Esikwenzayo Ukuze Sigcine Kuhle AmaWolu OMbuso

Omunye udadewethu osakhulayo okuthiwa nguNicole ohlala eColombia uthi: “Ngiyayithanda kakhulu iWolu yoMbuso yethu! Yikho engibonana khona labafowethu labodadewethu engikhonza labo.” Lawe uzizwa njalo yini?

OFakazi bakaJehova bakhonzela emaWolu oMbuso angaba ngu-63 000 asezindaweni ezitshiyeneyo. AmaWolu oMbuso la asinceda ukuthi sizikhonzele mnandi futhi enza abantu bafune ukuzwa lokho esiyabe sikufundisa. Ngokwesibonelo, elinye iphayona lesikhathi sonke okuthiwa nguDavid elihlala eColombia lathi: “AmaWolu ethu oMbuso enza abantu bafune ukuzwa lokho esikufundisayo. Abanengi abasivakatshelayo basala bebambe owangaphansi nxa bebona indlela esigcina ngayo izakhiwo zethu zizinhle.” Kodwa kuyini okwenza amaWolu ethu ahlale emahle? Yikuthi sisebenza nzima siwaklina futhi silungisisa loba yini engabe ifile. Sikwenza njani lokhu?

Uhlelwa Njani Umsebenzi Wokugcina AmaWolu Emahle?

Amabandla kumele abe leqiniso lokuthi iWolu yoMbuso ayisebenzisayo ihlala ihlanzekile zikhathi zonke. Abafowethu labodadewethu bayazinikela ukuthi bakwenze lokhu. Bayalungisisa lalapho okuyabe kumele kulungisiswe khona ukuze iWolu yoMbuso ihlale ibukeka.

UHlangothi Lokudweba Amapulani Lokwakha (LDC) luyakhetha abazalwane abazahamba befundisa abafowethu labodadewethu indlela zokugcina amaWolu abo oMbuso emahle. Umzalwane ngamunye okhethiweyo ukhangela amaWolu angaba yisithupha kusiya kwalitshumi futhi uyahamba kuwo wonke efundisa abamemezeli ukuthi bangenzani ukuze bawalondoloze. Ngemva kweminyaka emithathu uyawahlola amaWolu la ukuze abone okungabe kudinga ukutshintshwa kumbe ukulungiswa.

Abafowethu labodadewethu bayabonga kakhulu ukuthi kulabazalwane ababafundisayo ukuthi bagcine amaWolu oMbuso abo emahle. Omunye udadewethu ohlala e-India okuthiwa ngu-Indhumathi uthi: “Abafowethu laba basifundisa kuhle kakhulu. Sakholisa sibili ngesikhathi sifundiswa ukuthi singenzani ukuze sigcine iWolu yethu inhle.” Umfowethu ohlala eKenya okuthiwa ngu-Evans yena uthi: “Safunda ukuthi kuqakathekile ukulungisisa masinyane izinto ukuze singacini sesisebenzisa imali enengi kakhulu.”

Ukubhadala Izindleko

Imali edingakalayo ukuze iWolu yoMbuso ngayinye igcinwe kuhle ingasukela ku-$100 kusiya kumadola adlula 1 000a umnyaka ngamunye, kusiya ngokuthi ikuyiphi indawo, isilesikhathi esinganani yayakhiwa, lokuthi isetshenziswa ngamabandla amangaki. Imali yonke le ivela ngaphi?

Ivela eminikelweni eyenziwa ngabafowethu labodadewethu. Umfowethu ohlala eKazakhstan okuthiwa ngu-Alexander uthi: “Eyinye imali isetshenziswa ukubhadalela i-inthanethi lamanzi lamagetsi. Enye imali isetshenziswa ukuthenga imithi yokuklina, amathishu lamagilavusi kanye lependa.” Imali esalayo ifakwa ebhokisini lomsebenzi womhlaba wonke ukuze isebenze lapho okuyabe kufuna ukulungisiswa khona izinto ezinkulu.

