Qhubeka Uqinisa Ubungane Bakho Lomkakho

1. Kunceda ngani ukuba labangane abathanda uJehova?

ABANGANE abasithandayo labathanda uJehova bayizipho ezivela kuye. (Jak. 1:17) Bayathokoza lathi nxa izinto zisihambela kuhle, basiduduze nxa sidanile baphinde basicebise ngendlela ezitshiyeneyo. Siyabathemba futhi siyabathanda abangane abanjalo ngoba ‘benza inhliziyo ithokoze!’—Zaga. 27:9.

2. Kungani kumele indoda lomkayo bahlale beqinisa ubungane babo? (UMathewu 19:6)

² Kuqakathekile ukuthi indoda lomkayo babe ngabangane, kumele babe ngamathe lolimi sibili. Kodwa lokho akuzenzakaleli. Kuyabe kumele baqhubeke besenza izinto ezivuselela uthando lwabo leziqinisa ubungane babo. Nxa bengavumela ukuthi ezinye izinto zibenze baqhelelane bangacina bengasazwanani futhi sebelesizungu. Kumele baqhubeke belwisa sibili ukuthi kungabi lento ebehlukanisayo. (Bala uMathewu 19:6.) Esihlokweni lesi sizabona ukuthi abatshadileyo bangenzani ukuze bahlale bezwanana. Kodwa asiqaleni sixoxe ngokunganceda umuntu ofuna ukutshada ukuthi akhethe umuntu azazwanana laye babe ngabangane okwempilo yabo yonke.

KHETHA UMUNTU OZWANANA LAYE

3-4. Kuyini okungakunceda ukhethe kuhle? (IZaga 18:22)

³ Nxa kulento enkulu okumele uyenze, kuqakathekile ukuthi uqale uhlale phansi ucabange uhluzisise ubone ukuthi into leyo izakufikisa ngaphi. Lokhu kuqakathekile sibili ngoba izinqumo ezinkulu ziyayitshintsha impilo yomuntu.

⁴ Ukukhetha umuntu ozatshada laye asomdlalo kumbe amatope ngoba khethile khethile. Yena lowo omkhethileyo kuyabe kumele uhlale laye okwempilo yakho yonke. Yikho kuqakathekile ukuthi ucele uJehova akucebise endabeni le ngoba nguye owasungula umtshado. Nxa uyindoda, uJehova ufuna uthole inkosikazi ezakuthokozisa. Nxa ungowesifazana, ufuna uthole indoda emadodeni ozaziqhenya ngayo. (Bala uZaga 18:22; Isaya. 48:17, 18) UJehova ukwazi kuhle okungakwenza uthokoze yikho nxa ungalalela lokho akutshela khona uzakwenelisa ukukhetha kuhle.

5. Kungani kuqakathekile ukuthi utshade lomuntu obhabhathiziweyo?

⁵ Nxa usubhabhathiziwe uyabe usungumngane kaJehova. (Hubo. 25:14) Yikho nxa usufuna ukutshada kumele udinge umuntu ongumngane kaJehova. (1 Khor. 7:39) Ungenza njalo uyabe utshengisa ukuthi uyakuqakathekisa okufunwa nguJehova futhi lalowo ozamthola uzambona eyisipho osiphiwe nguye. (Zaga. 19:14) Kuzakunceda lokuthi ubalekele inhlupho ezibangelwa ‘yikubotshelwa ejogweni linye’ lomuntu ongakholwayo. (2 Khor. 6:14) Akucabange ukuthi kuyabe kuyibuthutha obunganani ukusuka uyethandana lomuntu ongakholwayo uzitshela ukuthi ebandleni kumbe enhlanganisweni akulamuntu okuchazayo, kumbe uziyenga usithi lowomuntu uzafunda iqiniso ngelinye ilanga atshintshe.

6-7. Yiphi imibuzo okumele uzibuze yona nxa kulomuntu othandana laye?

⁶ Kodwa lokhu sekusitsho ukuthi usungaphongudobha nje loba ngubani obhabhathiziweyo utshade laye yini? Hatshi, ukhuni olungaziwayo kaluthezwa. Beka amaphaphu phansi umhlolisise kuhle ungajahanga ukuze umazi kuhle. Nansi eminye imibuzo ongazibuza yona: ‘Ubaphatha njani abangakibo? Uyabahlonipha yini abanye? Ulomusa yini? Ngobani abangane bakhe? Wenza njani nxa kuthe kwaba lokungazwisisani? Uyayihlonipha yini imibono yabanye abantu kumbe ubamba inkani efuna izinto zenziwe ngendlela yakhe? Ugijimisana lemali yini?’

