Lingisela ‘UNkulunkulu Wenduduzo Yonke’

1. Kungani kumele siduduze abanye?

SONKE siyakufuna ukududuzwa lokuqiniswa ngoba inhlupho zehlela wonke umuntu. (1 Phet. 1:6) Kumele sikukhuthalele ukududuza abanye njengoba lathi sikufuna ukududuzwa. (Mat. 7:12) IBhayibhili lithi uJehova ‘nguNkulunkulu wenduduzo yonke’ futhi lathi angasincedisa senelise ukududuza abanye “kuloba yiziphi inhlupho” abakuzo. Nxa siduduza abanye siyabe simlingisela. (2 Khor. 1:3, 4; 1 Thes. 4:18) Okwenza sizimisele ukududuza abafowethu labodadewethu yikuthi siyabathanda, asikwenzeli nje ukugcina icala. Esihlokweni lesi sizabona ukuthi ibala elithi ‘induduzo’ lisetshenziswe njani eBhayibhilini sibone lokuthi singabaduduza njani abanye. Sizaxoxa langokuthi singenzani nxa sifuna ukududuzwa.

UKUDUDUZA YIKWENZANI?

2. Ibala elithi ‘ukududuza’ lisetshenziswe njani eBhayibhilini?

² EBhayibhilini ibala lesiGrikhi elihunyutshwe ngokuthi “ukududuza” lingatsho izinto ezitshiyeneyo kusiya ngokuthi kukhulunywa ngani. Lingatsho “ukuqinisa,” “ukweluleka” loba “ukukhuthaza.” (Rom. 12:8) Kahlekahle ngesiGrikhi nxa kukhulunywa ngokududuza kuyabe kungani ubize umuntu wamsondeza eduze ukuze umncedise. Akucabange usizwa ukuthi umngane wakho uphakathi kwenkalakatha yohlupho, sokunzima. Awutshoni uzilazila, uhle uthi lothu uyemncedisa kungelani lokuthi uphakathi kohlupho olunjani. Induduzo yeqiniso kuyabe kumele imtshiye eyakhekile futhi esizwa ngcono.

3. UBhanabha wayesaziwa ngani? Nika isibonelo. (Khangela lomfanekiso.)

³ IBhayibhili likhuluma ngeyinye indoda okwakuthiwa nguJosefa eyayisaziwa ngokukhuthaza lokududuza abanye. Abaphostoli baze bayipha ibizo elithi Bhanabha okutsho ukuthi “indodana yenduduzo.” (Imiseb. 4:36) Ibizo leli lalimfanele sibili ngoba kwahle kwaba yilo elasetshenziswa kanengi eBhayibhilini nxa kukhulunywa ngaye. Zinengi izikhathi uBhanabha atshengisa khona ukuthi uzimisele ukuncedisa abazalwane. Eyinye indoda ayincedisayo nguSawuli owayesanda kuba ngumKhristu. USawuli wathi efika eJerusalema abafundi babemesaba ngoba babemazi eyisigebenga esasihlukuluza amaKhristu kodwa uBhanabha wamsondeza eduze wamkhulumela kwabanye abafundi.—Imiseb. 9:26-28.

SINGABADUDUZA NJANI ABANYE?

4. Yiphi indlela engcono yokududuza abanye? (URoma 1:11, 12)

⁴ Bavakatshele nxa kuvuma. UJehova uyabaduduza abanye esebenzisa izinceku zakhe. Ngelinye ilanga wake wathuma ingilosi yakhe ukuthi iyeduduza umphrofethi u-Elija futhi imqinise. (1 Amakho. 19:4-7) Lomphostoli uPhawuli wayekunanzelela ukuthi ukuvakatshela abanye kuyanceda. (Bala uRoma 1:11, 12.) Nxa uvakatshela omunye usiyamduduza ungafiki ungumuntu odlulayo kodwa kwejisa laye ukuze wenelise ukumncedisa. (1 Khor. 16:7) Nxa ungenelisi ukuyamvakatshela khumbula ukuthi kukhona okunye ongakwenza. Ungamfonela kumbe umbhalele incwadi kumbe ikhadi kumbe umthumele imeseji. Kungakhanya kuyizinto ezincane kodwa ungazideleli. Wena uyamvumela yini uJehova ukuthi akusebenzise ukududuza abanye?