Nxa Kumele Kulungiswe Izinto Ezinkulu

Nxa iWolu yoMbuso idinga ukulungisiswa ngemali edlula ejayele ukusetshenziswa okwenyanga ezedlula ezimbili kumbe ezintathu, abadala bebandla bayatshela umzalwane we-LDC okhethwe ukukhangela iWolu yabo. Nxa uhlangothi lwe-LDC lungavuma ukuthi okufileyo kulungiswe, izikhathi ezinengi kusetshenziswa imali yeminikelo womsebenzi womhlaba wonke. Ngomnyaka wenkonzo ka-2023, kwasetshenziswa imali engange-76,6 miliyoni ukuze kulungisiswe izinto ezinkulu ezitshiyeneyo emaWolu oMbuso angu-8 793. Nanzi izibonelo ezimbili:

E-Angola, kuleyinye iWolu yoMbuso eyayisileminyaka engu-15 yakhiwa. Intambo zamagetsi zasezigugile, imiduli isilemikenke, njalo omakhelwane basebekhala ngamanzi ayegelezela emizini yabo. Uhlangothi lwe-LDC lwahlela ukuthi izinto lezi zilungiswe njalo kwasetshenziswa $9,285. Omakhelwane basala bemangele ngendlela okwakusetshenzwe ngayo, babonga kakhulu.

EPoland, uphahla lweWolu yoMbuso lwaseluvuza, lekhaphethi isiguge kakhulu okokuthi yayingasayenzi. Uhlangothi lwe-LDC lwavuma ukuthi kulungisiswe uphahla besekufakwa ikhaphethi entsha. Kwasetshenziswa imali engange-$9,757 ukuze umsebenzi lo wenziwe. Lokhu kwanceda ukuthi kungasayenziwa umsebenzi omkhulu eWolu le okweminyaka eminengi elandelayo.

Ukugcina AmaWolu OMbuso Emahle Kwenza UJehova Adunyiswe

Nxa sigcina kuhle amaWolu ethu oMbuso, uJehova uyadunyiswa futhi leminikelo isetshenziswa kuhle. Umfowethu okuthiwa nguShaun ohlala eTonga uthi: “Umsebenzi wokunakekela kuhle izakhiwo zethu wenza senelise ukukhonza uJehova sisendaweni ehlanzekileyo, ecocekileyo futhi esebenza kuhle. Lokhu kwenza abantu emphakathini bakhulume kuhle ngoJehova. Asilanhloni zokunxusa abantu eWolu yethu yoMbuso.”

Ungancedisa Njani?

Sonke kukhona esingakwenza ukuze sigcine kuhle izindawo zethu zokukhonzela. Omunye umfowethu okuthiwa nguMarino ofundisa abazalwane indlela zokugcina amaWolu e-Australia uthi: “Sonke silesibusiso sokugcina amaWolu ethu oMbuso emahle. Singenza njalo siyabe sincedisa ukuthi iminikelo isetshenziswe kuhle njalo ithunyelwe lasezindaweni lapho edingakala khona kakhulu.”

Umfowethu ohlala e-India okuthiwa nguJoel uyakukholisa ukuyasebenza eWolu yoMbuso. Uthi: “Ukusebenza ndawonye labafowethu labodadewethu kunginika inzwisa yokuthi kuzabe kunjani emhlabeni omutsha.” UNicole esike sakhuluma ngaye uthi: “Ngike ngenza umsebenzi wokukorobha ngesikhathi abafowethu belungisa lapho obekuvuza khona esambuzini. Lanxa kwakungayisimi owayelungisa okwakuvuza, engakwenzayo kwanceda ukuthi kungabi lomuntu otshelelayo.”

Nxa ufisa ukuncedisa emisebenzini eyenziwayo eWolu yoMbuso, khuluma labadala bebandla okulo. Okunye ongakwenza yikufaka imali emabhokisini eminikelo kumbe usebenzise ingxenye ethi donate.jw.org. Iminikelo le ayisoze isetshenziswe eWolu yenu kuphela kodwa izasetshenziswa lakwamanye amaWolu oMbuso. Siyalibonga kakhulu ngendlela elinikela ngayo.