⁷ Nansi eminye futhi imibuzo okumele uzibuze yona: ‘Umuntu lo engifisa ukutshada laye kuyakhanya yini ukuthi umthanda ngenhliziyo yonke uJehova? Uyalwisa yini ukuba lobuntu obuthokozisa uJehova? Sizadonsa kanyekanye yini ekukhonzeni kumbe uzangibisela emuva? Esifuna ukukwenza ekukhonzeni kuyahambelana yini? Nxa ngikhangele ubungane bethu buzaqhubeka buqina yini kumbe vele akuyiwa ndawo?’ (Kol. 3:9, 10) Dadewethu, umzalwane lo ofuna ukutshada laye liyazwanana yini futhi umbona ezaba yinhloko oyithembayo yini? (1 Khor. 11:3) Mfowethu, udadewethu lo ofuna ukutshada laye, umbona engumuntu ozazithoba lozakuhlonipha yini lanxa ungenza amaphutha lapha lalaphaya? Le ayisiyo mibuzo ongayiphendula nje ngelanga elilodwa, yikho sisebenziseni kuhle isikhathi sokuthandana ukuze lifundane lazane kuhle.

8-9. Kuyini okunganceda ofuna ukutshada ukuthi akhethe kuhle? (Khangela lomfanekiso.)

⁸ Kuqakathekile ukuthi nxa lisathandana udingisise ukuthi umuntu yena lo ofuna ukutshada laye unjani sibisibili. Phela uthando luyaphandla, yikho kungaba kuhle ukuthi ubuze abanye uzwe ukuthi bona bambona njani. Dingisisa ukuthi ulobuntu obunjani lokuthi waziwa ngani? Waziwa engumuntu olomusa yini? Uthobekile yini? Ngumuntu ozwisisayo yini? Omunye udadewethu okuthiwa nguSarah, ohlala eGuiana eFrance owatshada lomzalwane okuthiwa nguDaniel uthi: “Ngabuza abantu abatshiyeneyo ngoDaniel. Ngakhuluma lomunye ake ahlala laye, ngabuza lomunye umdala webandla ababengena bonke, ngaxoxa labanye abangane bethu ababesazi kuhle ngaze ngayabuza labanye odadewethu ababengena laye ebandleni.” Ungesabi ukubuza othandana laye ngezinto ezake zenzakala kuye kudala kumbe ake azenza okungabe kuqakathekile ukuthi ubezazi. Kuqakathekile ukuthi izinto ezinjalo lixoxe ngazo khathesi ukuze zingalihluphi phambili selitshadile.

⁹ Nxa kukhona ongani uyakusola kumbe kulokunye abanye abake bakuxwayisa ngakho, ungakuthathi lula, cabangisisa ngakho. Lokho kungakunceda ubone ukuthi liqhubekele phambili yini ngokuthandana kumbe sekumele kuhle kuphele.a Khathesi kasixoxeni labatshadileyo sibone ukuthi kuyini abangakwenza ukuze baqinise ubungane babo.

ZIPHENI ISIKHATHI SOKUBA NDAWONYE

10. Kungani kuqakathekile ukuthi indoda lomkayo bazinike isikhathi sokuba ndawonye?

¹⁰ Lanxa indoda lomkayo bengabe belezinto ezinengi zokwenza, kuqakathekile ukuthi baziphe isikhathi sokuba ndawonye ukuze baqinise ubungane babo. Ukwenza njalo kuzabapha ithuba lokuthi batshelane okusezinhliziyweni zabo. Kuzabanceda lokuthi batshengisane ukuthi bayathandana lokuthi bachazeke nje bazikholisele.

11. Kuyini okungafaka umtshado wenu engozini?

¹¹ Indoda lomkayo abangabangane abezwa kuhle nxa bengahlala isikhathi bengabonananga. Ngezinye izikhathi kungenzakala ukuthi abatshadileyo bengabi ndawonye ngenxa yezizathu ezitshiyeneyo futhi lokhu kuyazwisiseka. Kodwa isikhathi lesi singaba side kakhulu kungaba yingozi. Ngokwesibonelo omunye usengakhetha ukuyasebenza kwelinye ilizwe, ayehlala khona okwezinyanga lezinyanga kumbe okweminyaka etshiye omunye wakhe emuva. Angabe eyihola sibili imali enengi khonale kodwa umtshado wabo ungasala usulenga ngomnxeba.

12-13. (a) Kuyini okwenziwa ngabanye ukuze bathole isikhathi sokuba ndawonye? (Khangela lomfanekiso.) (b) Ubungane benu buqakatheke okunganani? (Khangela ibhokisi elithi “Umkakho Umbeka Ngaphi?”)

¹² Zwana ukuthi abanye benzani ukuze bathole isikhathi sokuba ndawonye. ULeah ohlala eGuam uthi: “Mina lomkami sithanda ukwenza izinto ezitshiyeneyo sisonke. Vele asitshiyani, kukalutshwana ukuthi omunye ahambe nje ayezikholisela eyedwa omunye engekho.” Udadewethu ohlala e-United States okuthiwa nguRoxanne yena uthi: “Njengoba kukunengi kangaka okumele sikwenze, thina sihle sihlele isikhathi sokuba sonke kungelalutho olusiphambanisayo.” (Khangela loAmos. 3:3.) UDamien ohlala eFrance yena uthi: “Ngiyazama ukwenza izinto ezithandwa ngumkami laye uyazama ukwenza izinto engizithandayo futhi lokhu sekwenze ukuthi kube lezinto ezinengi esikholisa ukuzenza sindawonye.” (Mat. 7:12) UKatie ose-United States yena uthi: “Kwesinye isikhathi sithatha amafoni siwabeke khatshana ukuze angasiphambanisi nxa sixoxa.”