5. Kuyini okungenza kube nzima ukududuza abanye?

⁵ Njengoba izinto ziqhubeka zisiba zimbi emhlabeni lo, sokungaba nzima ukuvakatshela abafowethu labodadewethu sisiyabaduduza. UPhawuli wathi ebotshiwe eRoma, u-Onesiforu owayehlala e-Efesu wamdinga esamdinga efuna ukumduduza lanxa wayesazi ukuthi wayengabotshwa kumbe abulawe. (2 Thim. 1:16-18) Lokhu yikho kanye okwenziwa ngabafowethu labodadewethu eRussia. Bangezwa ukuthi omunye uFakazi usebotshiwe lokuthi indaba yakhe isisemthethwandaba basukuma ngobunengi besiyamsekela lanxa besazi ukuthi abakwenzayo kungenza labo bacine bebotshiwe. Okungasinceda ukuthi lathi sibe lesibindi sokududuza abanye abasebunzimeni obunjalo yikubala ngokwakusenziwa zinceku zikaNkulunkulu kudala lokwenziwa ngabanye khathesi ukuze baduduze abanye.

6. Singamlingisela njani uJehova nxa siduduza abanye? (Khangela lomfanekiso.)

⁶ Lalelisisa. Ngesikhathi umphrofethi u-Elija esesaba ukuthi wayezabulawa wathandaza kuJehova emtshela okumkhathazayo. UJehova wamlalelisisa umphrofethi wakhe lanxa wayevele ekwazi ukuthi ukhathazwa kuyini. Lanxa u-Elija wayelokhu ephindaphinda into eyodwa uJehova wambekezelela. (1 Amakho. 19:9, 10, 14) UJehova wamlalelisisa lomphrofethi wakhe uHabakhukhi owayekhathazwa yizinto ezimbi ezazisenzakala lanxa kokunye kwakungani usola uJehova. (Hab. 1:2, 3) Lalamuhla uJehova uyasilalelisisa nxa sikhuleka kuye lanxa evele ekwazi ukuthi siyabe sifunani. Lathi singalingisela uJehova ngokulalelisisa nxa abafowethu labodadewethu bekhuluma lathi. Kuyabe kumele sinanzelele singabaqumi umlomo futhi singavuki ngolaka nxa bethe bakhuluma izinto esingavumelani lazo kumbe belokhu bephindaphinda into eyodwa.—Jak. 1:19; Umtshu. 7:9.

7. Kuyini esingakwenza ukuze sincedise umuntu osebunzimeni?

⁷ Zama ukuzwisisa ukuthi umuntu lowo ufuna ukuncediswa njani. UJehova uyabona okusenhliziyweni yomuntu kodwa thina kasenelisi. Yikho kuqakathekile ukuthi silalelisise nxa omunye umuntu ekhuluma ukuze sibone ukuthi singamncedisa njani. Kumele sikhumbule lokuthi abantu batshiyene. Yikho nxa kulendlela owaduduzwa ngayo wena yakusebenzela ungazitsheli ukuthi izasebenza lakomunye umuntu. Zinike isikhathi eseneleyo sokulalelisisa lesokubuza imibuzo ukuze lowo muntu aveze khona kanye okusenhliziyweni yakhe ubusubona ukuthi ungamncedisa njani.—Zaga. 20:5.

8. UJesu wamduduza njani uMatha loMariya? (Khangela lemifanekiso.)

⁸ Asixoxeni ngendlela uJesu aduduza ngayo uMatha loMariya ngemva kokufelwa ngumfowabo uLazaro. Lanxa bobabili babedabukile emoyeni uJesu wabaduduza ngendlela ezitshiyeneyo. Wathi ekhuluma loMatha wagcizelela ukuthi abafileyo bazavuswa wamqinisekisa ukuthi lokho kuzakwenzakala sibili. Kodwa kukhanya kuMariya kazange enze njalo. Wakhala laye wasembuza ukuthi uLazaro bambeke ngaphi. (Joh. 11:20-35) Manje sifundani? Nxa siduduza umuntu kumele sizame ukuzwisisa ukuthi ufuna ukuncediswa njani ngoba abantu bayatshiyana.

