Ncedisa Izihlobo Ezingakabi NgoFakazi

1-2. Izihlobo zethu ezingakabi ngoFakazi zingasiphatha njani?

NGELINYE ilanga uJesu watshela indoda eyayifuna ukuba ngumlandeli wakhe wathi: “Hamba ngakini ezihlotsheni zakho uyezitshela konke uJehova akwenzele khona.” (Mak. 5:19) Okwenza uJesu wakhuluma amazwi la yikuthi uyakwazi ukuthi abantu bayakuthanda ukutshela abanye izindaba ezinhle.

² Usakhumbula yini ukuthi wezwa njani ngesikhathi uqalisa ukufunda iBhayibhili? Kumele ukuthi wakuthanda kakhulu owawukufunda wasuqalisa ukukuxoxela izihlobo zakho. Kodwa kungenzakala ukuthi izihlobo zakho zazingafuni lakuzwa ukuthi usufunda iBhayibhili. Engxenye indlela owabatshumayeza ngayo yabakhuba kwasekubangela ukuthi lingazwanani. Nxa lokhu kwake kwenzakala kuwe, isihloko lesi sizakunceda ukuthi uqhubeke ukhonza uJehova njalo uzwanana lezihlobo zakho.

3.Sizaxoxa ngani esihlokweni lesi?

³ Nanzi izinto esizaxoxa ngazo esihlokweni lesi: Sizabona ukuthi kungani kuqakathekile ukuba lozwelo lanxa izihlobo zethu zingafuni ukufunda ngoJehova. Sizabona lokuthi singenzani nxa izihlobo zethu zikhuluma kubi ngathi kumbe zisiphatha kubi. Okunye esizaxoxa ngakho yikuthi kungani kuqakathekile ukuthi sibekezele, besesibona ukuthi singazitshengisa njani izihlobo zethu ukuthi siyazithanda.

WOBA LOZWELO

4. Kuyini okwenza uJesu waqhubeka etshumayela?

⁴ UJesu kazange akhalale ukutshumayela izindaba ezinhle lanxa abanye babengafuni ukumlalela. Waze wazifanisa lesisebenzi esasilesihlahla somkhiwa esasingatheli. Indoda le yagebha eceleni kwesihlahla yasithela umquba ilethemba lokuthi isihlahla leso sizathela. (Luk. 13:​6-9) Ngesikhathi uJesu elandisa umzekeliso lo, kwasokuleminyaka edlula emithathu ezama ukuncedisa amaJuda ukuthi abelokholo kuye. Kuyini okwakumfuqa ukuthi aqhubeke ewancedisa? Yikuthi wayebathanda futhi ebazwela kakhulu abantu laba.

5 Kuyini okwenza uJesu wabazwela abantu?

⁵ Okwenza uJesu wabazwela kakhulu abantu laba yikuthi wayekwazi ukuthi abakhokheli benkolo babengabafundisi iqiniso ngoNkulunkulu. Wayebabona ‘benjengezimvu ezingelamelusi.’ (Mak. 6:34) Ngitsho langesikhathi insuku zokufa kwakhe sezisondele, walikhalela iJerusalema ngoba abantu abanengi ababehlala edolobheni leli babezabulawa ngenxa yokungabi lokholo kuye lakuYise. (Luk. 19:​41-44) Lathi kumele sibazwele abemuli abangakabi ngoFakazi, sizimisele ukubafundisa ngoJehova.

6. Kungani kungamelanga sikhalale ukuncedisa izihlobo zethu ezingakabi ngoFakazi? (UGalathiya 6:9)

⁶ Bala uGalathiya 6:9. Kungenzakala ukuthi okwakhathesi izihlobo zethu azifuni ukufunda ngoJehova kodwa thina akumelanga sikhalale “ukwenza okuhle.” Phela kuthatha isikhathi ukuthi umuntu atshiye izinto obesekuleminyaka leminyaka ezikholwa abesesamukela lokho okufundiswa liBhayibhili. Engxenye lawe kudala wawuphila njengabantu bomhlaba abangelathemba njalo abangakholwayo kuNkulunkulu. (Efe. 2:12) Nxa kunjalo, kumele ukuthi uyambonga umuntu owakufundisa ngoJehova, wakubekezelela waze watshintsha. Lawe ungenelisa ukuncedisa izihlobo zakho ukuthi zifunde ngoJehova nxa ulozwelo.

