Ungahluleli Abanye

1-2. Kuyini okwenza abantu batshiyane?

KULOMUNTU owake wakusola yini kumbe wakuchothoza ngenxa yesinqumo owawusenzile? Wena-ke uyake ubasole yini abanye ngezinqumo zabo? Inengi lethu siyake sahlulelwe ngabanye kumbe sahlulele abanye.

² Lanxa sonke sikhonza uJehova akumelanga kusimangalise ukuthi singakhetha ukwenza izinto ezitshiyeneyo ngoba vele kasifanani. Ngeke kwenze ukuthi sicabange ngendlela efananayo ngoba sakhulela ezimulini ezitshiyeneyo futhi sakhuliswa ngendlela ezitshiyeneyo. Izinto ezitshiyeneyo esahlangana lazo empilweni lazo zenza singafanani labanye abantu. Lanxa kunjalo kumele sihlale simanyene singavumeli lutho ukuthi lusehlukanise.—Efe. 4:3.

3. Kuyini okungenza sahlulele abanye?

³ UmKhristu usengenza isinqumo sakhe kodwa wena ubusubona angani umuntu lowo ulahlekile. Kungabalula ukuthi umlande uyemkhuza kumbe ucine usumkhuluma lakwabanye. Mhlawumbe uyabe ubona angani uyamnceda ngoba sonke siyabathanda abafowethu labodadewethu futhi sibafisela okuhle. (Zaga. 17:17) Siyabe singafuni ukubabona belahleka kumbe besenza loba yini engaphambanisa ubungane babo loJehova.

4-5. Kuyini okumele sikwenze nxa umKhristu angakhetha ukwenza into ebesingeke siyenze?

⁴ Nxa kuyikuthi okukhethwe ngomunye umKhristu akukuphathi, sokumele umlande yini uyekhuluma laye? Lokho kuzakuya ngokuthi lowomuntu wenzeni. Nxa kuyikuthi afuna ukukwenza kuyaphikisana lalokho okufunwa nguJehova, kungaba kuhle ukuthi umncedise alungise indlela acabanga ngayo. (Zaga. 27:​5, 6) Kodwa ake sithi lokho afuna ukukwenza akuphikisani lemithetho kaNkulunkulu, ubuzakwenzani? Ubuzathini nxa ekhethe ukwenza okutshiyene lalokho obungakwenza? Amazwi akuRoma 14:1 angakunceda. Athi: “Lingahluleli muntu nxa libona izinto ngendlela etshiyeneyo.”

⁵ Lanxa kunjalo kwesinye isikhathi kuba nzima ukwekela abanye bazenzele izinqumo. Esihlokweni lesi sizaxoxa ngokuthi kungani kungamelanga sahlulele abanye lokuthi kungani kungamelanga singene endabeni ezingelani lathi. Khathesi asixoxeni ngezinto ezitshiyeneyo ezingenza abantu bacine besahlulelana.

KUYINI OKUNGENZA SAHLULELE ABANYE?

6-7. Qamba okunye okungenza sahlulele abanye.

⁶ Njengoba sike satsho, sokungenzeka ukuthi sibone izinto ngendlela ezitshiyeneyo ngoba sakhuliswa ngendlela ezitshiyeneyo. Kwezinye izikhathi singazitshela lokuthi abanye abantu bacabanga njengathi kodwa kungayisikho. Nanzi izibonelo. Esokuqala : Ake sithi kulomfowethu owafunda iqiniso esekhulile, uyise wayeyisidakwa enatha aze azikhohlwe. Ngelinye ilanga umfowethu lo uthi ezikwejisele labanye abafowethu labodadewethu, abesebabona benatha utshwala. Lokhu akumphathi yikho uyabalanda ayebatshela ukuthi abakwenzayo akuqondanga. Esesibili: Udadewethu uke wagula sibili kodwa khathesi usesilile. Kuthi kusenjalo, azwe ukuthi kulomunye udadewethu osebanjwe wonalowo mkhuhlane. Usuka lapho alande udade ogulayo, abesemtshela ukuthi nxa efuna ukusila, laye kumele asebenzise lokho yena okwamncedayo, kungaba yikudla kumbe imithi ethile. Esesithathu: Omunye umfowethu wayengena isonto ethile kodwa sowaphuma waphela kuyo. Uthi esizwa ukuthi omunye umKhristu ubesemngcwabeni kweyinye isonto acaphuke kakhulu.a

