UJehova Ubesinika Indlela Yokuphunyuka Ngesikhathi Sisebunzimeni

Angisoze ngilikhohlwe ilanga lapho esavakatshelwa khona ngumalume lomalumekazi ngo-1976. Umalume wayesefunda iBhayibhili laboFakazi bakaJehova. Watshela abazali bami ukuthi wayesefunde into entsha eBhayibhilini. Wabatshela lokho uJesu ayekutshele abakhokheli benkolo okutholakala kuMathewu isahluko 23. Wasebachasisela ukuthi okwakusenziwa ngabakhokheli benkolo ngensuku zikaJesu kuyahambelana lalokho okwenziwa ngabakhokheli benkolo lamuhla. Umama yena wayesonta iRoma, yikho kazange akukholwe ukuthi uJesu wayengakhuluma into enjalo ngabakhokheli benkolo. Ngakho wabona kungcono ukuthi azikhangelele ukuthi iBhayibhili lithini.

Sasihlala eLithuania futhi ngalesosikhathi yayingaphansi kweSoviet Union. Uhulumende wakhona wayengavumeli abantu ukuthi bazikhonzele bekhululekile njalo iBhayibhili lalitholwa ngabantu abalutshwana nje kuphela. Yikho umama waboleka iBhayibhili etshetshi wasezibalela yedwa. Wakubona ukuthi lakanye uJesu wayebaveze egcekeni abakhokheli benkolo ukuthi babezitshaya angathi benza okufunwa nguNkulunkulu kodwa besenza okungayisikho. Lokho kwammangalisa umama wazibuza ukuthi kambe kuyini okunye okufundiswa liBhayibhili, wasecela ukuthi uFakazi owayefunda lomalume amnike amabhuku.

Kungakayi ngaphi mina labangekhaya saqalisa ukuya emihlanganweni yaboFakazi bakaJehova. Imihlangano le yayisenzelwa endaweni ezitshiyeneyo ngoba babengavunyelwa ukukhonza bekhululekile. Kwezinye izikhathi sasiyingenela egangeni. Mina lomama kanye lephahla lami uDanguolė sabhabhathizwa ngo-1978. Ngesikhathi sibhabhathizwa sasileminyaka engu-15. Kodwa ubaba yena wabhabhathizwa ngemva kweminyaka emilutshwana sibhabhathiziwe.

UJehova Wanginika Indlela Yokuphunyuka Ngisesemutsha

Mina loDanguolė sathi silenyanga sibhabhathiziwe saqalisa ukuthwaliswa nzima esikolo. Ngelinye ilanga kwaba lombuthano oqakathekileyo, amatitsha asenanzelela ukuthi thina sobabili asizange sisukume ngesikhathi kutshaywa ingoma yesizwe. Lokho sakwenza ngenxa yokuthi sasingazingeni ezombusazwe. Amatitsha anika umphathisikolo amabizo ethu, umphathisikolo yena wasetshela amapholisa ayesebenza ecatshile ayebizwa ngokuthi yiKGB. Ngesikhatshana nje amapholisa la ayesefikile ngekhaya esibuza imibuzo eminenginengi.

Lapho esasifunda khona sasithwele nzima ngoba babefuna sikholwe ukuthi uNkulunkulu kakho. Sathi sifikisa iminyaka engu-16 umbalisi wathi sibhale indaba elesihloko esithi “Yindaba Ngingakholwa KuNkulunkulu?” Mina ngangingavumelani lesihloko leso. Yikho ngabhala ngathi “Ngiyakholwa kuNkulunkulu” ephepheni ngasengilifaka phezu kwetafula engangihlezi kuyo. Umbalisi wathi ebona iphepha lelo wazonda watshinga wathi, “Bhala-ke ukuthi yindaba ukholwa!” Lokho kwangithabisa ngoba ngasengithole ithuba lokubhala ngalokho engikukholwayo. Udadewethu uDanguolė laye wabhala ngalokho ayekukholwa. Amanye amankazana amabili athi ebona lokho esasikubhala lawo abhala ngokuthi yindaba ekholwa kuNkulunkulu. Lokhu kwangenza ngabona ukuthi uJehova uyenelisa ukungipha ‘indlela yokuphunyuka’ ngezikhathi ezinzima futhi ngakubona lokuthi wayengayekeli ukungincedisa.—1 KwabaseKhorinte 10:13.