ZAMA UKUBAZWISISA ABEMULI

7. Kuyini okungabe kwenza ukuthi abafowabo bakaJesu bangabi ngabalandeli bakhe?

⁷ Kungenzakala ukuthi abafowabo bakaJesu babezwile ngezimangaliso ayezenze eGalile. (Luk. 4:​14, 22-24) Lanxa kunjalo, kabazange bahle baba ngabalandeli bakhe. (Joh. 7:5) IBhayibhili kalisitsheli ukuthi kuyini okwabangela ukuthi bangakholwa kuJesu. Kanti kuyini kanje okwakubangela ukuthi amanye amaJuda athikaze ukuba ngabalandeli bakaJesu? Kukhanya amanye ayesesaba ukuhlukuluzwa ngamanye amaJuda. (Joh. 9:​18-22) Amanye wona ayemeyisa uJesu ngoba wayekhulele emehlweni awo. Kwakuwathwalisa nzima ukukholwa ukuthi uJesu lo amaziyo sekungathiwa nguMesiya. (Mak. 6:​1-4) Kungenzeka ukuthi lokhu yikho okwenza abafowabo bakaJesu bangabi ngabalandeli bakhe. Izihlobo zakho zona ke? Engxenye okwenza izihlobo zakho zingakulaleli yikuthi zikujayele kakhulu kumbe ziyesaba ukuhlekwa ngabanye.

8. Kuyini okungenza izihlobo zethu zisiphathe kubi?

⁸ Zibuze ukuthi kuyini okungabe kusenza ukuthi bakuphathe kubi. Kungenzeka ukuthi abafowabo bakaJesu ngabanye balabo ababesithi uJesu usephambene. (Mak. 3:21) Kuyini okungabe kwabangela ukuthi bacine besitsho njalo? Amanye amavesi atshengisa ukuthi uJesu wayegcwalelwa ngabantu aze aswele ngitsho lesikhathi sokudla. (Mak. 3:20) Kungenzakala ukuthi abafowabo bakaJesu babecabanga ukuthi uJesu wayesehlanyiswa yikutshumayela. Lezihlobo zethu lazo sezingacabanga ukuthi sesihlanyiswa liBhayibhili. Kodwa akumelanga sivumele ukuthi abakukhulumayo labakwenzayo kusicaphule.

9.Kuyini ongakwenza ukuze uncede izihlobo zakho? (U-1 Phetro 3:​1, 2) (Khangela lemifanekiso.)

⁹ Woba lomusa. Nxa ulomusa futhi uziphatha kuhle izihlobo zakho lazo zingacina sezikuphatha kuhle. (Bala u-1 Phetro 3:​1, 2.) Ake sithi umkakho kasoFakazi futhi indaba yokuthi uyaphuma uye ekutshumayeleni lemihlanganweni yebandla ayimphathi. Ubungenzani ukuze angacini esecabanga ukuthi awusamthandi? Kuyavuma yini ukuthi utshone laye nxa kuyikuthi uyabe engekhaya ubusuhamba ekutshumayeleni ngelinye ilanga? Nxa ungatshengisa ukuthi uyamthanda umkakho angacina esetshintsha indlela ababona ngayo oFakazi.

10.Singamlingisela njani uJesu?