9. Kungani kuqakathekile ukusebenzisa iBhayibhili nxa siduduza banye? (URoma 15:4, 5)

⁹ Sebenzisa iBhayibhili. Nxa ududuza umuntu ngeMibhalo uyabe umnika ithemba. (Bala uRoma 15:4, 5.) Lelothemba liyabe lizamduduza futhi limqinise. (Isaya. 40:31) Manje ungayithola ngaphi imibhalo ongaduduza ngayo abanye? Abanye bahlala bebhale phansi amavesi abangawasebenzisa nxa sokudingakala. Amanye akhona ungawathola esihlokweni esithi “Induduzo” ebhukwini elithi Imibhalo Engakunceda Ukhonze UJehova. Khuleka kuJehova umcele ukuthi akuncedise wenelise ukulisebenzisa kuhle iLizwi lakhe nxa ududuza abanye. Umoya wakhe ungakusiza ukhumbule amavesi ongawasebenzisa.—Joh. 14:26.

10. Kuyini okumele sikukhumbule nxa sifuna ukukhuthaza abanye?

¹⁰ Woba lomusa. Sike sezwa ukuthi ibala lesiGrikhi elihunyutshwe ngokuthi “ukududuza” lingatsho “ukweluleka” kumbe “ukukhuthaza.” Kwesinye isikhathi kungadingeka ukuthi weluleke umuntu omduduzayo kumbe umkhuthaze ukuthi aqondise imicabango yakhe. Nxa sokumele wenze njalo kuhle ukuthi uqale ucabange ungakakhulumi, ukhethe kuhle amazwi ukuze ungamlimazi wena usithi uyamnceda. (Zaga. 12:18) UJehova wasitshengisa ukuthi singakwenza njani ngesikhathi ekhuluma lo-Elija. U-Elija wayeselahle ithemba ebona angani umsebenzi wakhe wawuphelele emoyeni ecabanga ukuthi bonke abako-Israyeli basebehlamukele uJehova. UJehova wamncedisa kuhlekuhle umphrofethi wakhe u-Elija, kazange amsole kumbe amenze umuntu omubi. (1 Amakho. 19:15-18) Lawe ungenelisa ukulingisela uJehova nxa useluleka abanye. Nxa ulesabelo sokufundisa kumbe uphendula emihlanganweni woba lomusa ukhethe kuhle amazwi ukuze ubakhuthaze abafowenu labodadewenu futhi ubaqinise.

11. Kuyini okunye okungadingeka ukuthi sikwenze ukuze siduduze abanye? (U-1 Johane 3:18)

¹¹ Mncedise. Kwesinye isikhathi nxa omunye esebunzimeni kuyabe kungenelanga ukuthi siphongumduduza nje ngamazwi kodwa sokungadingeka ukuthi simncedise ngento ebambekayo. (Bala u-1 Johane 3:18.) UBhanabha wakwenza lokhu. Wathengisa indawo yakhe ukuze ancedise amaKhristu ayeswela. (Imiseb. 4:36, 37) Lanamuhla banengi abafowethu lodadewethu abancedisa abanye njengoBhanabha. Omunye udadewethu okuthiwa nguGabriela ohlala ePoland wake waba phakathi kobunzima izulu selitshaye labhidliza indlu ayehlala kuyo. Uthi: “Mina labazali bami sakhathazeka kakhulu saswela lokuthi sibambe ngaphi. Sasizibuza ukuthi vele sizaqalisela ngaphi. Kungakayi ngaphi kwatheleka abafowethu labodadewethu bevela emabandleni atshiyeneyo bezosincedisa. Ngelanga elilodwa nje batshiya benze umsebenzi owasitshiya singelankani. Ngasala ngingathandabuzi ukuthi uJehova usebenzisa izinceku zakhe ukuze aduduze abasebunzimeni.”

12. Ukuhlala uthembekile kungabanceda njani abanye?

¹² Qinisela uhlale uthembekile. UPhawuli watshela abaseThesalonika ukuthi waduduzeka kakhulu njalo wavuseleleka esizwa indlela ababeqinisela ngayo lababezimisele ngayo ukuhlala bethembekile. Phela wayesebenze nzima ebancedisa ekukhonzeni ngakho kwamqinisa kakhulu ukuzwa ukuthi babesendleleni eyiyo. (1 Thes. 3:5-8) UPhawuli laye wayekwazi ukuthi angaqinisela ahlale ethembekile uzanceda abanengi ukuthi labo bahlale bethembekile. (Kol. 2:1, 2) Nxa lathi singaqinisela futhi sihlale sithembekile abanye bazabona indlela uJehova asincedisa ngayo besekubakhuthaza ukuthi labo baqinisele besazi ukuthi uJehova kasoze abatshiye.

