UJehova Uzakuncedisa Nxa Udanile

1-2. Yayinjani impilo kaPhawuli futhi thina sifundani kuyo? (URoma 7:​21-24)

SIYAKWAZI ukuthi umphostoli uPhawuli wayekhuthele emsebenzini wokutshumayela lokuthi wabhala amabhuku amanengi aseBhayibhilini. Okunye esikwaziyo yikuthi wayelesibindi, ethembekile futhi eyingcitshi ekufundiseni. Lanxa kunjalo, ngezinye izikhathi wayeke adane. Phela laye wayengumuntu njengathi.

² Bala uRoma 7:​21-24. Encwadini le, uPhawuli wakhuluma ngezinto eziyake zenzakale lakithi. Wayefuna sibili ukwenza izinto ezidumisa uNkulunkulu lokumlalela kodwa njengomuntu olesono wayesehluleka ngezinye izikhathi. Okunye okwakumqeda amandla yikucabanga ngezinto ezimbi ayezenza engakabi ngumKhristu lezinye nje inhlupho ayehlangana lazo empilweni.

3. Sizaxoxa ngani esihlokweni lesi?

³ Lanxa uPhawuli wayeke adane wayelwisa ukuthi angahlali ecabanga ngezinto ezazimkhathaza. Esihlokweni lesi sizaphendula imibuzo elandelayo: Yiziphi izinto ezazikhathaza uPhawuli? Kuyini akwenzayo ukuze ukukhathazeka kungamqedi amandla? Thina singalwisana njani lokudana?

IZINTO EZAZIDANISA UPHAWULI

4. Kuyini okwakudanisa uPhawuli?

⁴ Ayekwenza engakabi ngumKhristu. Kulezinto ezinengi ezimbi ezazisenziwa nguPhawuli engakabi ngumKhristu futhi ngalesosikhathi wayebizwa ngokuthi nguSawuli. Ngokwesibonelo, wavumelana lokubulawa kukaStefane umKhristu owayethembekile. (Imiseb. 7:58; 8:1) Kanti njalo wayewahlukuluza kabuhlungu amaKhristu.—Imiseb. 8:3; 26:​9-11.

5. UPhawuli wayesizwa njani ngezinto ayezenze engakabi ngumKhristu?

⁵ Kumele ukuthi uPhawuli wayeke acabange ngezinto ezimbi ayezenza engakabi ngumKhristu futhi lokhu kwakumdanisa. Ngokwesibonelo, encwadini yakhe yokuqala ayibhalela abaseKhorinte ngo-55 C.E., wathi: “Akungifanelanga ukubizwa ngokuthi ngingumphostoli ngoba ngangihlukuluza ibandla likaNkulunkulu.” (1 Khor. 15:9) Kwathi sekudlule iminyaka engaba mihlanu ebhalele abaseKhorinte, wabhalela labase-Efesu ebatshela ukuthi ‘wayezibona emncane kulomncane wabo bonke abangcwele.’ (Efe. 3:8) Usakhumbula yini lamazwi awabhalela uThimothi? UPhawuli wathi ‘ngangingumuntu othukayo, ngihlukuluza amaKhristu futhi ngiziphakamisa.’ (1 Thim. 1:13) Kumele ukuthi wayedana kakhulu nxa ebona abantu ayebahlukuluza kumbe amalunga ezimuli zawo.

6. Kuyini okunye okungabe kwakukhathaza uPhawuli? (Khangela lamabala angaphansi.)

⁶ Ameva enyameni. Kulento eyayikhathaza uPhawuli waze wayifanisa ‘lameva enyameni.’ (2 Khor. 12:7) Lanxa engaqambanga ukuthi uhlupho lolu kwakuyini kumele ukuthi lwalumthwalise nzima kakhulu futhi lwalumenza akhathazeke.a

7. Kungani kwakunzima ukuthi uPhawuli ahlale esenza okuqondileyo? (URoma 7:​18, 19)

⁷ Amaphutha ayewenza. UPhawuli wayedana nxa angaphambanisa. (Bala uRoma 7:​18, 19.) Wayefisa sibili ukuhlala esenza okuqondileyo kodwa isono ayelaso sasimthwalise amagaba avuzayo. Isifiso sakhe sokwenza okuqondileyo sasihlala siphikisana lenyama yakhe elesono. Kumele ukuthi wayedana kakhulu nxa angakhuluma kumbe enze izinto ezingamthokozisiyo uNkulunkulu. Lanxa kunjalo, waqhubeka elwisa.—1 Khor. 9:27.

