Ziqakatheke Ngani Izimiso EziseBhayibhilini?

1-2. (a) IBhayibhili labhalwa nini? (b) Kuyini okwenza iBhayibhili lingaphelelwa yisikhathi?

IBHAYIBHILI libhuku elidala sibili. Laqala ukubhalwa eminyakeni engaba ngu-3 500 eyadlulayo laze layaphela eminyakeni engaba ngu-2 000 eyadlulayo. Lanxa kunjalo kaliphelelwa yisikhathi. (Heb. 4:12; 2 Thim. 3:​16, 17) Liyasicebisa futhi selincede abantu abanengi ukuthi baphile impilo engcono.

² Kuyini okwenza iBhayibhili libe lilokhu lisebenza lalamuhla lona selilidala kangaka? Okokuqala yikuthi liLizwi likaNkulunkulu ophilayo olenhlakanipho ejulileyo. (1 Thim. 4:10; Rom. 16:​26, 27) Okwesibili yikuthi lilezimiso ezingasetshenziswa ngumuntu kungelani lokuthi uphakathi kwabuphi ubunzima kumbe uphila kusiphi isikhathi.

3. Sizaxoxa ngani esihlokweni lesi?

³ Nansi imibuzo esizayiphendula esihlokweni lesi. Kuyini isimiso? Izimiso ziqakatheke ngani lamuhla? Singazinanzelela njani nxa sibala iBhayibhili? Sizabona lokuthi uJesu wakukhanyisa njani ukuthi ukusebenzisa izimiso kuyasinceda.

KUYINI IZIMISO EZISEBHAYIBHILINI?

4. Kuyini izimiso eziseBhayibhilini?

⁴ Izimiso eziseBhayibhilini liqiniso elingatshintshiyo lapho okwakhelwe khona imithetho kaNkulunkulu. Eminye imithetho ihle icace ukuthi yakhelwe kusiphi isimiso. (Mat. 22:37) Izimiso zihlala zingcono kulemithetho ngoba imithetho isingaba lalapho ephelela khona, ingafakwa nje okwesikhathi esithile ibisitshintshwa ngokuya kwesikhathi. (Hubo. 119:111) Izimiso ziyasivula ingqondo zisincede siyizwisise ngcono indlela uJehova acabanga ngayo. Zenza sizwisise lokuthi kungani uJehova efake umthetho othile ngoba vele kaphongufaka umthetho nje engelasizatho. Okunye okuhle ngezimiso yikuthi zingasebenza ezimeni ezitshiyeneyo. Imithetho isingatshintsha kodwa izimiso azitshintshi.—Isaya. 40:8.

5. Chasisa umehluko okhona phakathi komthetho lesimiso. (Khangela lemifanekiso.)

⁵ Nanku umzekeliso ongasinceda sizwisise umehluko okhona phakathi komthetho lesimiso. Umama usengatshela umntanakhe omncane athi: ‘Tshitshi nana, ungabambi isitofu!’ Lo ngumthetho kodwa isimiso okwakhelwe khona umthetho lo ngesokuthi into etshisayo iyalimaza. Zinengi izinto ezitshisayo, kungaba yi-ayini, umlilo lokunye nje. Isimiso lesi asisebenzi nxa ungekhaya kuphela kodwa loba ngaphi ngoba into etshisayo isingakulimaza kungelani lokuthi ungaphi. Ngokuhamba kwesikhathi umntwana esekhulakhulile umthetho kamama usungatshintsha amvumele ukuthi asebenzise isitofu kodwa umntwana kuyabe kumele asisebenzise ngonanzelelo. Umthetho ungabe usutshintshile sibili kodwa ukuthi isitofu siyatshisa akutshintshi.

IZIMISO EZISEBHAYIBHILINI ZISINCEDA NJANI?

6. (a) Imithetho lezimiso eziseBhayibhilini kusinceda njani? (b) Kuyini okutshengisa ukuthi uJehova uyasithemba?

