Ungavumeli Lutho Lukuphambanise Ekukhonzeni

1-2. Kuyini esikuqakathekisa kakhulu? Nika umzekeliso

AKE SITHI uphakathi komango utshayela imota, besekungena ifoni. Ubuzakwenzani? Ungabe ukwazi sibili ukuthi umuntu okufonelayo ulento eqakathekileyo angabe efuna ukukutshela yona. Kodwa kungabe kuyiso yini isikhathi sokuthi umphendule?

² Zinengi izinto eziqakathekileyo okumele sizenze empilweni. Kodwa kasikhohlwa ukuthi okuqakatheke kakhulu yikukhonza uJehova. (Mat. 6:33) Kumele sihlale silelihlo elibukhali ngoba zinengi izinto ezingasiphambanisa ekukhonzeni.—Zaga. 4:25; Mat. 6:22.

3. Sizaxoxa ngani esihlokweni lesi?

³ Akula ngitsho loyedwa phakathi kwethu ongafuna ukuthi kube lezinto ezimphambanisayo ekukhonzeni. Lanxa kunjalo, zizahlala zikhona izinto ezingasiphambanisa. (Luk. 21:​34-36) Esihlokweni lesi sizaxoxa ngokuthi kuyini okungasiphambanisa, sibone lokuthi uJesu wenzani ukuze kungabi lalutho olumphambanisayo, besesiphetha ngokuxoxa ngokuthi singenzani ukuze kungabi lalutho olusiphambanisayo ekukhonzeni uJehova.

YIZIPHI IZINTO EZINGASIPHAMBANISA?

4-6. Yiziphi izinto ezingasiphambanisa?

⁴ Wonke umuntu ulakho okumkhathazayo. Mhlawumbe sikhuluma nje uyagula kumbe uyagulelwa kumbe kulokunye nje okungahambi kuhle emulini. Nxa singananzeleli, ukukhathazeka kakhulu ngezinto lezi kungacina kusiphambanisa.

⁵ Emazweni amanengi kugcwele izimpi, iziphithiphithi lodlakela kanti lemisebenzi kayibonwa njalo imikhuhlane ithe chithi saka. Kodwa konke lokhu akusimangalisi ngoba siyakwazi ukuthi siphila ensukwini zokucina.—2 Thim. 3:1

⁶ Nxa abantu bangehlelwa zinhlupho lezi impilo yabo ingahle itshintshe. Bangaqala lokukhathazeka kakhulu ngoba bayabe sebebona sekumnyama emuva laphambili. Lokhu kungenza abanye bacine besiyaphephela kwezokuzilibazisa ngoba bezitshela ukuthi mhlawumbe bangakhohlwa ngendubo zabo. Khona kuyazwisiseka ukuthi kungani becina besenza njalo. Phela vele uJehova wayengasidalelanga ukuthi sithwale nzima. Manje singenzani ukuze izinto lezi zingasiphambanisi ekukhonzeni? Asixoxeni ngalokho okwenziwa nguJesu besesibona ukuthi sifundani.

UJESU KAZANGE AVUME UKUPHANJANISWA

7. Kuyini okwakungaphambanisa uJesu?

⁷ Kunengi kakhulu okwakungaphambanisa uJesu ngesikhathi elapha emhlabeni. Ngalezonsuku abantu abanengi babengabayanga njalo bethwele nzima ngenxa yemikhuhlane. (Mat. 14:14; Mak. 14:7) Lakwezombusazwe izinto zazimi manzonzo. AmaRoma lamaJuda babezondana okwengwe lenja, ikanti lamaJuda ngokwawo ayethwalisane nzima. Abantu bathi benanzelela ukuthi uJesu uyenelisa ukwenza izimangaliso bahle bathi nangu umuntu ongaqeda zonke inhlupho zethu. (Joh. 6:​14, 15) Okunye okwakungamphambanisa yizilingo zikaSathane. Phela ngelinye ilanga uSathane wamlanda wafika wamthembisa yonke imibuso yomhlaba. (Mat. 4:​8, 9) Ngitsho lomphostoli uPhetro wake waphosa wamfaka esilingweni aze athi kuye: “Zizwele isihawu Nkosi.”—Mat. 16:​21, 22.

8. Kuyini okwanceda uJesu ukuthi aqhubeke esenza intando kaNkulunkulu?

⁸ Kuyini okwanceda uJesu ukuthi aqhubeke esenza intando kaNkulunkulu? Okokuqala, yikulingisela indlela uJehova acabanga ngayo. (Joh. 8:28; 14:9) Okwesibili, yikukhuthala emsebenzini wokutshumayela. (Mat. 9:35) Okwesithathu, yikuqakathekisa ukwenza intando kaNkulunkulu. (Joh. 4:34) Kazange avume ukuyengwa nguSathane futhi wananzelela ukuthi lokho okwakukhulunywa nguPhetro kwakungavumelani lentando kaNkulunkulu. (Mat. 4:10; 16:23) UJesu kazange avume ukuthi imibono yabantu kumbe izinto ababezenza zimphambanise ekwenzeni intando kaJehova. Izilingo ezisehlelayo zingabe zitshiyene lalezo uJesu ahlangana lazo kodwa kunengi esingakufunda kulokho akwenzayo.

