UJehova Ubesincedisa Ukuthi Sikhethe Kuhle

Ngazalwa ngo-1952 eKarlovy Varya edolobheni elaliseduze lebhoda yeGermany, entshonalanga yelizwe elalibizwa ngokuthi yiCzechoslovakia. Abanye abantwana babesithwalise nzima lomnewethu uMilan ngoba sasidabuka eGermany. Lokhu kwenza mina labangakithi sathuthela eFrankfurt, eGermany ngo-1966.

Abazali bami babengoFakazi bakaJehova kodwa basuswa ebandleni ngisesemncane. Yikho ngakhula ngingelalutho engangihlele ukuthi ngizalwenzela uJehova.

Ngokuhamba kwesikhathi abazali bami babuyela kuJehova. Umnewethu uMilan laye wakhetha ukukhonza uJehova wasebhabhathizwa emhlanganweni wesabelo eHannover. Lami ngabhabhathizwa ngalelolanga. Ngalesosikhathi ngangileminyaka engu-15. Ngathi ngisanda kubhabhathizwa ngancenga abazali bami ukuthi bangivumele ngiyehlala eBerlin lapho engaqalisa khona ukufundela ukudweba.

Ngesikhathi ngifundela ukudweba ngacabangisisa ngemibuzo le emibili eyayingihlupha kakhulu: UMdali ukhona yini? IBhayibhili lilizwi likaNkulunkulu yini? Ngananzelela lokuthi ubuhle bezinto esizidwebayo abungeke buqathaniswe ngitsho lakancane lobuhle bezinto ezidaliweyo esikopa kuzo lokho esikudwebayo. Ngacina ngibona ukuthi nxa kuyikuthi into edwetshiweyo ngeke ibe khona kungelamuntu oyidwebileyo kutsho ukuthi lezinto ezidaliweyo ngeke ziphonguzenzakalela nje.

Impendulo yombuzo wami wesibili ngayithola ngokuchwayisisa ngokuthi imbali ikuveza njani ukuthi iziphrofetho eziseBhayibhilini ziliqiniso. Kancane kancane, ngathola ubufakazi bokuthi iBhayibhili liLizwi likaNkulunkulu.—1 KwabaseThesalonika 2:13.

Okunye okwangincedayo yikuthi ngangihlala ngixoxa lomunye umdala webandla owayezimisele ukungincedisa. Ukholo lwami kuJehova lwaqina kancane kancane futhi ngangingasakuqakathekisi kakhulu ukudweba. Ngo-1972 ngiseBerlin, ngaqalisa ukuphayona futhi ngabona ukuthi ngangikhethe kuhle sibili. Kodwa ngangizitshele ukuthi ngizaphayona okwenyanga ezintathu kuphela.

Ukukhonza UJehova Endaweni Ezitshiyeneyo

Kwakunzima kakhulu ukuphayona eBerlin. Lanxa kwasekuleminyaka ephose ibe ngu-100 izindaba ezinhle zitshunyayelwa edolobheni leli, babebalutshwana abalalelayo. Kwakungathi ngiyaphupha ngesikhathi ngithola umuntu wokuqala owavuma ukuthi sifunde sonke iBhayibhili. Lokho kwangenza ngabona ukuthi uJehova wayengangincedisa ukuthi ngenelise ukutshumayela loba ngaphi. Yikho ngaqhubeka ngiphayona.

Phose ngemva komnyaka abafowethu beBhetheli bangibuza ukuthi ngangingafuna yini ukufundela isiSerbo-Croatianb ukuze ngitshumayeze abantu beYugoslavia ababesebenza eGermany. Ngahle ngasukumela phezulu futhi kwathiwa ngiye eFrankfurt. Ngafika ngafundela isiSerbo-Croatian ngiloHans loSonja Smode ababesanda kuvela esikolo seGiliyadi. Ngahlala labo izinyanga ezintathu kwasekuthiwa ngiyekuba liphayona eliqakathekileyo eStuttgart. Kusukela ngo-1973 kusiya ku-1975, ngathutha kanengana futhi ngalesosikhathi ngasebenza labantu abahlanu abatshiyeneyo.

Ngokuhamba kwesikhathi kwathiwa ngiyengena leqembu elikhuluma isiSerbo-Croatian eKarlsruhe. Yikho lapho engahlangana khona lephayona eliqakathekileyo elalisebenza nzima sibili okuthiwa nguLenka. Ngayithanda intombi le njalo sacina sesitshadile. Masinyane nje sisanda kutshada, sacelwa ukuthi siyehambela amabandla ensimini yeYugoslavia ngo-1978.