Ngalesosikhathi eLithuania kwakulamakhophi amane kumbe amahlanu awebhuku elithi From Paradise Lost to Paradise Regained elidindwa ngoFakazi bakaJehova. Ngakho abafowethu abakhokhelayo basiboleka ibhuku lelo okwenyanga eyodwa. Kodwa mina loDanguolė sazitshela sathi, “Aluba silalo lathi ibhuku lelo!” Kodwa njengoba sasingeke silithole saqalisa ukulibhala lonke ngezandla. Izandla zaba buhlungu sibili, kodwa esakuthabelayo yikuthi lathi sasesilalo ibhuku elalizaqinisa ukholo lwethu.

Ngo-1982 ngisanda kufikisa iminyaka engu-19 ngagwetshelwa iminyaka emibili ejele ngoba ngangiyalile ukungena esisotsheni. Kwakunzima kakhulu ejele ngoba ngasengiphila lezigebenga. Kodwa engikubongayo yikuthi ngangijayele ukutshayisana lomunye uFakazi owayebotshiwe khonapho. Iminyaka emibili yathi iphela ngakhululwa kodwa ngangisazokubona okukhulu.

Ngathola Intombi Eyayithanda UJehova

Ngathi sengikhululiwe ejele ngo-1984 ngathandana lenye intombi okuthiwa nguLidija eyayihlala e-Ukraine. ULidija wayemuhle futhi emthanda uJehova. Sathi sesitshadile wasuka elizweni langakibo wabuya wazohlala lami eLithuania. Laye wayeke wathwalisa nzima esikolo ngenxa yokuthi yena labangakibo babengoFakazi bakaJehova. Ngezikhathi lezo ezinzima okwakumqinisa yikucabanga ngabafowethu labodadewethu abaqhubeka bethembekile ngesikhathi behlutshwa enkambeni zamaNazi futhi besuswa emazweni abo behanjiswa eSiberia ukuthi bayekuba yizigqili.

Ngabo-1980 imisebenzi yaboFakazi bakaJehova ephathelane lokukhonza yayilokhu ingavunyelwa eLithuania. Yikho ababetshada babetshada ngamalanga emihlangano emikhulu. Lathi satshada ngalesosikhathi. Abantu ababekhona basenzela amhlophe. Ngemva kwalokho umhlangano waqhubeka, salalela izinkulumo, sahlabela ingoma ezinengi, sabukela lamadrama amane. Nxa ngisakhumbula kuhle kwakulabantu abangaba ngu-450 kugoqela lezihlobo ezazivela kwezinye indawo futhi abazalwane bananzelela lokuthi kwakulamanye amapholisa eKGB.

Ukubuyela Emthethwandaba

Nxa uFakazi wayephuma ejele kodwa elokhu engavumelani lalokho uhulumende ayefuna akwenze wayengaphinda abotshwe. Ngakho kwathi sekulomnyaka sitshadile ngaphinda ngahanjiswa emthethwandaba. Lelolanga ngatshona khona kodwa uLidija yena wayesesibhedlela esiseduze njengoba wayezithwele. Ngangingavunyelwa ukuyambona ngesikhathi ngithonisiswa kodwa kwakusithi bengathi siphumule kancane ngihambe ngiyembona ngifike ngime ewindini lakhe. Yena wayevula iwindi besesixoxa kancane sikhuthazane. Ngalelolanga ngagwetshelwa iminyaka emithathu ejele.

Okudanisayo yikuthi ngemva kwamalanga amabili uLidija waswela. Uthi lokho kwaba buhlungu kakhulu okokuthi wezwa angathi umhlaba umhlanekele. Kanti njalo okunye okwakunzima yikuthi wayesajayela ukuhlala elizweni elitsha kanye lokuhlala labazali bami. Phela yena wayekhuluma isi-Ukrainian lesiRussian kodwa abazali bami babengazazi kuhle lezondimi. Lanxa kunjalo, wathembela kuJehova njalo abazali bami babemphethe kuhle futhi bemduduza ngesikhathi leso esinzima.

UJehova Wayelokhu Engipha Indlela Yokuphunyuka

Engakufunda ngesikhathi ngibotshwe okokuqala kwanginceda ngesikhathi ngibotshwa okwesibili. Okunye okwakunginceda ukuthi ngiqinisele yikutshumayeza abanye. Ithuba lokubatshumayeza ngangilithola ngesikhathi sihanjiswa ejele njengoba izibotshwa zazigcwaliswa ezimoteni lasezitimeleni. Kwezinye izikhathi endaweni eyayingena abantu abangu-5 kumbe abangu-6 kwakungeniswa izibotshwa ezingu-15 kumbe ezingu-20. Yikho ngangibachasisela ukuthi okungenze ngabotshwa yikuthi angihambi empini futhi angingeni kwezombusazwe. Ngangibatshela lokuthi yindaba ngikholwa ukuthi uNkulunkulu ukhona.