⁶ UJehova uyasithanda yikho esinika imithetho ukuze asivikele singaweli engozini. (Jak. 2:11) Uphinda asincedise sizwisise indlela acabanga ngayo lokuthi kungani esiphe leyomithetho. UJehova kasifakeli imithetho kukho konke esikwenzayo kodwa usiphe izimiso esingazisebenzisa ezimeni ezitshiyeneyo. Izimiso lezi esizithola eBhayibhilini ziyasinceda sibili ukuthi senze okuqondileyo. Khona nje ukuthi uJehova usiphe izimiso kutshengisa ukuthi uyasithemba futhi ufuna sikhululeke ukuzenzela izinqumo ezitshengisa ukuthi siyamthanda.—Gal. 5:13.

7. Chasisa ukuthi izimiso eziseBhayibhilini zisinceda njani. (Khangela lemifanekiso.)

⁷ Nanku umzekeliso ongasinceda sibone ukuthi izimiso eziseBhayibhilini zisinceda njani. Emigwaqweni eminengi kujayele ukuba lamabhakani alemithetho okumele ilandelwe ngabatshayeli futhi nxa umtshayeli angekela ukuyilandela usengajeziswa. Amanye angabe etshengisa umtshayeli isiqubu okungamelanga asedlule kumbe emtshela lapho okumele ame khona. Kuphinda kube lamanye angelamithetho kodwa alimukisa umtshayeli ngengozi ezingaba khona. Angabe emxwayisa ngokuthi indawo asekuyo ilezinyamazana kumbe emlimukisa ukuthi indawo asekuyo iyatshelela. Umuntu otshayelayo uyakwazi okumele akwenze nxa ebona amabhakani anjalo. Nxa kuyikuthi izulu liyana ubakwazi ukuthi kumele ahambe ngonanzelelo. LamaKhristu enza njalo, ayayilalela sibili imithetho kaNkulunkulu kodwa kawapheleli lapho. Aphinda ananzelele ngitsho lezinto ezincane, kungaba yimicabango loba okunye nje okungenza ukuthi acine esesephula imithetho kaNkulunkulu. Okuwanceda ukuthi enze njalo yikuzama ukuzwisisa indlela uJehova acabanga ngayo.

8. Ukucabangisisa ngezimiso eziseBhayibhilini kusinceda njani? (URoma 12:​1, 2)

⁸ Ukucabangisisa ngezimiso eziseBhayibhilini kusinceda sizwisise ngcono ukuthi uJehova ucabanga njani. Nxa sibala indaba eziseBhayibhilini kumele sizibuze ukuthi uJehova wayifakelani indaba leyo lokuthi thina isinceda njani. Ukwenza njalo kuzasinceda ukuthi sithole izifundo ezitshiyeneyo futhi sizabakwazi okuthokozisa uJehova.—Bala uRoma 12:​1, 2.a

9. Ukusebenzisa izimiso eziseBhayibhilini kusinceda njani? (UHebheru 5:​13, 14)

⁹ Ukusebenzisa izimiso eziseBhayibhilini kuyasinceda ukuthi siqinise ubungane bethu loJehova. Ukusebenzisa izimiso kwenza sizwisise intando kaJehova besesisenza okumthokozisayo. (Bala uHebheru 5:​13, 14.) Abantwana bajayele ukufakelwa imithetho eminenginengi ukuze benze okuqondileyo. Kwesinye isikhathi sebengayilalela nje ngoba besesaba ukujeziswa. UJehova yena kasiphathi njengabantwana abancane, kasifakelanga imithetho eminenginengi. Uyasithemba ukuthi sizakwenza izinqumo ezivumelana lentando yakhe futhi uyathokoza nxa esibona sisenza njalo.—Hubo. 147:11; Zaga. 23:​15, 26; 27:11.

SINGENZANI UKUZE SINANZELELE IZIMISO EZISEBHAYIBHILINI?