Isinqumo Esinzima Okwakumele Sisenze

Okweminyaka engaba ngu-10 sasivakatshela amaqembu lamabandla atshiyeneyo ase-Europe. Lanxa sasiwuthanda umsebenzi lo, ngokuhamba kwesikhathi saqalisa ukudonsa nzima. ULenka yena wayesizwa ukuthi sekusala kodwa wayezifuqa ngamandla ukuthi aqhubeke esebenza nzima. Phela sasingakwazi ukuthi senzeni. Sakhuleka kuJehova simncenga ukuthi asitshengise lokho okwakumele sikwenze.

Impendulo yemithandazo yethu sayithola size siye kudokotela. Wasincedisa sazwisisa ukuthi kwakumele sikwazi lokho esasisenelisa ukukuthwala lokukwenza. (UMikha 6:8) Sabona ukuthi kwasekumele sitshiye ukuhambela lanxa kwakunzima ukuthi sikwenze lokho. Sakhuluma labanye abafowethu abakhokhelayo eBhetheli ababengasincedisa. Kodwa samangala besitshela ukuthi nxa sasifuna sasingaqhubeka ngomsebenzi wethu singabahumutshi bolimi lwesiSerbo-Croatian eBhetheli ye-Austria. Utshintsho lolu lwanceda uLenka ukuthi abe ngcono kancane kancane. UJehova wasebenzisa abeluleki abahlakaniphileyo ukuze asincedise singenzi isinqumo esingazisola ngaso.—IZaga 15:22.

Ukwenza Izinqumo Ezinzima Ngesikhathi Sempi

Sesisebenze eVienna okweminyaka emibili, mina loLenka sathuthela eBhetheli yeZagreb eCroatia, eyayikhangela umsebenzi wethu owawusenziwa elizweni okwakuthiwa yiYugoslavia. Lanxa abantu abanengi ababehlala eYugoslavia babelamasiko atshiyeneyo kanye lezinkolo ezitshiyeneyo, abanengi babo babehlezi ngokuthula kwaze kwaba yilapho kuvuka impi elizweni labo ngo-1991. Enyangeni ezilutshwana impi ingakaqalisi, iKhomithi yelizwe lethu yayihlela umhlangano wezizwe owawuzangenwa ngoFakazi ababesezindaweni ezitshiyeneyo zeYugoslavia.

Sakhuleka, saxoxa ngalokho okwakusenzakala elizweni, sasesikhetha ukuqhubeka ngamalungiselelo ethu omhlangano. Sasebenza leziphathamandla zendawo ukuze sibe leqiniso lokuthi izethekeli zethu ezivela kwamanye amazwe zazizabe zivikelekile. Sathokoza ukwamukela amalunga eQula Elikhokhelayo angu-5. Umhlangano lo wabanceda kakhulu abafowethu labodadewethu, wawufike ngesikhathi esihle sibili.

Phose ngemva komnyaka impi iqalisile, iKhomithi yethu yelizwe yezwa ukuthi abafowethu labodadewethu beSarajevo lakwezinye izindawo zeBosnia basebephelelwa yikudla, lenkuni kanye lemithi. Amabutho eSerbia ayesehlasele amadolobho abo yikho kwakungelamuntu owayengabanceda. Sakhuleka kuJehova simncenga ukuthi asitshengise ukuthi senzeni ukuze sibancedise abazalwane.

Abafowethu beBhetheli ye-Austria basincedisa sahlela ukuthi siyenceda abazalwane lanxa lokho kwakuyingozi. Mhlaka 26 October ngo-1993, kwasuka amaroli eVienna ethwele izinto zokuyanceda abafowethu beBosnia ezazingamathani angu-16.c

Sathi sidlula lapho okwakuliwa khona, sakubona sibili ukuthi isandla sikaJehova “kasisifitshane ukuthi singehluleka ukusindisa.” (U-Isaya 59:1) Asisoze safa salukhohlwa uhambo lwethu olwaluyingozi kakhulu sisuka eZenica sisiya eSarajevo. Kwakumele sihambe amakhilomitha angu-40 kuphela, kodwa kwadingeka ukuthi siphambuke emgwaqweni sihambe ngeganga, sacina sesihambe amakhilomitha angu-140.

Sathi sesizafika eSarajevo ngacela ukukhuluma lomkhokheli wamabutho njalo ngezwa ukuthi nguye owayevele eyinduna yamabutho. Wayethandabuza ukuthi sasizaphumelela kodwa wathi esizwa ukuthi sasingoFakazi bakaJehova, wangibuza ukuthi ngangimazi yini omunye umfowethu okuthiwa nguHajrudin. Ngamtshela ukuthi ngangimazi, wayengumngane wethu. Induna leyo yathi: “Lami ngumngane wami, safunda sonke esikolo. Kusukela waba nguFakazi sesizwanana kakhulu.”