⁷ Nanzi futhi ezinye izibonelo. Esesine: Umzalwane wakhula esazi ukuthi abafowethu akumelanga bagcine indevu lokuthi akwenzi ukuthi odadewethu bagqoke amabhurugwe nxa besiya ekutshumayeleni kumbe emihlanganweni yebandla. Lanxa esekwazi ukuthi sekulotshintsho endabeni le, ulokhe etshela abanye ukuthi vele akwenzi ukuthi umzalwane agcine indevu lokuthi odadewethu kumele bagqoke izigqoko nxa besiya ekutshumayeleni kumbe emihlanganweni. Esesihlanu: Umdala webandla wazi omunye umzalwane owangezelela imfundo yakhe wacina engasakhonzi. Manje kulomunye umfowethu osakhulayo kulelobandla ofuna ukungezelela imfundo. Umdala ukhathazekile ngendaba le, uyasuka ayekhuluma lomfowethu lo labazali bakhe efuna batshintshe asebekukhethile.

8. (a) Kuyini okungenza umzali asole abanye abazali? (b) Ukuhlala sisola izinqumo ezenziwa ngabanye kungabangelani ebandleni?

⁸ Isibonelo sesithupha: Ungumzali futhi uzama ngazo zonke indlela ukukhulisa abantwabakho “ngokulaya langokuxwayisa okuvela kuJehova.” (Efe. 6:4) Kodwa uthi uyakhangela ubone angani abanye abazali abangamaKhristu bayabekelela abantwababo. Bangabe bebavumela ukuthi baphuze ukufika endlini, lokuthi badlale nje eminye imidlalo yamavidiyo futhi bebathengela lamafoni besesebancane. Umntanakho uthi enanzelela lokho abone angani wena uyamcindezela, abesesithi: “Yindaba lami ungangivumeli ngikhululeke njengabanye abantwana?” Lokho kungakwenza usole abanye abazali ngoba bayabe bekhethe ukukhulisa abantwababo ngendlela etshiyene leyakho. Okukhona yikuthi sizahlala sikhetha izinto ezitshiyeneyo, kungaba sendabeni zokuzilibazisa, ukuvakatsha, ukusebenzisa imali lokunye okunenginengi. Lanxa singabe singakuzwisisi okwenziwa ngabanye, akumelanga sivumele lutho lusehlukanise kumbe lusenze singasazwanani ebandleni.

9. Kuyini okumele sikukhumbule? (Khangela lomfanekiso.)

⁹ AmaKhristu amabili angakhetha ukwenza izinto ezehlukeneyo endabeni eyodwa futhi bobabili bangabe beqondile. (Rom. 14:5) IBhayibhili lithi amaKhristu kumele ‘avumelane emicabangweni’, okutsho ukuthi kumele alandele lokho okufunwa nguJehova. Lanxa kunjalo lokhu akutsho ukuthi asezahlala esenza izinto ezifananayo. (2 Khor. 13:11) Lanxa sonke sikhonza uJehova, izinqumo esizenzayo sezingatshiyana njengoba nje labantu bengahamba ngendlela ezitshiyeneyo besiya endaweni eyodwa. Okumele sikukhumbule yikuthi sonke nje sifuna ukuthokozisa uJehova. Yikho akumelanga sahlulele abanye ngalokho abakukhethileyo.—Mat. 7:1; 1 Thes. 4:11.

KUNGANI KUMELE SIHLONIPHE IZINQUMO ZABANYE?

