubekhona.” Akucabange ukuthi kuzabe kunjani kungaselamuntu ofayo, lobuhlungu bokufelwa bungasekho. (Isaya. 35:10) Phela khathesi ukubona nje ingcwaba kungahle kukuthunuke kukuvusele amanxeba kodwa uJehova uthembisa ukuthi konke lokhu uzakuqeda. Uthi siyeza isikhathi lapho esizakholisa khona impilo labantu esibathandayo sonke sesiqine saka singesabi ukuthi ngelinye ilanga bazavuka bengekho. Lelo ayisilo phupho ngoba sithenjiswe nguJehova ngokwakhe, uNkulunkulu ongehlulwa lutho.—Isam. 21:​4, 5.

14. Amazwi aku-Isaya 26:19 akwenza uzwe njani? (Khangela lomfanekiso.)

¹⁴ Bala u-Isaya 26:19. UJehova uthembisa lokuthi uzavusa abafileyo. Uthi yena ‘izidumbu zabantu bakhe zizavuka.’ Amazwi la atshengisa ukuthi uJehova uyabakhumbula labo abangasekhoyo yikho esithi izidumbu lezo ngezakhe. Kasoze abakhohlwe futhi usebeke ilanga lapho azabavusa khona. Njengoba nje amazolo evuselela izimila esezitshile, loJehova uzabavusa sibili asebasitshiyayo njengoba vele engumthombo wokuphila. Akucabange ukuthi kuzaba mnandi njani ngalesosikhathi sesihlangabeza izihlobo zethu.—Khangela loMakho 5:42.

15. Ukucabanga ngokuvuswa kwabafileyo kuzakunceda njani?

¹⁵ Lanxa ukwazi ukuthi abafileyo bazavuswa kungeke kubuqede ubuhlungu esibuzwayo, okusiduduzayo yikwazi ukuthi uJehova kabakhohlwanga. UMichael esike sakhuluma ngaye laye kwamduduza lokho. Uthi: “U-Isaya 26:29 wangenza ngazwisisa ukuthi uJehova kabakhohlwanga abazali bami uzahlala ebakhumbula kuze kube yisikhathi lapho azabavusa khona. Ukwazi lokho kuyangiduduza futhi kuyangiqinisa.” Kwangathi lathi singahlala sikhumbula ukuthi uJehova uzabavusa asebasitshiyayo. Ukwenza njalo kuzawathoba amanxeba okufelwa.

16. Yiwuphi umbhalo oyake ukududuze nxa usebunzimeni?

¹⁶ Sesike sahlola amavesi asebhukwini lika-Isaya angasiduduza nxa izinto sezithe zatshintsha empilweni yethu kumbe nxa silokhu sizithonisisa ngesakwenzayo kumbe sisebuhlungwini ngenxa yokufelwa. Siyambonga kakhulu uJehova ngokusiduduza ngeLizwi lakhe! (Hubo. 94:19) Wena ikhona yini ivesi ejayele ukukududuza nxa usebunzimeni? Nxa ikhona, zama ukuyibamba ngekhanda kumbe uyibhale phansi loba uyinamathisele lapho ozahlala uyibona khona. Kwangathi iLizwi likaBaba wethu uJehova lingahlala likududuza futhi likuthoba amanxeba ongabe lawo.