KUYINI OKWANCEDA UPHAWULI?

8. Kuyini okwanceda uPhawuli ukuthi alwisane lezifiso ezimbi?

⁸ Izincwadi ezabhalwa nguPhawuli zitshengisa ukuthi wayekwazi ukuthi umoya ongcwele unganceda amaKhristu ukuthi enelise ukwenza izinto ezithokozisa uNkulunkulu. (Rom. 8:13; Gal. 5:​16, 17) UPhawuli wakhuluma kanengi ngokuthi amaKhristu kwakumele abalekele izifiso ezimbi kanye lezenzo ezidanisa uNkulunkulu. (Gal. 5:​19-21, 26) Wayevuma ukuthi kulalapho asilela khona, abesehlolisisa ukuthi iLizwi likaNkulunkulu lalingamnceda njani futhi asebenzise lokho ayekufundile. Nxa lathi singamlingisela sizenelisa ukuthokozisa uJehova.

9-10. Kuyini okwanceda uPhawuli ukuthi ahlale ethokoza? (U-Efesu 1:7) (Khangela umfanekiso.)

⁹ Manje kuyini okwakunceda uPhawuli ukuthi athokoze lanxa ngezinye izikhathi wayeke adane? Okunye okwakumthokozisa yikuzwa imibiko emihle eyayivela emabandleni atshiyeneyo. (2 Khor. 7:​6, 7) Kwakumthokozisa lokuba labangane abakhonza uJehova. (2 Thim. 1:4) Okunye okwakumthokozisa yikuba lomzwangedwa ohlanzekileyo lokuthi wayengumngane kaNkulunkulu. (2 Thim. 1:3) Ngitsho langesikhathi ebotshiwe eRoma, uPhawuli wakhuthaza amaKhristu ukuthi ahlale ethokoza. (Flp. 4:4) Nxa sibala izincwadi ezabhalwa nguPhawuli siyazibonela ukuthi wayengahlali ecabanga ngamaphutha akhe kumbe ngezinto ezazimdanisa. Nxa uPhawuli wayefikelwa yimicabango edanisayo, wayezama ukutshintsha indlela acabanga ngayo ukuze acabange ngezinto ezazizamenza athokoze.

¹⁰ Okunye okwanceda uPhawuli ukuthi angahlali edanile yikucabangisisa ngenhlawulo. Wayehlala ezikhumbuza ukuthi uJehova wathuma uJesu ukuthi azomfela. (Gal. 2:20; Bala u-Efesu 1:7.) Lokhu kwamenza wangathandabuzi ukuthi uJehova wayezamthethelela. (Rom. 7:​24, 25) UPhawuli wenelisa ukwenzela uNkulunkulu inkonzo engcwele lanxa wayesenza amaphutha.—Heb. 9:​12-14.

11. Kuzasinceda ngani ukucabangisisa ngalokho okwenzakala kuPhawuli?

¹¹ Lathi kumele silwise ngamandla sibili ukuthi izinto esizicabangayo lesizikhulumayo zithokozise uNkulunkulu. Liqiniso ukuthi ukuhlala sisenza izinto ezilungileyo akulula. Omunye udadewethu okuthiwa ngu-Elizab oyake adane nxa engenza amaphutha uthi: “Kuyangiduduza ukwazi ukuthi ayisimi ngedwa engiyake ngidane ngenxa yokwenza amaphutha. Ngiyambonga uJehova ngokufaka indaba kaPhawuli eBhayibhilini ngoba itshengisa ukuthi uyabuzwisisa ubunzima abantu bakhe abahlangana labo.” Pho kuyini okuzasinceda ukuthi sikhonze uJehova sithokoza lanxa sihlangana lenhlupho?

