KwabaseFiliphi 4:6, 7—“Lingakhathazeki Ngalutho”

“Lingakhathazeki ngaloba yini kodwa bikelani uNkulunkulu zonke izicelo zenu ngomthandazo langokumncenga kanye lokumbonga. Nxa lingenza njalo, ukuthula kukaNkulunkulu okwedlula konke ukuzwisisa kuzalinda izinhliziyo zenu lengqondo zenu ngoKhristu uJesu.”—KwabaseFiliphi 4:6, 7, New World Translation.

“Lingakhathazeki ngalutho, kodwa ezintweni zonke, ngokukhuleka langokuncenga, ngokubonga, bekani izicelo zenu kuNkulunkulu. Ukuthula kukaNkulunkulu okudlula ukuqedisisa konke, kuzalinda izinhliziyo zenu lezingqondo zenu kuKhristu uJesu.”—KwabaseFiliphi 4:6, 7, New International Version.

Okutshiwo nguFiliphi 4:6, 7

Abantu abakhonza uNkulunkulu bangathandaza kuye nxa bezizwa bekhathazekile. Uthembisa ukubenza bahlaliseke njalo babe lokuthula futhi lokho kuzabanceda ukuthi bangakhathazeki kakhulu lokuthi bengakhulelwa yimicabango ebenza badane. Uvesi 6 uqamba indlela zokuthandaza ezingenza bathole lokhokuthula.

Ukuncenga yikuthandaza kuNkulunkulu ngenhliziyo yonke umcela ukuthi akwenzele okuthile. Umuntu angathandaza encenga uNkulunkulu nxa ekhathazeke kakhulu kumbe esengozini. UJesu laye wenza njalo ngesikhathi esebunzimeni. (KumaHebheru 5:7) Izikhathi ezinengi umuntu oyabe ethandaza ngendlela le ukwenza kanengi lokhu.

Enye indlela yokuthandaza esingayisebenzisa yikucela kuNkulunkulu khona kanye esikufunayo. Abantu abakhonza uNkulunkulu bangambikela “zonke” izicelo zabo. Lanxa kunjalo, lokho abakucelayo kumele kuvumelane lentando kaNkulunkulu esiyithola eBhayibhilini.—1 UJohane 5:14.

Okunye esingakwenza yikukhuleka kuNkulunkulu simbonga ngalokho asenzele khona kanye lalokho azasenzela khona esikhathini esizayo. Nxa singacabangisisa ngezinto esingambonga ngazo uNkulunkulu sizathokoza.—1 KwabaseThesalonika 5:16-18.

UNkulunkulu uzasinika ukuthula nxa singathandaza sisebenzisa izindlela lezi. “Ukuthula kukaNkulunkulu” asinika khona yikuhlaliseka esikuthola ngenxa yokuthi singabangane bakhe. (KwabaseRoma 15:13; KwabaseFiliphi 4:9) Ukuthula lokhu ‘kwedlula konke ukuzwisisa’ ngoba kuvela kuNkulunkulu njalo angasincedisa ngendlela esiyabe singayikhangelelanga.

Umbhalo lo uthi ukuthula kukaNkulunkulu kuyalinda izinhliziyo zethu. Ibala lesiGrikhi elahunyutshwa ngokuthi “kuzalinda” lihambelana lebala elalisetshenziswa nxa kukhulunywa ngeqembu lamasotsha ayelinda idolobho elivikelwe ngemiduli. Ngakho ukuthula kukaNkulunkulu kuyamvikela umuntu ukuze ahlaliseke nxa esezizwa ekhathazekile. Kuyamnceda lokuthi inhlupho zingamkhuleli kakhulu.

Ukuthula uNkulunkulu asinika khona kusivikela ‘ngoKhristu uJesu’ ngoba ngaye uJesu siyenelisa ukuba ngabangane bakaNkulunkulu. UJesu wasifela ukuze sithethelelwe izono futhi nxa singaba lokholo kuye, uNkulunkulu uzasibusisa kakhulu. (KumaHebheru 11:6) Kanti njalo uJesu uyindlela yokuya kuNkulunkulu nxa sithandaza, yikho wathi: “Akulamuntu ongeza kuBaba ngaphandle kokuthi eze ngami.”—UJohane 14:6; 16:23.

Amanye amavesi asinceda sizwisise uFiliphi 4:6, 7

Incwadi yabaseFiliphi yabhalwa ngumphostoli uPhawuli eyibhalela amaKhristu ayehlala edolobheni leFiliphi.a Esahlukweni 4 sencwadi le uPhawuli wakhuthaza abantu ababesebandleni leli ukuthi bathokoze, wasebabonga ngokuphana kwabo okwakumenza laye athokoze. (KwabaseFiliphi 4:4, 10, 18) Wabatshengisa lokuthi umthandazo ungabanceda njani ukuthi bathole ukuthula kukaNkulunkulu, waphinda wabatshela lalokho okwakumele bakwenze futhi bakucabange ukuze “uNkulunkulu wokuthula” aqhubeke ebancedisa.—KwabaseFiliphi 4:8, 9.