10. Kuyini okungasinceda sinanzelele izimiso eziseBhayibhilini?

¹⁰ Nxa sibala iBhayibhili kumele sidinge izifundo ezizasinceda sizwisise ukuthi uJehova uthini ngendaba ezitshiyeneyo. Okunye okungasinceda yikucabangisisa ngemithetho esiyiphiwe nguJehova, sizame ukuzwisisa ukuthi wayifakelani. Ukwenza njalo kungasinceda simazi ngcono uJehova. Kodwa ukuze siyizwisise ngcono imicabango kaJehova kumele sijulise ingqondo sicabangisise simcele lokuthi asincedise. (Zaga. 2:​10-12) Nansi eminye imibuzo esingazibuza yona nxa sibala iBhayibhili: ‘UJehova wawufakelani umthetho lo? Nxa uJehova ewuzonda umkhuba lo uyibona njani eminye ehambelana lawo? Ngifundani endabeni le futhi ngingakusebenzisa njani empilweni yami?’ Nxa singananzelela ukuthi kungani uJehova wafaka imithetho etshiyeneyo njalo sidinge lezifundo kwesikubala eBhayibhilini sizakwenza izinqumo ezivumelana lentando yakhe.

11. Kuyini uJesu asifundisa khona? (Khangela lemifanekiso.)

¹¹ Entshumayelweni yakhe yasentabeni uJesu wasifundisa ukuthi singazinanzelela njani izimiso eziseBhayibhilini. Asixoxeni ngezibonelo ezintathu. Esibonelweni ngasinye uJesu wayeqamba umthetho abeseveza ukuthi wakhelwe kusiphi isimiso. Sizahlola okwakhulunywa nguJesu ukuze sithole izimiso kanye lezifundo esingazisebenzisa.

12. Yisiphi isimiso esikuMathewu 5:​21, 22? (Khangela lomfanekiso.)

¹² Bala uMathewu 5:​21, 22. “Ungabulali.” Umthetho lo wakhelwe kusiphi isimiso? UJehova kafuni sizonde abanye. Esikukhulumayo, esikwenzayo lesikucabangayo kumele kutshengise ukuthi siyabathanda. UJesu wakwenza kwacaca ukuthi lanxa umuntu engabe engambulalanga umfowabo, uyabe engawulalelanga umthetho kaJehova nxa kuyikuthi uhlala emzondele futhi ekhuluma izinto ezimbi ngaye. Phela nxa umuntu engazonda omunye usengacina embulele sibili.—1 Joh. 3:15.

13. Singasisebenzisa njani isimiso esikuMathewu 5:​21, 22? (Khangela lemifanekiso.)

¹³ Singasisebenzisa njani isimiso esikuMathewu 5:​21, 22? Akumelanga sihlale sizondile kumbe sibambele abanye izikhwili. (Levi. 19:18; Jobe. 36:13) Kungani kungamelanga senze njalo? Phela nxa sibazondele kumbe sibabambele izikhwili singacina sikhuluma kubi ngabo loba sibaphathe kubi. (Zaga. 10:12) Nxa singabanyeya kumbe sikhulume amanga ngabo singenza labanye bacine bebazonda futhi bebaphatha kubi. (Zaga. 20:19; 25:23) Lanxa uJesu wakhuluma amazwi la kungakabi lamafoni lamakhompiyutha le-inthanethi, isimiso lesi lokhe sisebenza lanamuhla. Kumele sinanzelele indlela esisebenzisa ngayo ezokuxhumana, singakhulumi izinto ezilimaza abanye. Njengoba nje singeke sibambe umuntu simklinye kumele sinanzelele lesikukhulumayo singacini simbulele ngamazwi.

14. Umthetho okuMathewu 5:​27, 28 usekelwe kusiphi isimiso? (Khangela lomfanekiso.)

¹⁴ Bala uMathewu 5:​27, 28. “Ungafebi.” Umthetho lo usekelwe kusiphi isimiso? UJehova uyabuzonda ubufebe, uzonda ngitsho lemicabango engenza umuntu acine eziphathe kubi. UJesu wacacisa ukuthi nxa indoda etshadileyo ingakhangela owesifazana ongayisuyemkayo ize imhawukele iyabe isifebile. Lokhu kusifundisa ukuthi akumelanga sivumele imicabango engalunganga, kumele silwisane layo ingahlali engqondweni zethu. (Mat. 5:​29, 30) Isimiso lesi sisebenza emuntwini wonke kungelani lokuthi utshadile kumbe katshadanga.