ESINGAKWENZA UKUZE SILWISANE LOKUDANA

12. Ukuqinisa ubungane bethu loJehova kuzasinceda njani?

¹² Qinisa ubungane bakho loJehova. Nxa ubungane bethu loJehova buqinile sizenelisa ukucabanga ngezinto ezizasenza sithokoze. Ngokwesibonelo, nxa umuntu efuna ukuba lempilakahle kumele adle ukudla okwakha umzimba, ahlale eziqeqetsha njalo alale ngokwaneleyo. Lathi sizancedakala kakhulu nxa singahlala sibala iBhayibhili, sihamba ekutshumayeleni, silungiselela yonke imihlangano njalo siphendula emihlanganweni leyo. Ukwenza izinto lezi kuzasinceda ukuthi sithokoze.—Rom. 12:​11, 12.

13-14. Kuyini okwenziwa ngabanye abafowethu labodadewethu ukuze baqinise ubungane babo loJehova?

¹³ Ake sixoxe ngalokho okwenzakala komunye umfowethu okuthiwa nguJohn, owabanjwa umkhuhlane we-cancer eleminyaka engu-39. Umfowethu lo waswela lokuthi aqalisele ngaphi ngoba wayezibona emncane kakhulu. Okudanisayo yikuthi ngalesosikhathi umntanabo wayeleminyaka emithathu nje kuphela. Manje kuyini okwamncedayo ukuthi aqhubeke eqinisela? Uthi: “Lanxa kwezinye izikhathi ngiyabe ngidiniwe ngiba leqiniso lokuthi siyayingena yonke imihlangano, siyatshumayela iviki ngayinye njalo siba lokukhonza kwemuli.” UJohn uqhubeka esithi: “Khona kuyethusa sibili ukuzwa indaba ezibuhlungu kodwa ngokuhamba kwesikhathi ucina ukunanzelela ukuthi uJehova uyakunika amandla njalo akukhumbuze ukuthi uyakuthanda. Njengoba nje uJehova wangincedisa, lawe ungathandabuzi ukuthi uzakuncedisa kuloba yibuphi ubunzima ozahlangana labo.”

¹⁴ Udadewethu esike sakhuluma ngaye okuthiwa ngu-Eliza uthi: “Nxa ngingazinika isikhathi sokufunda ngoJehova ngingedwa njalo ngiye emihlanganweni yethu ngiyazizwa sengithokoza ngoba ngiyabe sengike ngazikhumbuza ukuthi uJehova uyangithanda.” Omunye umbonisi wesiqinti okuthiwa nguNolan olomkakhe okuthiwa nguDiane uthi: “Singaze sidane njani asiyekeli ukuthandaza, ukubala iBhayibhili, ukungena imihlangano lokutshumayela. Siyakwazi ukuthi konke lokhu sikuphiwe nguJehova ukuze sihlale sithokoza. Ngezinye izikhathi siyabe sizibuza ukuthi uJehova uzasincedisa njani kodwa asikaze sithandabuze ukuthi uzasincedisa.”

15. Ungenzani nxa kuyikuthi uhlala udanile? Sebenzisa umzekeliso.

¹⁵ Ungenzani nxa kuyikuthi konke lokhu esesixoxe ngakho lapha uyakwenza kodwa ulokhe usala udanile? Ake sithi ubulawa liqolo, ubungenzani ukuze uzwe ngcono? Kungakunceda ukuzijayeza ukuhambahamba nsuku zonke. Kodwa nxa ufuna ukwelatshwa kuyabe sekumele udingisise ukuthi ubuhlungu lobo bubangelwa, mhlawumbe uze uyebona lodokotela. Nxa uhlala udanile kuyabe sekumele udingisise ukuthi ukudana lokho kubangelwa kuyini. Udinge amacebo angakunceda eBhayibhilini lasemabhukwini esiwanikwa yinhlanganiso. Khululeka lokuxoxa lomfowethu kumbe udadewethu osebandleni ukuze uthole amacebo angakunceda. Khathesi asixoxeni ngamacebo alandelayo.