13. Kuyini okunye okungasinceda nxa siduduza abanye?

¹³ Bekezela. Kwesinye isikhathi sesingazama sisazama ukududuza abafowethu labodadewethu abadanileyo kodwa kusale angani asenzanga lutho. Akumelanga sikhalale ngoba iBhayibhili lisikhuthaza ukuthi ‘siqhubeke sikhuthazana.’ Amazwi la atshengisa ukuthi le yinto okumele sihlale siyenza. Yikho kungadingeka ukuthi sizame kanengana ukuncedisa omunye. (1 Thes. 5:11) Kuqakathekile sibili ukuthi sibabekezelele labo esizama ukubaduduza. (1 Thes. 5:14) Kodwa ake sithi nguwe osusebunzimeni, ungenzani ukuze uthole induduzo?

NXA UFUNA UKUDUDUZWA

14-15. Kumele senzeni nxa sikhathazekile?

¹⁴ Khuleka. Nxa udanile kumbe kulento ekukhathazayo cela uJehova akududuze. (Hubo. 94:19) Mtshele khona kanye okuzwayo ngaphakathi ungakhekhelezi. (Hubo. 62:8) UJehova uyabe evele esekwazi ukuthi uzwa njani ungakathandazi. Kodwa nxa ungamthululela isifuba uyabe utshengisa ukuthi uyamthemba lokuthi awuthandabuzi ukuthi uzakuncedisa. UJehova uyabe ezawuzwa umthandazo wakho futhi awuphendule lanxa kwezinye izikhathi engawuphendula ngendlela obungayicabangeli. (Mak. 11:24) UFiliphi 4:6, 7 usikhuthaza ukuthi ‘sibikele uNkulunkulu zonke izicelo zethu ngomthandazo. Nxa singenza njalo ukuthula kwakhe okwedlula konke ukuzwisisa kuzalinda izinhliziyo zethu lengqondo zethu.’

¹⁵ Cela abanye bakuncedise. Xoxa lomuntu omthembayo, kungaba ngumngane kumbe umdala webandla. Hlala usazi ukuthi abafowethu labodadewethu bazimisele ukukududuza. Kodwa kwesinye isikhathi bangabe bengakwazi ukuthi uhlutshwa yini. Yikho nxa ungabatshelanga bengasala bengakwazi ukuthi bakuncedise njani. (Zaga. 14:10) Kwesinye isikhathi ungabacela nje ukuthi bakuphe indlebe ubatshele okukukhathazayo. Kumbe ungacela bakuphe amavesi loba okunye ongakubala okuzakududuza.

16. Kuyini okungenzakala nxa abanye bezama ukukududuza kodwa kuyini okungamelanga ukukhohlwe?

¹⁶ Bekezela uxole. Abafowenu labodadewenu sebengakuzwisa ubuhlungu bona besithi bayakududuza. Kwesinye isikhathi sebengakhuluma okunye besithi bakuthoba amanxeba kanti maye kudala bekuthunukile. Nxa kungaba njalo babekezelele njalo ubaxolele. (1 Khor. 13:4, 7) Ungawakhohlwa amazwi akuJakhobe 3:2 athi: “Nxa umuntu engaphambanisi ngelizwi, uyabe ephelele.” Hlala ukhumbula ukuthi abafowenu labodadewenu bangabe bezama ukukududuza kodwa kusuke kwale. Kungakunceda lokukhumbula amazwi kaJesu athi: “Umoya uyafisa sibili kodwa umzimba ubuthakathaka.”—Mat. 26:41.

17. Kumele sizimisele ukwenzani?

¹⁷ Sonke siyakufuna ukududuzwa lokukhuthazwa njengoba sesisekucineni kwensuku zokucina. Izinto ziqhubeka zisiba zimbi kusa kwamalanga. Lezitha zikaNkulunkulu zibathwalise nzima abantu bakhe. Kwangathi singazimisela ukuqhubeka siduduzana.