¹³ Okuqakatheke kakhulu yikuthi lenze izinto ezilisondeza kuJehova lilonke. Udadewethu okuthiwa nguMyriam ohlala eFrance, uthi: “Mina engikuthanda kakhulu yikuthi siqala usuku lwethu ngokubala iBhayibhili besesixoxelana esikutholileyo lesingakusebenzisa ezimpilweni zethu. Okunye engikuthanda kakhulu yikuzwa umkami ethandaza eveza indlela amthanda ngayo uJehova.” UKatie esike sakhuluma ngaye uthi: “Thina esikukholisa kakhulu yikutshumayela sonke. Kuyakhuthaza ukuzwa omunye wakho etshela abanye ngoJehova, usala ulokunye okufundileyo ngomunye wakho besekuqinisa ubungane benu.”—Zaga. 27:17.

BAMBISANANI NXA SEKULENHLUPHO

14-15. Kungani kumele indoda lomkayo bazame ukulungisa inhlupho ezingabakhona? Sebenzisa umzekeliso.

¹⁴ Iqiniso elikhona yikuthi emtshadweni akusoze kuhlale kutshelela. IBhayibhili lithi abatshadileyo “bazakuba lenhlupho.” (1 Khor. 7:28) Inhlupho ezitshiwo evesini le yizonalezi nje ezijayelekileyo ezingehlela loba ngubani otshadileyo. Yikho nxa sezithe zaba khona, kuhle ukuthi abantu babambisane.

¹⁵ Ake sithi kube lomoya olamandla, osufike wathatha uphahla lwendlu yenu, belizakwenzani? Belizahle lipakitshe yini lithuthe liyekwakha eyinye indlu? Hatshi. Belizahlala phansi libonisane ukuthi lingayilungisa njani. Lanxa lo bekungaba ngumsebenzi omkhulu ongenza liphume izimali, belizazimisela ukuwenza ngoba lilungisa umuzi wenu, indawo yenu yokuhlala. Kunjalo langenhlupho ezingaba khona emtshadweni. Kuyabe kukuhle ukuthi nxa zingaba khona lihlale phansi libonisane ukuthi lingazilungisa njani. Lanxa ezinye zakhona zingathatha isikhathi eside ukuthi zilunge, uJehova uyabe ezalincedisa nxa lizimisele ukubambisana lokuqhubeka lindawonye. (Mal. 2:16) Lingenza njalo, liyabe litshengisa ukuthi liyathandana lokuthi liyamhlonipha uJehova njengoba kunguye owasungula umtshado.

16. Kuyini elingakwenza nxa izinto zingasahambi kuhle emulini? (U-1 Khorinte 13:4-8a). (Khangela umfanekiso lebhokisi elithi “Qinisani Ubungane Benu.”)

¹⁶ Nxa inhlupho sezithe zabakhona lingagijimeli ukwehlukana. (1 Khor. 7:10, 11) Lingazibuza ukuthi, ‘Kukhona yini esingakwenza ukuze siphinde sibe ngabangane?’ Zikhumbuzeni ukuthi iBhayibhili lithini ngothando. Lingabala u-1 Khorinte 13:4-8a. (Bala.) beselizihlola libone ukuthi liyakwenza yini okusemavesini la. Kulokuthi lihle libone angani sekwehlule, dingani izindlela zokuvuselela uthando lwenu. Ngamunye kakhangele ukuthi yena kumele enzeni kulokuthi libe likhombana ngeminwe. Khulekani kuJehova limcele ukuthi alincedise. Lingekeli lokusebenzisa amabhuku lamavidiyo esiwaphiwa yinhlanganiso lokucela ukuthi abadala labanye abaqinileyo ekukhonzeni balicebise. Nxa lingathemba uJehova, limvumele ukuthi alincedise emtshadweni wenu, umtshado wenu uzakuba ‘njengentambo elemicu emithathu engaqamuki lula.’—Umtshu. 4:12.

17. Labo abafuna ukutshada lalabo asebetshadile bangenzani ukuze bathokoze?

¹⁷ UJehova ufuna ukuthi bonke nje abantu bakhe bathokoze, kungaba ngabatshadileyo kumbe abacabanga ukutshada. Yikho nxa kuyikuthi ufuna ukutshada ngelinye ilanga, zinike izikhathi eseneleyo sokukhetha kuhle umuntu ozazwanana laye. Nxa kuyikuthi selitshadile, qhubekani liqinisa ubungane benu. Nxa lingaba lenhlupho, celani uJehova alincedise. Lingenza njalo lizayikholisa sibili impilo!—Umtshu. 9:9.