UNGAVUMI UKUPHANJANISWA

9. Kuyini okungakunceda uzwisise indlela uJehova acabanga ngayo? (U-Efesu 5:17)

⁹ Cabanga njengoJehova. Lokhu kuzakunceda ukuthi ubeyazi intando yakhe. (Bala u-Efesu 5:17.) Nxa ungabala iLizwi likaNkulunkulu njalo ucabangisise ngalo uzabakwazi ukuthi kuyini okuthokozisa uJehova. Lanxa iBhayibhili lingabe lingakhulumi ngohlupho ophakathi kwalo ungenelisa ukubona ukuthi kuyini uJehova afuna ukwenze. Yikho nxa ubala iBhayibhili zama ukuzwisisa ukuthi uJehova uthini, ubususenza lokho okufundileyo.

10. Kuyini okunye okungasinceda ukuthi sicabange njengoJehova?

¹⁰ Okunye okungasinceda yikubala ngabantu okukhulunywa ngabo eBhayibhilini besesibona ukuthi uJehova wabancedisa njani. (Jer. 45:5) Nxa ubala indaba ethile eseBhayibhilini nansi imibuzo ongazibuza yona: ‘Indaba le ingifundisani ngoJehova? Kuyini engingakwenza ukuze ngicabange njengoJehova?’ Siyakwazi ukuthi uJehova ulenhlakanipho ejule kakhulu yikho kumele simcele ukuthi asincedise senze intando yakhe. (Isaya. 55:9; Hubo. 143:10) Akumelanga sikhohlwe lokuthandaza simcela ukuthi asincedise sicabange njengaye.—1 Joh. 5:14.

11. Kuyini uJehova azasenzela khona?

¹¹ Ukucabanga njengoJehova kuzasinceda sihlale sikhumbula ukuthi umumo lo wezinto usuzadlula. (Mat. 24:44) UJehova uzimisele ukusincedisa nxa kulezinto ezisenza silale singalele. (Hubo. 55:22; Zaga. 3:​5-7) Kafuni sikhathazeke kuze kwedlulise.—Mat. 6:​31, 32.

12. Kuyini okungasinceda ukuthi singakhathazeki kakhulu ngezinto ezenzakala emhlabeni? (UMathewu 5:3)

¹² Qakathekisa ukukhonza uJehova. Ezinye izinto ezisikhathazayo asingeke sizitshintshe. Manje singenzani ukuze singakhathazeki kakhulu ngazo? Kumele senze konke okusemandleni ethu ukuze ubungane bethu loJehova buhlale buqinile. (Bala uMathewu 5:3.) Lokho singakwenza ngokubala iBhayibhili langokukhuthala emisebenzini esiyenzela uJehova. Singenza njalo sizamthokozisa uJehova ngoba siyabe sisisebenzisa kuhle isikhathi sethu.—Zaga. 23:15.

13. Singenzani ukuze sisisebenzise kuhle isikhathi sethu?

¹³ Singenzani ukuze sisisebenzise kuhle isikhathi sethu njengoba sekuseduze ukuthi umhlaba lo utshabalaliswe? (Efe. 5:​15, 16) Kumele sizame ukubalekela loba yini engasidlela isikhathi. Ngokwesibonelo, nxa singatshona sesilandelela imibiko ekhitshwa ngabezindaba singadana futhi sicine sesidlalise isikhathi ebesingasisebenzisa ekukhonzeni uJehova. Kodwa nxa singakhuthala emsebenzini wokutshumayela, abantu abanengi bazathola ithuba lokufunda ngoJehova.—1 Thim. 2:4.

14. Kuzasinceda ngani ukuhlala sikhuthele ekukhonzeni? (Khangela lomfanekiso.)

¹⁴ Nxa singahlala sikhuthele ekukhonzeni uJehova asisoze sikhohlwe ukuthi sesisemaphethelweni ensuku zokucina. Siyakubona sibili ukugcwaliseka kweziphrofetho eziseBhayibhilini. Lanxa sikwazi ukuthi izinto zizaqhubeka zisiba nzima, kasesabi lutho ngoba uJehova uzahlala esincedisa.—Hubo. 16:8; 112:​1, 6-8.

15. Kungani kumele sikhethe kuhle ezokuzilibazisa? (U-1 Phetro 4:7)

¹⁵ Ungathatheki ngezinto ezingancediyo. Abantu abanengi namuhla baphilela injabulo, bakhohliwe nje ngosuku lukaJehova. Khona akukubi ukuthi abantu bake bazikholisele kodwa kumele sinanzelele singacini sesiphilela khona, sesikhohlwe nya ngokukhonza uJehova. (Bala u-1 Phetro 4:7.) Esizilibazisa ngakho kumele kutshengise ukuthi sizama ukucabanga njengoJehova.—2 Thim. 1:7.