15. Singasisebenzisa njani isimiso esikuMathewu 5:27; 28? (Khangela lemifanekiso.)

¹⁵ Singasisebenzisa njani isimiso esikuMathewu 5:​27, 28? Akumelanga sifukamele imicabango engcolileyo. (2 Sam. 11:​2-4; Jobe. 31:​1-3) Yikho-ke umKhristu ozimisele ukuthokozisa uJehova akumelanga abukele iphonografi. Kasoze aziqile esithi yena kasoze enze lokho okwenziwa ngabantu labo okwakhe yikubukela nje kuphela. Umuntu ozimisele ukuthokozisa uJehova akumelanga abukele loba yiphi iphonografi kungelani lokuthi abanye abantu bathini ngayo. Lanxa ngesikhathi sikaJesu kwakungelamafoni, amavidiyo lamapikitsha akukhulumayo kwenza sizwisise ukuthi uJehova uthini ngamavidiyo lemifanekiso engcolileyo. Lokhu kutshengisa ukuthi uJehova uyakuzonda ukuthi abantu batshengisane kumbe bathumelane loba yini elokungaziphathi. Isimiso lesi siyamnceda otshadileyo ukuthi ahlale ethembekile komunye wakhe. (Mal. 2:15) Kahlekahle lokhu kunceda wonke amaKhristu ukuthi abalekele loba yini engenza ukuthi acine efebile kungelani lokuthi atshadile kumbe awatshadanga.—Zaga. 5:​3-14.

16. Umthetho okuMathewu 5:​43, 44 wakhelwe kusiphi isimiso? (Khangela lomfanekiso)

¹⁶ Bala uMathewu 5:​43, 44. ‘Thanda umakhelwane wakho.’ Umthetho lo usekelwe kusiphi isimiso? UJehova ufuna sithande bonke abantu. Ngesikhathi sikaJesu amaJuda ayengawuzwisisi umthetho lo. Ayecabanga ukuthi kumele athandane wona wodwa azonde izitha zawo. Kodwa uJesu wayekwazi ukuthi umthetho lo wawungatsho ukuthi amaJuda kumele azonde abanye abantu. Wayezwisisa ukuthi uJehova ufuna sithande bonke abantu kungelani lokuthi bangumhlobo bani.—Mat. 5:​45-48.

17. Kunceda ngani ukusebenzisa isimiso esikuMathewu 5:​43, 44? (Khangela lemifanekiso.)

¹⁷ Singasisebenzisa njani isimiso esikuMathewu 5:​43, 44? Nxa sithanda bonke abantu asisoze siye ezimpini kumbe sisekele amaqembu alwayo. (Isaya. 2:4; Mik. 4:3) Uthando luzakwenza sibaphathe kuhle abanye kungelani lokuthi bangumhlobo bani, badabuka ngaphi kumbe bakholwani. (Imiseb. 10:​34, 35) Isimiso lesi sisinceda lokuthi sixolele abasiphambanisileyo kumbe abaphathe kubi abantu esibathandayo.—Mat. 18:​21, 22; Mak. 11:25; Luk. 17:​3, 4.

QHUBEKA USEBENZISA IZIMISO

18. (a) Kuyini ozimisele ukukwenza? (b) Sizaxoxa ngani esihlokweni esilandelayo?

¹⁸ Siyambonga uJehova ngoba kasifakeli imithetho eminenginengi angani singabantwana abancane. Ufuna sisebenzise izimiso lezifundo esizithola eLizwini lakhe ukuze senze izinqumo ezinhle. (1 Khor. 14:20) Kasiqhubekeni ‘siqedisisa lokho okuyintando kaJehova’ kwesikwenza nsuku zonke. (Efe. 5:17) Okwenza silalele uJehova yikuthi siyamthanda, ayisikho ukuthi sesaba ukujeziswa. Esinye isipho esisiphiwe nguJehova esingasinceda senze izinqumo ezimthokozisayo ngumzwangedwa. Asixoxeni ngawo esihlokweni esilandelayo.