Ijele engahanjiswa kuyo yayisendaweni okuthiwa yiMarijampolė.a Ngibona angani kwakuyimi ngedwa uFakazi phakathi kwezibotshwa ezingu-2 000 ezazenze amacala esabekayo. Izibotshwa zazijayele ukwethuselana, ukutshayana, ezinye zize zibulalane. Kodwa mina zangitshaya kabuhlungu kanye kuphela. Impilo yayinzima ejele, yikho kwakukalutshwana ukuthola umuntu okuzwelayo. Kodwa mina ngangingayekeli ukukhuthaza abadanileyo lokutshengisa ukuthi ngiyabazwela.

Amapholisa eKGB ayesidla ngengqondo efuna nje ukusidukisa. Ayekwazi ukuthi kwenzakalani ngekhaya futhi ayengitshela lokuthi babekhuluma ngani. Kodwa ayetshila lokho okwakutshiwo ngabangekhaya ukuze kukhanye angathi babexabana futhi bengazwanani. Lanxa kunjalo, ngangivele ngingakukholwa ababekutsho lanxa iqiniso ngalithola sengiphume ejele.—UMathewu 10:16.

Ngelinye ilanga omunye udade wacela umakhelwana wakhe owayengumlindijele ukuthi angiphathele iBhayibhili elincane elesiRussian. Kwakusithi kungaba sebusuku ngibhale amavesi amalutshwane awentshumayelo kaJesu yasentabeni ephepheni elincane. Ngelanga elilandelayo ngangisithi sengisebenza ngiwabale kanengi amavesi la nxa kungelamuntu ongikhangeleyo. Lokhu kwanginceda ukuthi ngiyibambe ngekhanda intshumayelo kaJesu yasentabeni ngesiRussian lanxa lolo kwakungayisilolimi lwami lomdabuko. Ngokuhamba kwesikhathi abalindijele balibona iBhayibhili lelo balithatha. Lanxa kunjalo, intshumayelo kaJesu ngangivele sengiyibambe ngekhanda.

Umkami uLidija wayengisekela kakhulu futhi wayengikhuthaza ngokungibhalela incwadi phose nsuku zonke. Kodwa mina ngangivunyelwa ukuthi ngimphendule kabili kuphela ngenyanga. ULidija wangitshela ukuthi incwadi engangimthumela zona zazimenza ahlaliseke ngoba zazimtshengisa ukuthi ngisaphila, lokuthi ngithembekile kuJehova kanye lokuthi ngisamthanda.

UJehova Wayeyiphendula Imithandazo Yami

Ngelinye ilanga ezinye izibotshwa zala ukusebenza zifuna iziphathamandla zejele zenze umsebenzi wazo ube lula. Kodwa izibotshwa lezo zajeziswa kabuhlungu ngenxa yokuvukela kwazo. Ngemva kwalokho iziphathamandla zejele zatshela mina labanye ukuthi sesizabe sisenza umsebenzi obusenziwa yizibotshwa lezo.

Manje okwakusenzakala yikuthi nxa ngangingayala ukwenza umsebenzi lo ngangizajeziswa kabuhlungu. Kodwa nxa ngangingawuvuma, ezinye izibotshwa zazizakuthi ngingumthengisi besezingitshaya kumbe zingigwaze ngife. Ngasengiphakathi kwelitshe lembokodo ngingakwazi lokuthi ngenzeni. (2 ImiLando 20:12) Ngakho ngakhuleka kanengi kuJehova ngimncenga ukuthi angincedise.

Khonokho nje esinye isibotshwa engangisebenza laso eqenjini lethu sangicela ukuthi siyebona umaqhuzu. Isibotshwa lesi sasingasimngane wami, sasiphongusebenza sonke nje. Safika satshela umaqhuzu ukuthi mina akumelanga ngisuke eqenjini lethu. Baphikisana kwaba luthuli lomaqhuzu lo. Lanxa wayenguntandokayiphikiswa, wangivumela ukuthi ngingasuki eqenjini lethu wasesixotsha ewofisini yakhe. Ngezwa kusithu hu! (2 UPhetro 2:9) Selokho ngabotshwayo ngangingakaze ngibone esinye isibotshwa sisenza konke okusemandleni aso ukuthi sincedise esinye. Lokho kwangifundisa ukuthi uJehova angaphendula imithandazo yethu esebenzisa loba ngubani.

