IBhayibhili Liyamntshintsha Umuntu
KUYINI okwanceda enye indoda eyayilisela futhi ithanda ukubheja ukuthi itshintshe indlela eyayiphila ngayo? Zibalele uzwe.
“Ngangithanda ukubukela imincintiswano yamabhiza.” —URICHARD STEWART
UMNYAKA WOKUZALWA: 1965
ILIZWE AZALELWA KULO: JAMAICA
IMBALI: NGANGILISELA FUTHI NGITHANDA UKUBHEJA
IMBALI YAMI: Ngakhulela endaweni eyabayanga futhi eyayiminyene eseKingston, isigodlo seJamaica. Abantu abanengi babengasebenzi futhi ubugebenga babubhahile. Abantu babehlala bedlela evalweni besesaba amaqembu ezigebenga. Phose nsuku zonke ngangisizwa umbobho ukhala.
Umama wayesebenza gadalala ukuze anakekele mina labanabami ababili ongumfana loyinkazana. Waba leqiniso lokuthi siyathola imfundo engcono. Kodwa mina ngangingasithandi kangako isikolo. Ngangithanda ukubukela imincintiswano yamabhiza okokuthi ngangibaleka esikolo ngiye lapho agijimela khona. Ngangiwathanda kakhulu amabhiza futhi ngiwagada.
Kungakayi ngaphi ngasengibheja amabhiza. Ngangingaziphathanga ngilala labomama abatshiyeneyo. Ngangibhema lembanje futhi ngigqekeza ukuze ngithole imali yokubheja, yokuthenga imbanje leyokubhadala omama engangilala labo. Ngangilombobho obiza mina kodwa ngiyabonga ukuthi angizange ngike ngikubulale umuntu ngesikhathi ngigqekeza.
Kodwa ngacina ngibanjwa ngamapholisa ngasengihanjiswa ejele ngenxa yamacala engangiwenza. Ngathi sengikhululiwe ngaphinda ngayibuyelela impilo engangiyiphila. Phela ngaba yisigebenga esedlula kuqala. Lanxa ngangikhanya angani ngiyimvu yomuntu, ngangilolaka, ngilesihluku futhi ngisenza engikufunayo. Ngangingelandaba lomunye umuntu.
INDLELA IBHAYIBHILI ELANGINTSHINTSHA NGAYO: Ngesikhathi ngisenza izinto lezi ezimbi, umama wafunda IBhayibhili wasesiba nguFakazi kaJehova. Ngananzelela ukuthi umama wayesetshintshile yikho ngasengifuna ukuthola ukuthi kuyini okumenze watshintsha, ngasengiqalisa ukufunda IBhayibhili laboFakazi.
Ngathola ukuthi okwakufundiswa ngoFakazi bakaJehova kwakutshiyene lokwakufundiswa ngamanye amatshetshi lokuthi konke abakukholwayo kwakusekelwe eBhayibhilini. Yibo bodwa ababetshumayela indlu ngendlu njengalokho okwakusenziwa ngamaKhristu okuqala. (UMathewu 28:19; ImiSebenzi 20:20) Ngathi ngibona ukuthi bayathandana sibili ngasala ngingasathandabuzi ukuthi sengiyitholile inkolo yeqiniso.—UJohane 13:35.
Engakufunda eBhayibhilini kwangitshengisa ukuthi kwakumele ngitshintshe indlela engangiphila ngayo. Ngafunda ukuthi uJehova uNkulunkulu uyabuzonda ubufebe lokuthi nxa ngifuna ukumthokozisa kumele ngitshiyane lakho konke okungcolisa umzimba. (2 KwabaseKhorinte 7:1; KumaHebheru 13:4) Ngathinteka ngibona ukuthi engikwenzayo kungamthokozisa kumbe kumdanise uJehova. (IZaga 27:11) Yikho ngazimisela ukutshiya ukubhema, lokulahla imimbobho engangiyisebenzisa futhi ngazama ukuthuthukisa lobuntu bami. Okunye engathwala nzima ukukutshiya yikungaziphathi lokubheja.
Ekuqaliseni ngangingafuni ukuthi abangane bami babekwazi ukuthi ngangifunda IBhayibhili laboFakazi bakaJehova. Kodwa ngatshintsha sengibale uMathewu 10:33, olamazwi kaJesu athi: “Loba ngubani ongiphika phambi kwabantu, lami ngizamphika phambi kukaBaba osezulwini.” Ivesi le yangenza ngahle ngatshela abangane bami ukuthi ngangifunda laboFakazi. Bamangala. Babengakholwa ukuthi umuntu onjengami engafuna ukuba ngumKhristu. Kodwa ngabatshela ukuthi ngasengifuna ukutshintsha impilo yami.
INDLELA ENGISIZAKALE NGAYO: Umama wathokoza kakhulu ebona ukuthi ngasengiqalisa ukuphila ngilandela lokho okutshiwo lIBhayibhili. Wayengasakhathazeki ngami ngokuthi yiziphi izinto ezimbi engifuna ukuzenza. Khathesi sesilobudlelwano obuseduze ngoba sonke sithanda uJehova. Kwezinye izikhathi ngiyake ngikhumbule impilo engangiyiphila ngibone sibili ukuthi uNkulunkulu ungincedisile ukuthi ngitshintshe. Angisayifuni sibili impilo engake ngayiphila.
Aluba angizange ngifunde IBhayibhili ngasengafa kumbe ngisejele. Khathesi ngiyathokoza lemuli yami. Ngikhonza uJehova uNkulunkulu ndawonye lomkami ongisekelayo kanye lendodakazi yethu elalelayo. Ngiyambonga uJehova ngokungivumela ukuthi ngibe phakathi kwemuli yakhe elothando. Ngiyabonga lokuthi omunye umuntu wasebenza nzima engifundisa IBhayibhili. Lami ngiyasiqakathekisa isibusiso sokuncedisa abanye ukuthi bafunde IBhayibhili. Ngimbonga ngingaqedi uJehova ngokungitshengisa umusa omkhulu lokungivumela ukuthi ngisondele kuye.
[Amabala asekhasini 11]
“Ngathinteka ngibona ukuthi engikwenzayo kungamthokozisa kumbe kumdanise uJehova”
[Umfanekiso osekhasini 11]
Ngananzelela ukuthi umama wayesetshintshile
[Umfanekiso osekhasini 11]
Ngilomkami lendodakazi yami