Induna le eyayilesikhundla esiphezulu yasibuza imibuzo eyayimayelana lalokho esikukholwayo. Ngemva kwalokho yavuma ukuthi kusetshenziswe enye indlela ecatshileyo ukuze kuhanjiswe izinto zokunceda abazalwane beSarajevo. Yaze yamisa lokuthwalwa kwezinto zamasotsha okwezinsuku ezimbili ukuze amasotsha ayo ahambise izinto lezo. Ngalezonsuku ezimbili, ngamunye wamasotsha lawo wayethwala izinto ezingaba ngamakhilogramu angu-27. Sasingasoze senelise ukuzithwala izinto lezo sisodwa!

Impahla zathi sezifikile, amasotsha ancedisa abafowethu ukuthi bazithwale bazise endaweni evikelekileyo lokuthi bazihambise lakubazalwane beSarajevo kanye lakubomakhelwane babo. Abanye abangayisibo boFakazi basala betshe amathe baze baguqa phansi labafowethu labodadewethu bebonga uJehova.—2 KwabaseKhorinte 9:13.

Izikhathi ezinengi, ukungangeneli kwethu kwezombusazwe kwakusinceda kakhulu ngesikhathi sidlula lapho okwakulamasotsha khona. Ngikhumbula ngesinye isikhathi sasike sagqoka amabheji omhlangano ayetshengisa ukuthi singoFakazi bakaJehova. Lanxa kunjalo, sasikwazi ukuthi ukugqoka amabheji ayisikho kodwa okwakungatshengisa ukuthi asingeni kwezombusazwe. Kwakumele sisebenze nzima ukuze singangeni kwezombusazwe ngitsho lasezinhliziyweni zethu kanye lasendleleni esicabanga ngayo. Yikho sakhetha ukuthi singahlali silalela izindaba ngaso sonke isikhathi, ngoba sasikwazi ukuthi kwakuzaba lemibiko evela kumacele womabili alwayo eyayingenza sibe lobandlululo kumbe sicine sesizonda abanye.

Kusukela ngabo-1990 ngaba lilunga leKhomithi Yegatsha eCroatia ngaphinda ngaba lilunga leKhomithi Yegatsha eCzech-Slovak. Ukwenza imisebenzi etshiyeneyo enhlanganisweni kungifundiseni? Kungifundise ukuthi uJehova angasebenzisa loba ngubani ukuze alungise uhlupho oluthile, ngitsho lenduna yamabutho. Ngifunde lokuthi akumelanga ngizibone angani sengilolwazi olunengi kakhulu, kodwa ngithembele kulokho engikutshelwa nguJehova esebenzisa inhlanganiso yakhe.

Inhlupho Zempilakahle

Ngathi ngihambe ukuyahlolwa ngudokotela ngo-2023 njengenjayelo, ngatshelwa ukuthi ngile-cancer embi kakhulu. Saqalisa ukwesaba ukuthi kwakuzahamba njani ngoba ngangingakaze ngibanjwe umkhuhlane omubi. Mina loLenka sakhuleka kanengi kuJehova simcela ukuthi asincede senze okuqondileyo futhi senza lokho esasikuthandazela. Sadinga okunengi ngomkhuhlane lo saphinda sakhuluma labodokotela. Sathi sesikhethe indlela engangizakwelatshwa ngayo, sezwa sesihlalisekile.

Kanti njalo sazimisela lokuthi singakhathazeki kakhulu ngelakusasa. (UMathewu 6:34) Lanxa sasisebunzimeni, kunengi okwakusenza sithokoze. Ngokwesibonelo kwathi sekumele siye eGermany ukuze ngiyekwelatshwa, sabhalela imuli yethu yeBhetheli eyayiseBratislava, eSlovakia incwadi siyichasisela ukuthi kwakuhamba njani. Sathola amameseji amanengi avela ebanganini bethu, besithandazela njalo besiqinisekisa ukuthi bayasithanda. UJehova angasebenzisa esikhonza labo ukuthi basiqinise njalo angasinika lokuthula “okwedlula konke ukuzwisisa.”—KwabaseFiliphi 4:7.

Iqiniso elikhona yikuthi singabanjwa ngumkhuhlane oyingozi singalindelanga njalo asikwazi ukuthi sizakufa nini. (UmTshumayeli 9:11; UJakhobe 4:14) Yikho ngiyambonga uJehova ukuthi wangincedisa ngisasemncane ukuthi ngikhethe ukumkhonza ngamandla ami wonke. Lokhu kwenze ngathokoza empilweni.d