Kungani Kumele Uzinikele KuJehova?

“Ebusuku ingilosi kaNkulunkulu wami engimenzela inkonzo engcwele ifike yama eceleni kwami.”—IMISEB. 27:23.

1. Kuyini okwenziwa yilabo abazabhabhathizwa futhi yiphi imibuzo esizayiphendula esihlokweni lesi?

“USUPHENDUKILE yini ezonweni zakho, wazinikela kuJehova njalo uyakwamukela yini ukuthi uNkulunkulu usebenzisa uJesu Khristu ukuze asindise abantu?” Lo ngomunye wemibuzo emibili ephendulwa ngabazabhabhathizwa ekupheleni kwenkulumo yobhabhathizo. Kungani kumele amaKhristu azinikele kuJehova? Ukuzinikela kuNkulunkulu kusinceda njani? Kuqakatheke ngani ukuthi umuntu azinikele kuNkulunkulu ukuze amkhonze ngendlela ayamukelayo? Ukuze sithole izimpendulo zemibuzo le, kumele siqale sizwisise ukuthi kutshoni ukuzinikela.

2. Kutshoni ukuzinikela kuJehova?

² Kutshoni ukuzinikela kuNkulunkulu? Zwana ukuthi uPhawuli wabuchaza njani ubudlelwano ayelabo loNkulunkulu. Ngesikhathi esemkhunjini watshela ayelabo ukuthi uJehova ‘nguNkulunkulu wakhe’ esitsho ukuthi yena ungokaJehova. (Bala imiSebenzi 27:22-24.) Wonke amaKhistu eqiniso ngakaJehova. Kodwa umhlaba wonke nje “ungaphansi kwamandla kaSathane.” (1 Joh. 5:19) AmaKhristu aba ngakaNkulunkulu ngesikhathi ethandaza emthembisa ukuthi azakwenza intando yakhe. Ukuzinikela yisifungo umuntu asenzayo kuNkulunkulu. Ngemva kwalokho usengabhabhathizwa.

3. Ukubhabhathizwa kukaJesu kwakutshengisani njalo abalandeli bakhe bamlingisela njani?

³ UJesu waba yisibonelo kithi ngokukhetha ukwenza intando kaNkulunkulu. Yena wayevele esezinikele kuNkulunkulu ngoba wazalelwa esizweni sako-Israyeli esasivele sizinikele kuNkulunkulu. Manje yindaba wabhabhathizwa? ILizwi likaNkulunkulu lithi uJesu wathi: ‘Khangela, sengibuyile ukuzokwenza intando yakho Nkulunkulu.’ (Heb. 10:7; Luk. 3:21) Yikho-ke uJesu wabhabhathizwa ukuze azethule phambi kukaNkulunkulu etshengisa ukuthi usezimisele ukwenza intando yakhe. Abalandeli bakhe balingisela yena nxa bebhabhathizwa. Kodwa bona ukubhabhathizwa kwabo kuyabe kuyibufakazi ebantwini bokuthi sebezinikele kuNkulunkulu ngomthandazo.

Ukuzinikela KuNkulunkulu Kusinceda Njani?

4. Ubungane bukaDavida loJonathani busifundisani?

⁴ Ukuzinikela kuNkulunkulu ayisiyo ndaba encane. Yisifungo esiqakatheke ukwedlula zonke umuntu angasenza. Kodwa kusinceda ngani ukuzinikela? Ukuze sikuzwisise kuhle, ake siqale sibone ukuthi kuyini okwenza abantu bacine bengabangane abaqinileyo. Nxa ufuna ukuthi umngane wakho akuthande lawe kumele umthande. Lokho kutsho ukuthi kumele ube lendaba laye, ungenzi loba yini engamzwisa ubuhlungu. Abanye abantu ababengabangane abakhulu okukhulunywa ngabo eBhayibhilini nguDavida loJonathani. Baze benza isivumelwano sokuthi bazahlala bengamathe lolimi. (Bala u-1 Samuyeli 17:57; 18:1, 3.) Lanxa ubungane obunjalo bungajayelekanga, sengenelisa ukuba labo nxa singahlala sithembekile futhi silendaba lomngane wethu.—Zaga. 17:17; 18:24.