16. Yiphi imibuzo ongazibuza yona? (IHubo 139:​1-4, 23, 24)

¹⁶ Cela uJehova akuhlole. UDavida wayekwazi ukuthi uJehova wayemazi mhlophe. Yikho wancenga uJehova ukuthi amncede azwisise ukuthi kuyini okwakumenza abe lemicabango emkhathazayo. (Bala iHubo 139:​1-4, 23, 24.) Lawe kumele uncenge uJehova akuncede uzwisise ukuthi kuyini okukwenza udane, ube usumcela lokuthi akuncede uhlaliseke. Okunye ongakwenza yikuzibuza imibuzo enjengale elandelayo. Kanti vele ngikhathazwa kuyini? Kuyini okubangela ukuthi ngingahlaliseki? Ngiqhubeka ngilokhe ngicabanga ngezinto ezingidanisayo yini? Ngiyazama yini ukucabanga ngezinto ezingithokozisayo?

17. Ungenzani ukuze okubalayo kukuncede?(Khangela lomfanekiso.)

¹⁷ Mazi ngcono uJehova. Sike saxoxa ngokuthi umphostoli uPhawuli wayecabangisisa ngenhlawulo kanye langendlela uJehova athethelela ngayo. Lawe kuzakunceda kakhulu ukucabangisisa ngokuthi uJehova unguNkulunkulu onjani. Ngokwesibonelo ukuthi unguNkulunkulu othethelelayo, olesihawu lolothando oluqotho. Manengi amathuluzi okuchwayisisa ongawasebenzisa, njengeBhuku Lokuchwayisisa LaboFakazi BakaJehova kanye lezihloko ezitholakala ku-jw.org. Nxa ubala izihloko lezo kanye lamavesi alapho, cabangisisa ngokuthi okubalayo kungakunceda njani. Okunye okungakunceda yikukopa izihloko lezo ubusuzifaka lapho okuzaba lula ukuthi uzithole nxa usufuna ukuzibuyelela.—Flp. 4:8

18. Kuyini okuncede u-Eliza loDiane?

¹⁸ Udadewethu okuthiwa ngu-Eliza esike saxoxa ngaye wazinika isikhathi sokuthi afunde ngoJobe. Uthi: “Ngehlelwa zinhlupho zibhabhulene, ngasengizibonela ukuthi ngangingatshiyananga loJobe. Yikho ngachwayisisa ukuze ngithole okunengi ngaye. Lanxa wayengakwazi ukuthi ngubani obangela inhlupho zakhe yena waqhubeka ethembekile kuJehova.” (Jobe. 42:​1-6) Udadewethu okuthiwa nguDiane esike sakhuluma ngaye uthi: “Lezinsuku mina lomkami sifunda ibhuku elithi Sondela KuJehova. Ibhuku leli liyasinceda kakhulu ukuthi simlingisele uJehova njalo simvumele asibumbe. Asivumi ukuthi amaphutha esiwenzayo asiqede amandla ngoba uJehova uqhubeka esibekezelela. Ukuzwisisa ukuthi uJehova unguNkulunkulu onjani kusincede sasondela kakhulu kuye.”—Isaya. 64:8.

UNGATHANDABUZI UKUTHI UJEHOVA UZAHLALA EKUNCEDISA

19. Yiliphi iqiniso esingeke silibalekele kodwa kuyini okumele sihlale sikukhumbula?

¹⁹ Lanxa singawasebenzisa wonke amacebo esikhulume ngawo esihlokweni lesi, iqiniso esingeke siliphike yikuthi ngezinye insuku sizadana, sizizwe siphela amandla! Kodwa ngezikhathi ezinjalo, uJehova uzasincedisa ukuthi sihlaliseke singakhathazeki kakhulu. Uzasincedisa ukuthi sihlale simkhonza silomzwangedwa ohlanzekileyo njalo uyakuqakathekisa konke esimenzela khona.

20. Kuyini ozimisele ukukwenza?

²⁰ Akumelanga ukuthi sivumele inhlupho esihlangana lazo, amaphutha esawenzayo kumbe loba yini esingahlangana layo isidanise okokuthi sicina singasathokozi. UJehova uzasincedisa ukuthi sihlaliseke. (Hubo. 143:10) Sekuseduze ukuthi siphile emhlabeni omutsha lapho esizahlala sicabanga ngezinto ezithokozisayo kuphela. Akula ngitsho lomcabango owodwa ozasidanisa. Sizakukholisa sibili ukukhonza uNkulunkulu wethu osithandayo uJehova!