¹⁰ Ungazihluphi ngakho konke abakutshoyo. UJesu kazange atshone ephikisana labantu ababesithi uyisihwaba futhi uyisidakwa. Wayefuna ukuthi abantu bazibonele bodwa ukuthi lokho ababekuzwa kwakuliqiniso yini. (Mat. 11:19) UJesu watshengisa ukuthi wayengadlulisi amalawulo kuloba yini ayeyenza. (Khangela loJoh. 2:​2, 6-10.) Lawe okumele uhlale ukwazi yikuthi vele abantu abasoze bayekele ukukhuluma. Wena zimisele ukuphila ngendlela ethokozisa uJehova, ungazikhathazi ngokuthi abantu bacabangani ngawe. Kwazi bani, ngelinye ilanga sebengabona ukuthi amahungahunga ababewezwa angamanga.

BABEKEZELELE NJALO UNGALAHLI ITHEMBA

11.UJesu wayeziphatha njani izihlobo zakhe?

¹¹ IBhayibhili litshengisa ukuthi uJesu wayebabekezelela abafowabo. Ngokwesibonelo, abafowabo bakaJesu labo babekhona eKhana ngesikhathi uJesu etshintsha amanzi esiba liwayini. (Joh. 2:​11, 12) Lanxa kunjalo, abazange bakukholwe ukuthi uJesu wayenguMesiya. UJesu wahle wabaninela khatshana yini? Hatshi. UJesu wayehlala ekhuluma kuhle labafowabo lanxa babengakholwa ukuthi unguMesiya.—Joh. 7:​5-8.

12. Kungani kungamelanga silahle ithemba?

¹² Nxa singahlala sikhumbula ukuthi uJehova ulesihawu asisoze silahle ithemba. Nxa inkolo yamanga isibhujiswa ezinye izihlobo zethu zingakhumbula ukuthi sake satshumayela ngendaba leyo.a (Isam. 17:16) Sekungenzakala lokuthi ezinye izihlobo zethu ziqalise ukukhonza uJehova ukuhlupheka okukhulu sekuqalisile. Okwakhathesi asiqhubekeni sincedisa izihlobo zethu nxa zisebunzimeni ngoba nxa zingabona ukuthi siyazithanda kuzakubalula ukuthi zisilalele.

TSHENGISA UKUTHI UYABATHANDA

13. Kuyini okungamelanga sikwenze?

¹³ Lanxa kukunengi okumele sikwenze ekukhonzeni uJehova asifuni abemuli bacine becabanga ukuthi asisabathandi kumbe asiselasikhathi labo. (Mat. 7:12) Manje singabatshengisa njani ukuthi siyabathanda?

14-15. Singatshengisa njani ukuthi siyazithanda izihlobo zethu? Nika isibonelo.

¹⁴ Batshengise ukuthi uyabathanda. Nxa ungahlala uxoxa lezihlobo zakho zizabona ukuthi uyazithanda. Babhalele amameseji kumbe ubathumele amapikitsha owathethe uvakatshile loba ulabangane bakho lizikwejisela. Ungabathumela izipho kumbe ubabhalele incwadi. Khonokho okuncane oyabe ukwenzile kuzatshengisa ukuthi awubathontisi.

¹⁵ Kulomunye udadewethu okuthiwa ngu-Anna ohlala e-Armenia. Abangakibo bayakukholisa kakhulu ukuba ndawonye ikakhulu nxa kuyiholideyi kumbe kulusuku lokuzalwa komunye wabo emulini. Ngesikhathi u-Anna esefunda iBhayibhili, abangakibo basebecabanga ukuthi wayezahle akhohlwe ngabo nxa esenguFakazi. Babekhathazeke langokuthi ngeke aphinde akholise empilweni. Manje u-Anna wenzani? Uthi: “Ngihlala ngizivakatshela izihlobo zami futhi ngiyazitshela lokuthi izinto zingihambela njani. Ngiyazinxusa ukuthi zingivakatshele sizozikwejisela labangane bami. Khathesi izihlobo zami sezisazana labangane bami futhi lokhu kwenza zingakhathazeki kakhulu ngami ngoba ziyabona ukuthi ngiyazikholisela empilweni.”