5. Isigqili kwakumele senzeni nxa sasifuna ukuba ngesenkosi eyodwa, okwempilo yaso yonke?

⁵ UMthetho owanikwa ama-Israyeli nguNkulunkulu ukhuluma ngesinye isifungo umuntu ayengasenza. Nxa isigqili sasifuna ukuba lenkosi eyodwa okwempilo yaso yonke kwakumele senze isivumelwano sempilo yonke lenkosi leyo. UMthetho wawusithi: “Nxa isigqili leso singaphikelela sithi, ‘Ngiyayithanda inkosi yami lomkami labantwabami; angifuni ukukhululwa,’ inkosi yaso kumele isilethe phambi kukaNkulunkulu weqiniso. Ngemva kwalokho kumele isimise emnyango kumbe emgubazini, isibhoboze indlebe ngosungulo, sibe yisigqili sayo okwempilo yaso yonke.”—Eks. 21:5, 6.

6, 7.(a)Izivumelwano zibanceda njani abantu? (b) Ukuzinikela kuJehova kusinceda ngani?

⁶ Nxa abantu betshada bayabe besenza isivumelwano esiqakatheke kakhulu. Indoda lomfazi abahlala ndawonye bengatshadanga abahlaliseki ngoba bangehlukana loba nini futhi lokhu kwenza labantwababo bangahlaliseki. Kodwa nxa betshadile njalo behlonipha lokho okutshiwo liBhayibhili bazazimisela ukulungisa inhlupho ngendlela elothando.—Mat. 19:5, 6; 1 Khor. 13:7, 8; Heb. 13:4.

⁷ Ngezikhathi zeBhayibhili abantu babencedakala ngokuba lezivumelwano ezibhaliweyo zebhizinesi lezokuqhatshwa. (Mat. 20:1, 2, 8) Lakhathesi kuyanceda. Ngokwesibonelo, kuyanceda ukuba lesivumelwano esibhalilweyo nxa siqala ibhizinesi kumbe siqhatshwa ekhampanini. Izibonelo zonke lezi zitshengisa ukuthi ukwenza izivumelwano kuqakathekile. Yikho lathi kuqakathekile ukuthi sizinikele kuJehova ukuze sibe ngabangane bakhe abaseduze. Khathesi asixoxeni ngokuthi abantu bakudala bancedakala njani ngokuzinikela kuJehova uNkulunkulu lokuthi lokhu kwakusitshoni.

Indlela Ukuzinikela KuNkulunkulu Okwanceda Ngayo Ama-Israyeli

8.Ukuzinikela kuNkulunkulu okwenziwa ngama-Israyeli kwakusitshoni?

⁸ Isizwe sako-Israyeli sazinikela kuJehova lapho sisenza isifungo kuye. UJehova wawabuthanisa eduze kwentaba iSinayi wasesithi kuwo: “Nxa lingalalela ilizwi lami kukho konke, ligcine lesivumelwano sami, lizakuba yimpahla yami eqakathekileyo phakathi kwabo bonke abantu.” Abantu baphendula bathi: “Konke uJehova akukhulumileyo sizimisele ukukwenza.” (Eks. 19:4-8) Ukuzinikela kwama-Israyeli kwakusedlula ukwenza isivumelwano lomunye umuntu. Kwakusitsho ukuthi sebengabantu bakaJehova futhi wayezabaphatha ‘njengempahla yakhe eqakathekileyo.’

9. Isizwe sako-Israyeli sancedakala njani ngokuzinikela kuNkulunkulu?

⁹ Ama-Israyeli ancedakala ngokuba ngabantu bakaJehova. Phela uJehova wayeqotho futhi ewanakekela njengomzali olothando onakekela umntanakhe. Wathi kuwo: “Kambe owesifazana angamkhohlwa yini umntanakhe omunyayo? Angayekela yini ukuyizwela indodana ayithwala ngesisu sakhe? Lanxa owesifazana engakhohlwa, mina kangisoze ngalikhohlwa loba sekutheni.” (Isaya. 49:15) Wawapha uMthetho ukuze awaqondise ezindleleni zakhe. Waphinda wawakhuthaza esebenzisa abaphrofethi njalo wawavikela esebenzisa izingilosi. Omunye umhubi wathi: “Umemezela ilizwi lakhe kuJakhobe, atshele u-Israyeli imilayo lezahlulelo zakhe. Lokhu kazange akwenze kuloba yisiphi esinye isizwe.” (Hubo. 147:19, 20; bala iHubo 34:7, 19; 48:14.) UJehova uzabanakekela labo abazinikela kuye lamuhla njengoba nje wasinakekela isizwe esasizinikele kuye.

Kungani Kumele Sizinikele KuNkulunkulu?

10, 11. Sizalwa singabangane bakaNkulunkulu yini? Chasisa.