16. Kuyini uJesu ayecabanga ngakho esezabulawa?

¹⁶ UJesu wayekwazi ukuthi ukwenza intando kaNkulunkulu yikho okuqakathekileyo empilweni. Ngitsho langesikhathi esezabulawa wayelokhe ecabanga ngokuhlala ethembekile kuYise kodwa abafundi bakhe bona behluleka ukuhlala bephapheme. IBhayibhili lithi: “Babengelamandla ngenxa yosizi ababekulo.”—Luk. 22:​39-46; Joh. 19:30.

17. Abantu abanengi bazisebenzisa njani ezokuxhumana kodwa kungani kumele sinanzelele? (Khangela lomfanekiso.)

¹⁷ Kungaba nzima ukuthi lathi sihlale siphapheme ekukhonzeni ngoba kulezinto ezinengi ezenzakalayo ezingasiqeda amandla. Abantu abanengi namuhla bazitshela ukuthi bangabalekela inhlupho abalazo ngokusebenzisa ezokuxhumana. Ezokuxhumana zenza ukuthi abantu benelise ukuxoxa lezihlobo labangane, bathumelane amapikitsha njalo bathole imibiko etshiyeneyo yezinto ezenzakalayo. Abanye basebenzisa ezokuxhumana ukuze babukele amafilimu, balele izingoma kumbe badlale lemidlalo etshiyeneyo. Kodwa njengoba zingapheli izinto ezitholakala kwezokuxhumana kulula ukuthi abantu bacine sebephilela zona beqeda isikhathi sabo lamandla abo belandelela yonke into etholakala lapho. Nanku umbuzo ongazibuza wona, ‘Indlela engisebenzisa ngayo ezokuxhumana iyanginceda yini kumbe ingiqedela isikhathi sokwenza izinto eziqakathekileyo?’

18. Kungani kumele sizisebenzise kuhle ezokuxhumana?

¹⁸ Abanengi bayakukholisa ukubukela inhlelo ezitshiyeneyo ku-TV kumbe ku-internet lokudlala imidlalo etshiyeneyo futhi izinto lezi ziyabanceda ukuthi baphumuze ingqondo. Kodwa lasendabeni le kumele sinanzelele. Amavidiyo atholakala ku-internet kawapheli, uyathi uqeda kubukela le kungene eyinye futhi kulengozi yokuthi ungacina usubukela lamavidiyo atshengisa udlakela kumbe ukungaziphathi. Lokhu kwake kwenzakala komunye umfowethu ohlala e-Asia. Waqalisa ebukela okuyiziqephu kwamavidiyo kwaya kwaya kwacina sekumngene kakhulu, sekuyinto ahlala eyenza. Kungakayi ngaphi wacina esebukela iziqephu ezazitshengisa abantu abangaziphathanga. Ngokuhamba kwesikhathi waqalisa lokubukela iphonografi. Wathi esenanzelele ukuthi sekukubi wacela abadala ukuthi bamncedise, laye wahle wazimisela ukulwisana lomkhuba lo ayesewuqalisile. Wadilitha zonke inhlelo ezazimthele emanyaleni wasenciphisa lesikhathi ayesichitha kwezokuzilibazisa. Okwenzakala kumfowethu lo kutshengisa ukuthi kumele sinanzelele sibili izinto esizilibazisa ngazo.

19. Kumele siyibone njani indaba yokuvakatsha sisiyatshaywa ngumoya?

¹⁹ Abanengi bethu bayakukholisa ukuvakatsha besiyabethwa ngumoya kwezinye indawo futhi lokhu kuqakathekile ngoba kwenza abantu bake baphumule. Kodwa lasendabeni le kumele sinanzelele, singakhohlwa ukuthi kuyini okuqakathekileyo. (Flp. 1:10) Nansi imibuzo esingazibuza yona: ‘Ngizavakatshela ngaphi futhi ngizahamba isikhathi esinganani? Engizakwenza ngikhonale kuzatshengisa yini ukuthi ngiqakathekisa ukwenza intando kaJehova?’

20. Uzimisele ukwenzani?

²⁰ Ngamunye wethu kumele alwise sibili ukuze kungabi lalutho olumphambanisayo ekukhonzeni. (Isaya. 48:17) UJehova uzasincedisa ukuthi simelane laloba yibuphi ubunzima yikho akumelanga sivume ukuthi inhlupho esihlangana lazo zisiqede amandla. Ngakho kasizimiseleni ukuhlala sisenza intando kaJehova, sizame ukucabanga njengaye futhi singavumeli ukuthi ezokuzilibazisa zisiphambanise ekukhonzeni. Nxa singenza njalo ‘sizabambisisa ukuphila koqobo.’—1 Thim. 6:19.