10. UJakhobe 4:12 uthi kuyini esingelalungelo lokukwenza futhi kungani?

¹⁰ Zinengi izizatho eziseBhayibhilini eziveza ukuthi kumele sihloniphe izinqumo zabanye. Asixoxeni ngezinye zakhona. Asilalo ilungelo lokwahlulela abanye ezintweni ezingelani lathi. (Bala uJakhobe 4:12.) UJehova nguye uMahluleli futhi nguye olelungelo lokupha abantu imithetho. Kumele sikhumbule ukuthi umsebenzi wokwahlulela ayisiwo wethub kodwa ngokaJehova. (Rom. 14:10) Yikho akumelanga sitshone silandelela abafowethu sibasola ngabakukhethileyo sifuna benze izinto ngendlela yethu.

11. Kuyini okungenza sihlale simanyene ebandleni? (Khangela lomfanekiso.)

¹¹ UJehova kakhangelelanga ukuthi sifanane akufunayo yikuthi simanyane. Kahlekahle vele khonokho ukuthi sitshiyene yikho akuthandayo! Izinto ezidaliweyo zikwenza kube sobala lokho. Ngokwesibonelo, nxa ukhangele amadube ungabona angathi ayafanana kodwa akula elifanana xathu lelinye. Labantu abafanani. Emhlabeni kulabantu abedlula 8 bhiliyoni kodwa akulabantu abafanana xathu kukho konke. UJehova wasidala satshiyana ngoba yikho kanye ayekufuna. Kakhangelelanga ukuthi sifanane kodwa akufunayo yikuthi simanyane. Kuhle-ke ukuthi sikuvume ukuthi abantu batshiyene. Okumele sikuqakathekise yikuthi simanyane njalo sibe lokuthula lanxa silemibono etshiyeneyo futhi sikhetha ukwenza izinto ezitshiyeneyo.—Rom. 14:19.

KUNGAKHANYA NJANI UKUTHI UYABAHLONIPHA ABANYE?

12-13. Kuyini okumele ukwenze nxa isinqumo somunye singakuphathi? (UGalathiya 6:1; Khangela lebhokisi elithi: “Nxa Lingavumelani.”)

¹² Nxa umuntu ezenzele isinqumo. Nxa kuyikuthi isinqumo esenziwe ngomunye asikuphathi, nanku umbuzo ongazibuza wona, ‘Umuntu lo uphambanisile yini sibisibili kumbe okungihluphayo yikuthi ukhethe ukwenza okutshiyene lalokho mina ebengingakwenza?’ Nxa kuyikuthi uyalahleka kumbe wenze into engavumelani lezimiso eziseBhayibhilini ungazibuza ukuthi, ‘Yimi yini okumele ngimqondise kumbe kumele ngicele omunye umuntu, mhlawumbe umdala webandla ukuthi abonisane laye?’ Nxa kunguwe okumele ukhulume laye zama ukubonisana laye ngomusa. (Bala uGalathiya 6:1.) Kwesinye isikhathi vele usungathola ukuthi lowomuntu kaphambanisanga, yikutshiyana kwemibono nje. Nxa kuyikuthi kunjalo, tshiyana laye ungamhluphi kumbe uhambe usumkhuluma kwabanye. Mhloniphe uvume ukuthi laye ulelungelo lokuzenzela izinqumo futhi ungamahluleli.—Rom. 14:​2-4.

¹³ Ake sithi uhambe lomngane wakho lisiyakudla ekhefa. Kambe ukuthi ubungamfosa yini ukuthi adle ukudla okufunwa nguwe? Hatshi. Ubuzamekela azikhethele. Iqiniso elikhona yikuthi lanxa angaze akhethe ukudla wena ongakuthandiyo vele akulani lawe ngoba akuyi esiswini sakho. Lawe ubungeke ukuthande ukuthi umngane wakho akufose ukuthi udle ukudla ongakufuniyo ngenxa nje yokuthi kuthandwa nguye. Yikho-ke kuhle ukuthi sibahloniphe abafowethu labodadewethu sibekele bazenzele izinqumo, singababambi ngamandla ukuthi benze lokho thina esikufunayo.