¹⁰ Nxa kukhulunywa ngendaba yokuzinikela lokubhabhathizwa abanye bangathi, ‘Kulendaba yini ukuthi ngikhonze uNkulunkulu ngingazange ngizinikele kuye?’ Impendulo iba segcekeni nxa singakhumbula ukuthi sonke sazalwa silesono. Yikho ngeke senelise ukuba ngabangane bakaNkulunkulu ngenxa yesono sika-Adamu. (Rom. 3:23; 5:12) Ukuzinikela yikho okusivulela ithuba lokuthi samukelwe nguJehova emulini yakhe ukuze sibe ngabangane bakhe. Asiboneni ukuthi kungani kunjalo.

¹¹ Sazalwa ngabazali abalesono yikho babengeke basinike ukuphila okungapheliyo okwakuhloswe nguNkulunkulu. (1 Thim. 6:19) Sazalwa singayisibo bantwana bakaNkulunkulu ngoba abantu behlukaniswa loMdali wabo onguBaba ngesikhathi u-Adamu lo-Eva besona. (Khangela uDutheronomi 32:5.) Kusukela ngalesosikhathi kwasekungasela muntu ozalwa elobungane loNkulunkulu.

12. (a)Abantu abalesono bangenzani ukuze babe ngabangane bakaNkulunkulu?(b) Kumele senzeni singakabhabhathizwa?

¹² Lanxa silesono, singenelisa ukucela ukuthi uNkulunkulu asamukele sibe ngamalunga emuli yakhe.a Lokho kungenzeka njani? Umphostoli uPhawuli wabhala wathi: “Sabuyisana loNkulunkulu ngokufa kweNdodana yakhe siseseyizitha.” (Rom. 5:10) Nxa sibhabhathizwa sicela kuNkulunkulu ukuthi sibe lomzwangedwa omuhle ukuze asamukele. (1 Phet. 3:21) Kodwa kulezinto okumele sizenze singakabhabhathizwa. Kumele sibe mazi uNkulunkulu, sifunde ukumthemba, siphenduke njalo sitshintshe indlela esiphila ngayo. (Joh. 17:3; Imiseb. 3:19; Heb. 11:6) Kuseselokunye okumele sikwenze ukuze samukelwe emulini kaNkulunkulu. Yikuphi?

13. Kungani kumele umuntu ofuna ukuba lilunga lemuli kaNkulunkulu enze isifungo sokuzinikela kuye?

¹³ Umuntu ofuna ukuba lilunga lemuli kaNkulunkulu kumele aqale athembise uNkulunkulu ukuthi uzamlalela ngenhliziyo yonke. Nanku umzekeliso ongasinceda sikuzwisise lokhu. Cabanga ngendoda elungileyo njalo ehloniphekayo ebalomusa emfaneni oyintandane futhi ifisa ukumthatha abe lilunga lemuli yayo. Iqala ithi umfana lo enze isithembiso ingakamamukeli emulini yayo. Yikho ithi kuye, “Ngingakakwamukeli ukuthi ube yindodana yami ngifuna uthembise ukuthi uzangithanda njalo ungihloniphe njengoyihlo.” Indoda le izimisele ukwamukela umfana nxa engenza isithembiso ngenhliziyo yonke. Akulanto embi ngokuthi ikwenze lokhu. Ngendlela efananayo, uJehova wamukela labo abazimisele ukwenza isifungo sokuzinikela kuye. IBhayibhili lithi: “Linikele imizimba yenu ibe yimihlatshelo ephilayo, engcwele njalo eyamukelwa nguNkulunkulu.”—Rom. 12:1.

Ukuzinikela Kutshengisa Ukuthi Siyamthanda UJehova Njalo Silokholo Kuye

14. Ukuzinikela kutshengisa njani ukuthi siyamthanda uNkulunkulu?

¹⁴ Ukwenza isifungo sokuzinikela kuNkulunkulu kutshengisa ukuthi siyamthanda uJehova. Kuphosa kuhambelane lesifungo somtshado. Indoda engumKhristu etshadayo yenza isifungo ithembisa umkayo ukuthi izamthanda kumnyama kubomvu. Isifungo lesi isenza ngoba imthanda kakhulu umkayo. Indoda le iyakwazi ukuthi ngeke yenelise ukuhlala lomkayo nxa ingazange iqale ifunge. Ngendlela efananayo ngeke sizikholise ngokugcweleyo zonke izibusiso zokukhonza uJehova nxa singazinikelanga kuye. Ngakho siyazinikela kuNkulunkulu lanxa silesono ngoba sifuna ukuba ngabangane bakhe futhi senze konke esingakwenza ukuze sihlale siqotho kuye.—Mat. 22:37.