16. UJesu watshengisa njani ukuthi wayemqakathekisa umfowabo uJakhobe? (Khangela lamabala angaphansi.)

¹⁶ Tshengisa ukuthi uyabaqakathekisa. UJesu wakwenza kwacaca ukuthi wayemqakathekisa umfowabo uJakhobe ngoba esanda kuvuswa nje wahle wayambona. (1 Khor. 15:7) Kumele ukuthi uJakhobe wathokoza kakhulu ngoba uJesu wayengamkhalalanga. Kungenzakala ukuthi lokhu yikho okwenza uJakhobe wakholwa sibili ukuthi uJesu wayenguMesiya. Kufanele ukuthi kusukela lapho uJakhobe wancedisa izihlobo zakhe ukuthi zikholwe ukuthi uJesu wayeyiNdodana kaNkulunkulu.b—Imiseb. 1:14.

17. Sifundani kuRoma 12:15? (Khangela lomfanekiso.)

¹⁷ Bala uRoma 12:15. Empilweni kuba lezikhathi ezimnandi lezikhathi ezinzima. Yikho kumele sithokoze lezihlobo zethu futhi sikhale lazo nxa zisebunzimeni.c Ngokwesibonelo, nxa ungezwa ukuthi isihlobo sakho sibelethile ungasenzela amhlophe njalo usinike lesipho. Nxa kungafiwa emulini kumele siduduzane, sisekelane njalo sincedisane. Kuqakathekile sibili ukuthi sihlale sixoxa lezihlobo zethu ikakhulu nxa zisebunzimeni. Nxa zingabona ukuthi sihlala silazo kukuhle kukubi zingatshintsha indlela ezisibona ngayo.

18. Singamlingisela njani u-Andreya?

¹⁸ Zama ukuthi bajayelane lalabo okhonza labo. U-Andreya wathi esezwile ukuthi uJesu wayenguMesiya wasuka wayatshela umfowabo uPhetro. (Joh. 1:40-42) Lawe ungenza okufanayo. Ngokwesibonelo, unganxusa isihlobo sakho ukuthi sibuye sizongena lawe imihlangano yebandla kumbe like lizikhiphe liyekudla labangane. Khonokho kuzanceda izihlobo zakho zibone ukuthi oFakazi abaziboni bengcono kulabanye abantu.

19. Kumele siziphathe njani izihlobo zethu? (U-1 Phetro 3:15)

¹⁹ Bala u-1 Phetro 3:15. Abanye abemuli abasoze bazwisise ukuthi kungani singenzi ezinye izinto kodwa bazahlala bekhumbula indlela esibahlonipha ngayo lokuhle esibenzela khona. Lanxa singasoze siyehlangana labo emibuthanweni ephikisana lalokho okutshiwo liBhayibhili kumele sizame ukubavatshela ngezinye izikhathi, sikwejise labo futhi sibanike lezipho.

UNGAKHALALI UKUNCEDISA IZIHLOBO ZAKHO

20. Ufundani kuJakhobe?

²⁰ Lanxa uJakhobe engazange atshumayele loJesu, wacina esengumlandeli wakhe. (Gal. 1:​18, 19; 2:9) Wacina esekukholwa sibili lokho okwakufundiswa nguJesu ngoba encwadini ayibhalela amaKhristu waqamba ezinye izinto ezifanana lalezo ezakhulunywa nguJesu entshumayelweni yasentabeni.d

21.Kungani kungamelanga sikhalale ukuncedisa izihlobo zethu?

²¹ Kungenzakala ukuthi izihlobo zethu zingasilaleli futhi ziqhubeke zisiphatha kubi lanxa sizama ukutshengisa ukuthi siyazithanda. Kodwa kumele siqhubeke sibaphatha ngomusa silingisela uNkulunkulu wethu olesihawu uJehova leNdodana yakhe uJesu. (Luk. 6:​33, 36) Ngokuhamba kwesikhathi, bangatshintsha indlela abasiphatha ngayo futhi abasoze bakukhohlwe lokho esibatshela khona. Ungakhalali ukubancedisa ngoba uzamangala ngelinye ilanga abanye babo sebekhetha ukukhonza uJehova!