14. Kuyini okumele ukukhumbule nxa usenza izinqumo? (U-1 Khorinte 8:​12, 13)

¹⁴ Nxa usenza ezakho izinqumo. Zama ngazo zonke indlela ukungakhubi abanye ukuze kuhlale kulokuthula. (Bala u-1 Khorinte 8:​12, 13.) Kwesinye isikhathi into okhetha ukuyenza ingabe iqondile sibili kodwa iyabe izanceda ngani nxa izakhuba umfowenu?c (1 Khor. 10:​23, 24) Ezimeni ezinjalo kuhle ukuthi ucabange ngabanye kulokuthi ubambelele kulokho okufunwa nguwe. (Rom. 15:1) Kodwa angithi sisanda kutsho nje ukuthi abantu kumele bahloniphe izinqumo zabanye? Ye kunjalo sibili, kumele bahloniphe izinqumo zethu njengoba nje lathi kumele sihloniphe ezabo. Lanxa kunjalo akumelanga siwakhohlwe amazwi akuRoma 12:​18, athi: “Nxa kungenzeka futhi kusemandleni enu, hlalani ngokuthula labantu bonke.” Yikho kumele sizame ngazo zonke indlela ukuthi singakhubi abanye ukuze kuhlale kulokuthula.

15. Kuyini okungenziwa ngabadala ukuze kuhlale kulokuthula ebandleni? (U-1 Khorinte 4:6)

¹⁵ Nxa abadala bengahlonipha izinqumo zabanye kuzakuba lokuthula ebandleni. Abafakeli abanye imithetho endabeni okumele bazikhethele kuzo futhi ‘abeqeli ngale kwalokho’ okuseBhayibhilini. (Bala u-1 Khorinte 4:6.) Banamathela kulokho okusemabhukwini enhlanganiso futhi abangezeleli lokho abakufunayo. Nxa becebisa abanye basebenzisa iLizwi likaNkulunkulu, abazikhulumeli lokho ababona angani kungasebenza.—Isaya. 48:​17, 18.

16. Kungakhanya njani ukuthi umdala uyazihlonipha izinqumo ezenziwe liqula labadala?

¹⁶ Umdala uyazihlonipha lezinqumo ezenziwe liqula labadala. Nxa abadala bekhulekile, baxoxisana ngezimiso eziseBhayibhilini, benza isinqumo, umdala ngamunye kuyabe sekumele asekele isinqumo esenziweyo kungelani lokuthi umbono wakhe usetshenzisiwe yini loba hatshi. (Efe. 5:17) Abadala kumele bazisebenzise kuhle izimiso eziseBhayibhilini balandele lalokho abakutshelwa yinhlanganiso bengazami ukutshila izinto befuna nje ukuthi izinto zenziwe ngendlela yabo. Ngokwesibonelo, umdala kasoze ayethatha into encane nje kumbe umutsho owodwa emabhukwini enhlanganiso abambelele kuwo engazange azame ukuzwisisa ukuthi vele indaba yonke ihamba njani.

17. Kuzanceda njani ukuhlonipha izinqumo zabanye?

¹⁷ Iqiniso esingeke silibalekele yikuthi abantu batshiyene. Omunye lomunye ulokwakhe akuthandayo langakhetha ukukwenza. Ukutshiyana kwethu yinto enhle sibili eyenza ukuthi kube mnandi ebandleni. Yikho kasikuvumeni ukuthi asifanani, kungabi yinto esehlukanisayo. Kasizameni ngamandla wonke ukungakhubi abanye, sizimisele lokuhlonipha izinqumo zabo. Singenza njalo uJehova uzasibusisa simanyane kube kuhle kube njeya!—Hubo. 133:1; Mat. 5:9.