15.Ukuzinikela kutshengisa njani ukuthi silokholo?

¹⁵ Nxa sizinikela kuNkulunkulu siyabe sitshengisa lokuthi silokholo kuye. Yindaba sisitsho njalo? Phela ukuba lokholo kuJehova yikho okwenza siqiniseke ukuthi ukusondela kuye kuyasinceda. (Hubo. 73:28) Siyakwazi ukuthi kwezinye izikhathi kuzaba ngumqanso ukuhamba loNkulunkulu ngoba siphila phakathi “kwesizukulwane esonakeleyo lesixhwalileyo.” Lanxa kunjalo asithandabuzi ukuthi uNkulunkulu uzasincedisa ukuthi sihlale siqotho kuye. (Flp. 2:15; 4:13) Siyakwazi lokuthi silesono kodwa sileqiniso lokuthi uJehova uzasithethelela ngoba ulesihawu. (Bala iHubo 103:13, 14; uRoma 7:21-25.) Asithandabuzi ukuthi uzasibusisa nxa singahlala sithembekile kuye.—Jobe. 27:5.

Ukuzinikela KuNkulunkulu Kwenza Sithokoze

16, 17.Ukuzinikela kuJehova kungenza njani ukuthi sithokoze?

¹⁶ Ukuzinikela kuJehova kwenza sithokoze ngoba siyabe sisipha. UJesu wathi: “Ukupha kuyathokozisa kakhulu ukwedlula ukwamukela.” (Imiseb. 20:35) Ngesikhathi esemhlabeni wasebenza gadalala encedisa abantu futhi lokhu kwenza wathokoza. Kwezinye izikhathi wayengaphumuli, engadli futhi engazifuneli okuthokozisa yena ukuze ancedise abantu bafunde ngoJehova. (Joh. 4:34) Wayejabula ukwenza inhliziyo kaYise ithokoze. Wathi: “Ngihlala ngisenza izinto ezimthokozisayo.”—Joh. 8:29; Zaga. 27:11.

¹⁷ Yikho uJesu wafundisa abalandeli bakhe ukuthi bangenzani ukuze bathokoze. Wathi: “Loba ngubani ofuna ukungilandela kazidele.” (Mat. 16:24) Ukwenza njalo kuyasisondeza eduze kukaJehova. Akula omunye umuntu esingamkhonza ongasithanda futhi asinakekele njengoJehova.

18.Kungani ukuzinikela kuJehova kusenza sithokozise kakhulu?

¹⁸ Ukuzinikela kuJehova lokuqhubeka siphila ngokuvumelana lentando yakhe kuzasinceda ukuthi sithokoze kakhulu. Phela abantu abanengi basebenzisa isikhathi sabo bagijimisana lokufuna ukunotha kodwa lokho akubenzi bathokoze futhi bahlaliseke empilweni. Lanxa kunjalo labo abazinikele kuJehova bona bayathokoza okweqiniso. (Mat. 6:24) Kuyisibusiso ‘ukusebenza loNkulunkulu’ ngoba kubenza bathokoze. Kodwa abazinikelanga emsebenzini nje kuphela, bazinikele kuNkulunkulu ukuze batshengisa ukuthi bayabonga ngakho konke abenzele khona. (1 Khor. 3:9) UJehova uyakuqakathekisa konke abakwenzayo ukuze bamkhonze. Uzakwenza lokuthi abakhulileyo baphinde babe batsha ukuze bakholise ukuphila kuze kube nini lanini.—Jobe. 33:25; bala uHebheru 6:10.

19.Yisiphi isibusiso esitholwa yilabo abazinikela kuJehova?

¹⁹ Ukuzinikela kuJehova kuzasenza sibe ngabangane bakhe abaseduze. IBhayibhili lithi: “Sondelani kuNkulunkulu laye uzasondela kini.” (Jak. 4:8; Hubo. 25:14) Esihlokweni esilandelayo sizafunda ngokuthi kuyini okungenza siqiniseke ukuthi ukuzinikela kuJehova yisinqumo esihle kulazo zonke.

[Amabala angaphansi]

Ungaphendula Njani?

• Ukuzinikela kuNkulunkulu kutshoni?

• Ukuzinikela kuNkulunkulu kusinceda njani?

• Kungani kumele amaKhristu azinikele kuJehova?

[Umfanekiso osekhasini]

Nxa singazinikela kuJehova besesiphila ngokuvumelana lentando yakhe sizathokoza kakhulu