UJehova Wanika ULidija Indlela Yokuphunyuka

Kahle ngilixoxele ukuthi kwakusenzakalani kuLidija ngesikhathi ngisejele. Kwakumele adinge umsebenzi kodwa abaqhatshi abanengi babengamthathi ngoba babesesaba ukuhlutshwa ngamapholisa eKGB njengoba ngangisejele. Lanxa kunjalo, wacina ewutholile umsebenzi owawungowokunakekela abantwana abangu-30 futhi wayesebenza amahola angu-12 ngelanga. Wayetshayisa edinwe efile kodwa uJehova wamnika amandla okuthi enelise ukusebenza nsuku zonke. Kanti njalo kazange abe lesizungu ngoba abafowethu labodadewethu ababevela endaweni ezikhatshana eLithuania babebuya bezomduduza, bakwejise laye futhi bamphathele lamabhuku olimi lwesiRussian.

Ukukhonza UJehova Siyimuli

Ngathi sengikhululiwe ejele ngancedisa ukuhlela umsebenzi wokuhumutshela amabhuku ethu olimini lwesiLithuanian. Umsebenzi lo sasiwenza sicatshile kodwa ngemva kweminyaka emilutshwana nje umbuso weSoviet Union wachitheka futhi uhulumende wayesesivumela ukukhonza sikhululekile eLithuania. Ngemva kwesikhathi kwaba lewofisi yokuhumutsha eyolimi lwesiLithuanian. Ngangikukholisa ukuncedisa emsebenzini lo lanxa iwofisi yokuhumutsha yayikhatshana kakhulu lalapho engangihlala khona. Umsebenzi lo ngawenza okweminyaka engu-5 ngincedisa maviki wonke.

Ngo-August 1997 mina lomkami uLidija sacelwa ukuthi siyesebenzela ewofisini yaboFakazi bakaJehova eseLithuania ebizwa ngokuthi yiBhetheli. Sathaba saze saphosa sathinta amayezi. Ngalesosikhathi sasesilabantwana abangamankazana ababili. Owakuqala kuthiwa ngu-Oksana futhi wayeseleminyaka engu-9. Owesibili yena kuthiwa nguSvajūnė futhi wayeseleminyaka engu-5. Basinika amalanga amathathu okuthi sithuthe siyehlala endaweni eseduze leBhetheli njalo kwakumele sidingele u-Oksana indawo kwesinye isikolo.

Manje sasibakhulisa njani abantwabethu ngapha sisebenza eBhetheli? Mina ngangivuka kusesele ngihambe eBhetheli kodwa uLidija yena wayeqala alungisele abantwana besikolo abeselandela bengasuka. Yena wayetshayisa amankazana engakaphenduki endlini ukuze athole kulomuntu ngekhaya.

Kwakusithi iviki ngayinye ngoLwesihlanu ntambama sipheke, sikline futhi sibe lokukhonza kwemuli. Sasikukholisa kakhulu lokho. Kanti njalo sasihlela ukuyavakatsha sibona izintaba, ulwandle kanye lamanye amaBhetheli ase-Europe. Lokhu kwakunceda abantwabethu ukuthi babone izinto ezidalwe nguJehova futhi babebazi abafowethu labodadewethu abakwamanye amazwe. Amankazana ethu aba ngamaphayona esikhathi sonke eleminyaka engu-15. Siyazigqaja kakhulu ngawo. Lamuhla u-Oksana lomkakhe uJean-Benoit basebenza ewofisini yokuhumutsha yesiLithuanian. USvajūnė lomkakhe uNicolas bona basebenza eBhetheli yeFrance.

Mina lomkami uLidija besiqakathekisa ukukhonza uJehova ukwedlula loba yini empilweni. Lokhu kusenze saba “nyamanye” sibili. (Kwabase-Efesu 5:31; UmTshumayeli 4:12) Lanxa ‘sasicindezelwa’ asizange sizizwe ‘sibandezelwe.’ Kanti njalo asizange sizizwe silahlelwe iganga lanxa sasisebunzimeni okweminyaka eminengi. (2 KwabaseKhorinte 4:8, 9) Sesimbone kanengi uJehova esinika indlela yokuphunyuka njalo siyaqiniseka ukuthi uzahlala esincedisa.